1 Zââ

Əlî Fraka nə̂

ZÂÂ

Kumu əpʉ

Âdâ kə ta fraka səke də̂ yea

Angbʉlî ngrowô ə̂në Zââ, əzü-awla nə̂ Kristə, tâ ə wlâ kə azü kɔ kə səye. Zââ nə tâ angbʉlînə ə̈bə̈ ata ngrowô gâ ye, â pâ ndə kə sə Jezu pâ ashɔ səye gâ lə nə gâ ye: ə tə nə kə də̂ «Ə̂rɔ̂ Əpʉ ə̂në Zââ tâ» kɔ. Tshə tâ ndje angrowô bishi ə̂në tshə wlâ kə azü kɔ mandâ ənə̂ səke.

Leme-e, alabə̈ azü sə̂ je ə̂në əndje sə̂ kə pa əterə kə azü ə pa Jezu Kristə ə̂në tshə nâ gâ pâ ashɔ ndə kə sə tə əzü kɔ, tshə sə sə tə Ɨrɨ Ndjapä ne, mbrə ə̂në əndje pâ aərə yîrə̂ sə kpî tə̂ aərə tshepashɔ. Rəkɔ, əndje pâ kwatəndje ə pa əzü bale bale lï ndə kə mbrə ərə ə̂në ə fʉ tə̂ ye, â Ndjapä sə sə kə wu tə ə̈bə̈ ərə ne.

Âdârə ə̂në Zââ nə tâ ngrowô kə azü nə̂ Kristə ndə kə pa tshə yisə̂ nə kə əndje ə pa əde də̂ Jezu nə. Tshə pâ ndje kə əndje ə pa ə sə tə djatra əpʉ, sorô nə̂ alɔnɔ̂ sə je, â tshə yîsə̂ äwä ə̂në əzü lï ndə kə sɔtə̂ nə kɔ kə əndje gâ ye. Əzü bale bale ə̂në tshə za lɔsu ye kə Jezu, tshə sə kə sɔtə̂ sorô səkɔ. Tshə pâ kwatə̂ye kə azü nə ə pa əndje sə kʉ bale də Ndjapä, gâ ndə Ɨrɨ nə də Jezu, ə yində Ndjapä nə də lɔsu əndje də ə̂dû azü nə̂ Ndjapä nə nɔ̂. Kədə əndje mbrə rə, əndje sə kə wusə̂ nə ngâ ə pa alane sə də sorô nə̂ alɔnɔ̂ nə.

Əpʉ tshelə fraka səke na rəke

1. (1.1-4) Əpʉ ə̂në ə za sorô kə azü kɔ

2. (1.5–2.2) A nä ana lə ə̂yîəwo

3. (2.3-17) Ə̈bə̈ tafa âgbɔ̂ əpʉ

4. (2.18–3.10) Alayïkowɔ nə̂ Kristə, də aneshe nə̂ Ndjapä

5. (3.11–4.21) Kə yi tə̂ azü lə takpa tə̂ əndje

6. (5.1-21) Kə sɔ lagbanga pâ aərə tshepashɔ