Ammato Oɂusub

Raaga Kayaannisa 15

Tagachchoo engge kaɂabero erggichcha

Kakkalee kaɂatiinna kasaadamiro malaata daruurii ani dee; engge tawaa felooyi kakkohaatta tagachchoo talleetetto engge todoba kaɂabero erggichchaal todoba ani dee.

Hikkakko abbaabayere eleen takkolelledanttetto mastootii aani ollaraan beke aankkikki maamme ani dee; usumaleenna sulaaletinna sulaaletikotti misilii, megekkeessakonɂi tootona malaata kaɂawodeero ibaaddo ani dee; isona Waa kasisero kiraan abeenguren mastootii aani ollaraan beke dollee aalleen gireen. Waawun kahandaare kamuse mazamurinna kaɂidaado mazamuri haa amaa zammaraa gireen,

«Dubba kadaanddaatta Goottaa Hedo!

feloɂoottaa oɂatiinna osaadamiraanyan;

Kagosa wono!

raakkana tukkulkina karrummiyya;1 2

Goottaa! Ku kaɂabssannonna

megekkaa kakkabajiinoon ayyoyya?

ati kaalaal k'ulluukkitta;

Karrummii firddaka mankkomutero maraan

gosa dubba emeeyire ku horee sagadinara.»3

Hikkakko abbaabayere taɂatoo daase kakkogitto k'ulluukki min kawaa daruurii baname giraan ani dee;4 Engge todoba kaɂabera erggichchaal todoba k'ulluukki min kawaakko been; muc'c'i kaɂame kahank'k'aaro gumaarakki sarssi sarssateen gireen; geegiyottisoyinna kawork'k'ii moowano moowateen gireen. Neefo taɂabtto met't'a afarkko koo jiruu jiroommakko taa jiruu jiroomma geeroon kagirnnaro Waakotti engge kakkoɂammaganttetto todoba tawork'k'ii t'uggaal isoon sise. K'ulluukki min kawaanna kabaja tawaakkona hunnakko kakkeeyi iyyii ammagame; erggichchaal todoba taɂabera engge todoba taagudattoo maayyona k'ulluukki min kawaa orroddi tabin lakkodaanddee.5

Source notes (5)

Footnote Kagosa wono kookkoo mas'aafajjol «Kageesijol wono» amara.
Cross-reference Biy. 15:1.
Cross-reference Erm. 10:7; Mez. 86:9.
Cross-reference Biy. 38:21.
Cross-reference Biy. 40:34; 1 Won. 8:10-11; 2 Won. 5:13-14; Isa. 6:4.

Ammato Oɂusub. Copyright © The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.