Luk 9

Yesu osom acɛpsɛ ɔn darəŋ wəco kɔ mɛrəŋ

MAT 10.5-15; MARK 6.7-13

1Kɔ Yesu ewe acɛpsɛ ɔn darəŋ aŋɛ wəco kɔ mɛrəŋ, k'ɔsɔŋ ŋa fənɔntər fa kətam ka kəbɛləs yɔŋk yɛlɛc fəp, kɔ kətaməs ka docu da acuy. 2Kɔ Yesu osom ŋa kəkɔdəŋk dɛbɛ da Kanu, kɔ kətaməs ka docu. 3K'oloku ŋa: «Ta nətɔmpərɛnɛ daka o daka teta dɔpɔ, ta nətɔmpər kəgbo, ta nətɔmpər tɔlɔba, ta nətɔmpər tocom, ta nətɔmpər pəsam, ta nwɛ o nwɛ pətɔmpər səburumus mɛrəŋ. 4Kɔ nəndekɔbɛrɛ kəlɔ nkɛ o nkɛ-ɛ, nəyi di, difɔ nəndekɔyɛfɛ a nəsumpər dɔpɔ donu kəkɔ. 5Nnɔ o nnɔ afum ŋantɔwosɛ kəbaŋ nu mɔ, kɔ nəndewur dare dadɔkɔ-ɛ, nəkoŋ-koŋ wɛcək wonu, it'endeyɔnɛ sede a ŋanabaŋ fɛ nu.» 6Kɔ asom aŋɛ ŋawur ŋackɔt sədare, ŋacdəŋk Toloku tɔtɔt ta Kanu, ŋactaməs acuy mofo fəp.

Pəciyanɛ pa Herodu

MAT 14.1-12; MARK 6.14-29

7Herodu, nwɛ ɛnatɔmpər dɛbɛ da sədare sa Kalile mɔ, ntɛ ene mes mmɛ menccepər mɔ, kɔ pənciyanɛ kɔ, bawo alɔma ŋancloku a Yesu, Saŋ ɔfɔ, nkɔn ɔfɔtɛ afi dacɔ. 8Alɔma ŋacloku a Eli oluksərnɛ kəder, alɔma ŋacloku, a wədəŋk wəka Kanu nwɛ ɛnayi tɛm towonu mɔ ɔfɔtɛ afi dacɔ k'ender. 9Kɔ Herodu nkɔn oloku: «Inagbinti Saŋ domp! An'ɔyɔnɛ fum wəkawɛ aŋloku tetɔn mɔ-ɛ?» Kɔ Herodu ɛfaŋ kənəŋk kɔ.

Yesu kəsɔŋɛ ka afum wul kəcamət (5.000) kənɛmbərɛ

MAT 14.13-21; MARK 6.30-34; ISAŊ 6.1-14

10Kɔ asom ŋander ŋaluksɛ Yesu tɔkɔ ŋanayɔ mɔ fəp. Kɔ Yesu ɛlɛk ŋa kɔ ŋawurnɛ kəsək, ntende dare da Bɛtsayida. 11Kɔ afum ŋancərɛ kəwur kəŋan kɔ ŋancɛpsɛ ŋa darəŋ. Kɔ Yesu owosɛ ŋa kəder, k'ɔŋkɔ pəcloku ŋa teta dɛbɛ da Kanu, k'ɛntaməs sɔ aŋɛ ŋanatɔtamnɛ mɔ. 12Ntɛ dec dɛncləpɛ mɔ, kɔ acɛpsɛ ɔn ŋalɔtərnɛ kɔ ŋacloku: «Məyɔ oŋ məsak afum akaŋɛ ŋakɔ ŋatɛn dəkədirɛ kɔ yeri nde sədare səcsək kɔ dəmadare mɛfɛt mɛfɛt mmɛ mɛŋkɛl nnɔ mɔ, bawo dətɛgbərɛ ayi tantɛ.» 13Mba kɔ Yesu oloku ŋa: «Nəsɔŋ ŋa nənasərka yeri.» Kɔ acɛpsɛ ɔn ŋayif kɔ: «Cəcom kəcamət kɔ lop mɛrəŋ gbəcərəm yɔ səyɔ, məfaŋ oŋ a səkɔ səwayɛ kənay kaŋkɛ yeri ba?» 14Arkun aŋɛ ŋancbəp arkun wul kəcamət (5.000). Kɔ Yesu oloku Asom ɔn: «Nəyɔ ŋa ŋaloŋkanɛ arkun wəco kəcamət wəco kəcamət (50-50).» 15Kɔ asom ɔn ŋayɔ tɔkɔ Yesu ɛnaloku ŋa kəyɔ mɔ, kɔ ŋandəs ŋa fəp. 16Kɔ Yesu ɛlɛk cəcom ncɛ kəcamət kɔ lop nyɛ mɛrəŋ, k'eyekti fɔr darenc, k'eyif Kanu barka. Kɔ tɛyɛfɛ dənda k'entepi cəcom ncɛ a k'endesɔŋəs ci acɛpsɛ a ŋayerəs kənay kaŋkɔ. 17Kɔ fəp fəsɔm ci kɔ ŋanɛmbərɛ. Ntɛ anawɛtəs yeri yɛləpəs nyɛ mɔ, yɛnayɔ cəfala wəco kɔ mɛrəŋ.

