ራጋ ካያንሳ 16

ኤንገ ታዋ ካአበሮ ጡጋል ቶዶባ

1ሂካኮ አባባየረ ኤርግቻል ቶዶባነ፥ “ሴዬን! ኤንገ ታዋ ካአበሮ ጡጋል ቶዶባ ኡሊ ኡባ!” ታአማታ ጦቂ ታአንተ ያየ ቁሉክ ምን ካዋኮ ብያ ግራን አን ማለ።

2ካሆሬ ኤርግቻት ሴተጉረ ጡጋ ኡሊ ኡበ፤ ካሱላለቲ ማላታ ካአቦዉና ታሱላለት ምስሊ ካሳጋዳሮ እባዶ ጉት ታሜላና ታአቦስሳ ሜጋ ቤተ።1

3ካላምክ ኤርግቻት ጡጋ በከ ኦሮ ኡበ፤ በከና ካጎየ እባዶኮክ ኢግ ኣን ሌን፤ በከ ኦሮ ካግራ ኔፎ ካአባ ዱባ ጎየ።

4ካሴድ ኤርግቻት ጡጋ ላጋይና ፉልቶል ጉት ኡበ፤ እሶና ኢግ ሌን፤ 5በከ ጉት ኦዶናት ካአባ ኤርግቻት ሃ አማ ግራን አን ማለ፤ “ካግቴና ካግታ ቁሉክ ጎታ! ሂካማሌ አት ማንኮፍርዲተቶ ማራን አት ጋራታ፤ 6እባዶ ቁሎሌኮክና ካሄገሮልኮክ ኢግ ማንኮኡበሮ ማራን አት እሶ ኢግ ጣምሰ፤ ህክና እሶን ካዶትሳሮያ፤” 7ታጃርሶ ባንኤይ፥ “እ! ዱባ ካዳንዳታ አት ጎታ ሄዶ! ፍርዳካ ሩምና ልክኪያ” ታአማቶ ያየ አን ማለ።

8ካአፋር ኤርግቻት ጡጋ አርት ጉት ኡበ፤ አሪትና እባዶ ጎጎጉብቶን ሁና ኤሰን ስሳመ። 9እባዶና ካአቲ ዎባና ካአሪቲ ጉባተ፤ ህታ ኤንገ ጉት ኦዶናት ካአባ መገ ካዋ ሀባራመ፤ ጩቦኮ ጉላ ላኮጋሌን፤ ዋና ላኮካባጄን።

10ካከን ኤርግቻት ጡጋ ኮርፍንጀ ካሱላለቲ ጉት ኡበ፤ ዎኖናት ካሱላለትና ሙጉድ ሌ፤ እባዶ አቦሳኮ ካከይ ሙንጀ ፎጫ ግረ። 11ሀዉኣም ክሶኮና ሜጋትሶኮ ካከይ ካዳሩረ ሄዶ ቃንጌን፤ ፈሎ ኦትሶኮና ጉላ ላኮጋሌን።

12ካሌይ ኤርግቻት ጡጋ ካኤፍራጢስ ካአቲ ላጋ ኦሮ ኡበ፤ ምና ታብያንኮ ካኤሜታሮ ዎኖላሉን ራ ኤካስን በከ ኦላጋ አንጋጌን። 13ታሱላለት ህኢኮና ታዶቦሴ ህኢኮ፥ ካጣራ ካሄገሮኮት ህኢኮ ጎጎ ኣን ካላራ ባቲክ አያና ሴዶ ብያግራን አን ዴ፤ 14እሶ ባሳ ኦፈላራን ካዱርሳ ባቲክ አያናያን፤ ሂክ ባቲክ አያና ዱባ ካዳንዳሮ ሄዶኮት ታአቲ አሪ ካክናሮ ጀሬኑን እባዶ ኩኩይስን አላምኮክ ዎኖላል ዱባ ቶስ ሴይናራን።

15“አን ሄቶ ኣን ደራኣ ኤመይናራ! ሀዉአይ ጎጎሌኖንኮና ሙላኬሳ እባዶ ጎጎዴኖንኮ አዴሰረ ሳርስ ካኦራታራ እባዶ ካሶማሳመያ!”2

16ባቲክ አያናና ዎኖላል ሄኢ ታኢብራይስጢ አርማገዶን ታአማማቶ ባንኤ ኩኩይሰ።3

17ካቶዶብ ኤርግቻት ጡጋ አምባል ጉት ዳረኤ፤ ቁሉክ ምን ካዋ ኦሮ ካግሮ ኮርፍንጀኮ “ጉዳተዋ!” ታአማታ ታአቲ ያየ ቤተ። 18ባንቃኖ፥ ያየ፥ ድዲዴና ካአቲ ኡልኮክ አኣኖ ሌ፤ ሂካ ኣንክክ ካአቲ ኡልኮክ አኣኖ እባዶ ሂካ ኡል ጉት አሮመጣመኮ ሀጋአበረ ሂካማሌ ሌ ላካሶ።4 19ታአቲ ካታማ ባንኤ ሴድ ቤተ፤ ካአይዛብ ካታማልና ዲጋመ፤ ዋ ታንጂንት ባብሎን ሻደ፤ ታአቲ ኤንጌ ካዎይኒ ጣሞ ታኮአማጋንተቶ ጡጋ ጎጎጣምራዉን የለ።5 20ኦዶላል ዱባ ቶላዴን ባቃተን፤ ዎዳሚልና ላኮሙተ።6 21መተመተይ አፋርታምኮ ከን ኪሎ ግራም ግታት በለት ዳሩርኮ እባዶ ጉት ኢተ፤ ኤንገ ኣሎ ታአቦስሳቶ ማንኮሌተተ ማራን እባዶ ታበለቲ ኤንገኮት ኣላንቲ ዋ ሀባረ።7