Piyɛr oloku a Yesu ɔyɔnɛ nwɛ Kanu kəyɛk-yɛk mɔ

MAT 16.13-19; MARK 8.27-29

18Dɔsɔk dɔlɔma Yesu pəctola Kanu taciŋa, acɛpsɛ ɔn darəŋ ŋaloŋkanɛ kɔ kəsək. Kɔ Yesu eyif ŋa: «Toloku ta kənay k'afum, an'iyɔnɛ-ɛ?» 19K'acɛpsɛ ɔn darəŋ ŋaloku kɔ: «Ntɛ alɔma ŋaloku mɔ, a Saŋ Batis məyɔnɛ, k'alɔma ŋaloku a Eli məyɔnɛ, alɔma a wədəŋk wəka Kanu wəka tɛm towonu məyɔnɛ nwɛ ɔfɔtɛ afi dacɔ mɔ.» 20Kɔ Yesu eyif ŋa sɔ: «A nəna, an'iyɔnɛ-ɛ?» Kɔ Piyɛr oloku Yesu: «Krist wəyɛk-yɛk wəka Kanu məyɔnɛ.»

Yesu kəcam defi dɔn kɔ kədeyɛfɛ kɔn afi dacɔ

MAT 16.20-28; MARK 8.30-9.1

21Kɔ Yesu entiŋ-tiŋ ŋa kəcaŋkɛ ti, ta ŋaloku ti ali fum. 22K'ɔnɔcər a mɛnɛ patɔrəs Wan ka Wərkun pəlarəm. Abeki, aloŋnɛ apɔŋ kɔ atəksɛ sariyɛ s'aSuyif ŋawɛnəs kɔ, padif kɔ, pəfɔtɛ afi dacɔ tataka ta maas.

23K'oloku afum fəp ntɛ: «Kɔ fum ɛfaŋ kəcɛps'em darəŋ-ɛ, wəkayi pəsak kəcɛm-cɛmnɛ teta nkɔnsərka, pəwosɛ kətɔrəs kɔ kəfi dɔsɔk o dɔsɔk, pəcəm'em darəŋ. 24Bawo, nwɛ o nwɛ ɛŋsɛp kəyac kəyi kɔn doru mɔ, kəndesalpər kɔ, mba nwɛ o nwɛ kiyi kɔn doru kəŋsalpər kɔ tetem mɔ, endeyac ki. 25Dəkəcəmɛ dere dɔ tɔyɔ fum kəsɔtɔ kɔn doru fəp-ɛ, kɔ pəyɔnɛ a wəkayi eyi kəsɔlɛ kɔ pəyɔnɛ fɛ ti wəkayi pəcləsərnɛ-ɛ? 26Nwɛ o nwɛ ɛlapərnɛ teta ina kɔ moloku mem-ɛ, Wan ka Wərkun endekɔsɔdəmnɛ lapərnɛ məna wəkayi k'endeder nɔrɔ da debeki dɔn, da Kas, kɔ da mɛlɛkɛ mecempi-ɛ. 27Icloku nu kance: Afum akin akin ŋayi nnɔ kəfo kaŋkɛ aŋɛ ŋantɔdefi ta ŋantanəŋk kəder ka dɛbɛ da Kanu-ɛ.»

Piyɛr, Isaŋ kɔ Sak ŋanəŋk Yesu pəyi nɔrɔ da debeki da Kanu disrɛ

MAT 17.1-8; MARK 9.2-8

28Ntɛ Yesu oloku moloku mamɔkɔ mɔ, kɔ mata camət-maas mencepər, k'ɛlɛk Piyɛr, Isaŋ kɔ Sak, kɔ ŋampɛ tɔrɔ kəroŋ kəkɔtola Kanu. 29Yesu eyi kətola Kanu, kɔ kəro kɔn kɛsəkpər, kɔ yamos yɔn yɛnaŋkanɛ kəferɛ yocmotər-motər. 30Gbəncana babɔkɔ kɔ afum mɛrəŋ ŋayɛfɛ kəlok-loku kɔ nkɔn: Aŋnabi Musa kɔ Aŋnabi Eli ŋanayi, 31aŋɛ ancnəŋk nɔrɔ da debeki da Kanu disrɛ mɔ. Ŋacloku Yesu kəkɔ kɔn nkɛ kəŋkɔyi Yerusalɛm mɔ. 32Tɛtəŋnɛ Piyɛr k'asol ɔn ŋacdirɛ pəpɔŋ. Ntɛ ŋantimɛ mɔ, kɔ ŋanəŋk Yesu pəmot pa debeki da Kanu disrɛ, kɔ afum mɛrəŋ akɔ ŋanacəmɛ kɔ nkɔn mɔ. 33Tɛm ntɛ afum akakɔ mɛrəŋ ŋancgbɛyɛnɛ kɔ Yesu mɔ, kɔ Piyɛr oloku kɔ: «Wətəksɛ pəntesɛ su kəyi nnɔ. Səcəmbər cəlɛŋgbɛ maas: Kin kam, kin ka Musa, kɔ kin ka Eli.» Piyɛr ɛnacərɛ fɛ ntɛ oloku mɔ. 34Ntɛ oncloku tatɔkɔ mɔ, kɔ kəp kənder kəgbəpərnɛ ŋa kɔ kənesɛ kəsumpər acɛpsɛ a Yesu darəŋ ntɛ ŋananəŋk kəp kaŋkɔ kəcder kəgbəpərnɛ ŋa mɔ. 35Kɔ dim dowur kəp kaŋkɔ disrɛ, docloku: «Wəkawɛ ɔyɔnɛ wan kem, nkɔn iyɛk-yɛk: Nəcəŋkəl kɔ!» 36Ntɛ ane dim dadɔkɔ mɔ, k'anəŋk Yesu pəcəmɛ sona. K'acɛpsɛ a Yesu darəŋ ŋancaŋk ali fum ɛnaloku fɛ sɔ wəkos tɔlɔma ntɛ ɛnəŋk mata mamɔkɔ mɔ.

Yesu kətaməs ka wan nwɛ ŋɔŋk ŋɛlɛc ŋɛnatoŋkulu-toŋkulu

MAT 17.14-18; MARK 9.14-27

37Dɔckɔsɔk ntɛ ŋantor kəyɛfɛ dətɔrɔ mɔ, kɔ kənay k'afum alarəm ŋander kədefaynɛ Yesu. 38Kɔ fum wəlɔma oŋkulərnɛ kənay kaŋkɔ dacɔ: «Wətəksɛ, ilɛtsɛn'am məmɔmən wan kem, bawo wəkin wəkawɛ gboŋ iyɔ. 39Ŋɔŋk ŋɛlɛc ŋɔlɔma ŋɛmbɛrɛ kɔ, kɔ ŋɔsɔŋɛ kɔ kəkulɛ-kulɛ gbəncana babɔkɔ, kɔ ŋeyikəc kɔ pəpɔŋ, kɔ ŋɔsɔŋɛ kɔ kəfoc kəwur kɔ dəkusu, kɔ ŋɔlɔləs kɔ dis, pəŋyeŋk a ŋendesak kɔ. 40Ilɛtsɛnɛ acɛpsɛ am darəŋ kəbɛləs ka ŋi, mba ŋantam fɛ ti.» 41Kɔ Yesu oŋkulərnɛ: «Nəna dɛtɛmp dɛkafəlɛ-kafəlɛ dɔtɔlaŋ Kanu, ake tɛm t'indesɔyi kɔ nəna-ɛ? Iyi nu kəsək haŋ tɛm tere-ɛ? Məkɛrɛ wan kam nnɔ.» 42Ntɛ wan wəkakɔ ɔnclɔtərnɛ Yesu mɔ, kɔ ŋɔŋk ŋɛlɛc ŋɛŋgbal kɔ dəntɔf kɔ ŋeyikəc kɔ pəpɔŋ. Mba kɔ Yesu ɛŋgbəŋ-gbəŋər ŋɔŋk ŋɛlɛc ŋaŋɔkɔ, k'ɛntaməs wan wəkakɔ, k'ɔsɔŋ kɔ kas. 43Kɔ cusu cəwos afum fəp kənəŋk ka fənɔntər fəpɔŋ fa Kanu.

Yesu kəgbɔkərɛ kɔn kəloku defi dɔn

MAT 17.22-23; MARK 9.30-32

Ntɛ mes mamɔkɔ Yesu ɔncyɔ mɔ mencciyanɛ afum mɔ, k'oloku acɛpsɛ ɔn darəŋ: 44«Nəna nəsu ləŋəs, nəcəŋkəl belbel moloku mamɛ: Kəbɛr k'ander Wan ka Wərkun afum dəwaca.» 45Mba toloku tatɔkɔ tɛnasɔkər fɛ acɛpsɛ ɔn darəŋ, tɛnagbɔpnɛ ŋa, ntɛ tɔŋsɔŋɛ ta ŋancərɛ ti mɔ. Kɔ ŋanesɛ kəyifət Yesu tedisrɛ ta toloku tatɔkɔ.

An'ecepər nu fəp-ɛ?

MAT 18.1-5; MARK 9.33-37

46K'acɛpsɛ ɔn darəŋ ŋayɛfɛ kəyifətɛnɛ ntɛ tɔŋsɔŋɛ ŋacərɛ nwɛ ɛmbɛk dəkəcəmɛ mɔ. 47Yesu nwɛ ɛnacərɛ mɛcɛmcɛmnɛ mmɛ meyi ŋa dəcor mɔ, ɛlɛk wan wəfɛt wəkin, k'ɛncəmbərərnɛ kɔ. 48Kɔ Yesu oloku ŋa: «Nwɛ o nwɛ ɛbaŋ wanfɛt wəkawɛ kəbaŋ kətɔt tetem mɔ, ɛmbaŋ sɔ inasərka pətɔt. Nwɛ o nwɛ ɛbaŋ im, ɛmbaŋ sɔ wəkɔ osom im mɔ. Bawo fum wəkɔ ɛncəmbərnɛ dəkəcəmɛ dɛfɛt mɔ, ɔyɔnɛ wəkɔ encepər nu fəp dəkəcəmɛ mɔ.»

Nwɛ ɔntɔc'am mɔ, ɛfaŋ əm

MARK 9.38-40

49Kɔ Isaŋ ɛlɛk moloku k'oloku: «Wətəksɛ, sənəŋk fum wəlɔma pəcbɛlsɛ yɔŋk yɛlɛc tewe tam, kɔ səsɛp kəmɔnɛ kɔ ti, bawo wəkayi ɛncəmɛ f'am darəŋ pəmɔ səna.» 50Kɔ Yesu oluksɛ moloku: «Ta nəmɔnɛ kɔ ti, bawo fum nwɛ ɔntɔc'am mɔ, wəkayi ɛfaŋ əm.»

Dare dɔlɔma da Samari kəfati kəbaŋ ka Yesu

51Ntɛ dɔsɔk dɛlɛk da Yesu doru dɔnclɔtəs mɔ, k'olokunɛ a mɛnɛ pəkɔ Yerusalɛm gbɛs. 52K'osom afum alɔma ŋayi kɔ kiriŋ. Kɔ akakɔ ŋayi kiriŋ kɔ ŋaŋkɔ ŋabəp dare da Samari dɔlɔma, ntɛ tɔŋsɔŋɛ ŋalompəsnɛnɛ kɔ mɔ. 53Mba kɔ aka dare dadɔkɔ ŋafati kəbaŋ kɔ, bawo Yerusalɛm ŋanckɔ. 54Ntɛ afum aŋɛ ŋanəŋk ti mɔ, acɛpsɛ a Yesu darəŋ, Isaŋ kɔ Sak ŋaloku: «Mariki, məfaŋ səloku nɛnc dotor kəyɛfɛ dəkɔm dɛləsər ŋa ba?» 55Kɔ Yesu ɛŋkafəlɛ k'ɛntɛfərnɛ ŋa, k'ɛgbəŋ-gbəŋər ŋa. 56Kɔ ŋayɛfɛ kɔ ŋaŋkɔ dare dɔlɔma.

Aŋɛ ŋafaŋ kəcəmɛ Yesu darəŋ mɔ

MAT 8.19-22

57Ntɛ ŋanayi dɔpɔ kəkɔ mɔ, kɔ fum wəlɔma oloku kɔ: «Indecəm'am darəŋ nnɔ o nnɔ məndekɔ mɔ.» 58Kɔ Yesu oloku kɔ: «Mɔsɔŋk mɔyɔ bi dəkədirɛ kɔ bɛmp yɔyɔ wɔlɔ dəkədirɛ, mba ina Wan ka Wərkun iyɔ fɛ kəfo nkɛ intam kəboc domp dem mɔ.» 59Kɔ Yesu oloku fum wəlɔma: «Məcəm'em darəŋ.» Kɔ fum wəkakɔ oloku kɔ: «Mariki, məwos'em krɛsna ikɔ iwup papa kem.» 60Kɔ Yesu oloku fum wəkakɔ: «Məce afi ŋawup afi, kɔ məna, məkɔ mədəŋk dɛbɛ da Kanu.»

61Kɔ fum wəlɔma oloku: «Kəcəm'am k'inder darəŋ, Mariki, mba məkar ikɔ krɛsna ilembərnɛ aka kəlɔ kem disrɛ.» 62Kɔ Yesu oloku kɔ: «Nwɛ o nwɛ edebiftɛ cəna a wəkayi pəcmɔmən tadarəŋ mɔ, ɔyɔ fɛ dəkəcəmɛ akip ŋa dɛbɛ da Kanu dəntɔf.»