Skip to content
BibleKenya
MSY2020 Akar Mogomem 16 Verse

Godɨn Eghaghanim: Akar Gavgavir Dɨkɨrɨzir Ghurim ko Igiam

Akar Mogomem 16

Enselba Godɨn anɨngagharir 7plan itaribar itiba nguazim ginge

1

Ezɨ kɨ tiarir ekiar mam barazi, a Godɨn Dɨpenimɨn otogha kamaghɨn 7plan enselbav gei, “Ia Godɨn anɨngagharir arazir 7plan itaribar itiba inigh mangɨ nguazimɨn da ingɨ.” 2

Ezɨ enselɨn faragha zuim, uan itarir Godɨn anɨngagharim izɨvazim inigha ghua nguazimɨn a inge, ezɨ duar bar igharagha garir kurar gavgaviba, gumazamizir asɨzir atiamɨn namba itiba ko an marvir guamɨn ziam feba, men mɨkarzibar otifi. 3

Ezɨ namba 2 ensel uan itarim ongarim gingezɨ, ongarim gumazir aremezir kuamɨn ghuzimɨn mɨn oto. Ezɨ bizir angamɨra an itiba, da bar ariaghire. 4

Ezɨ namba 3 ensel uan itarim faneba ko dɨpar atuibagh inge. Ezɨ dɨpar kaba bar moghɨra ghuzimɨn mɨn oto. 5Ezɨ kɨ orazi, enselɨn dɨpabar garim kamaghɨn mɨgei:

“God, nɨ datɨrɨghɨn ikia, egha uaghan faragha ike.

Nɨ Godɨn Bar Zuezim.

Nɨn araziba bar derazɨ

arazir kuratam nɨn itir puvatɨ.

Nɨ gumazamizibar arazir kuraba tuisɨgha

da ikarvagha ivezir kuram me ganɨngi,

ezɨ nɨn arazir kam

a guizɨn arazim. 6

Gumazir kaba nɨn akam inigha izir gumazamiziba ko nɨn gumazamizibav soghezɨ

men ghuziba irezɨ me ariaghire.

Ezɨ nɨ ghuzim gumazir kurar kabagh anɨngizɨ,

me aneremam.

Ghuzir me apir kam,

men arazir kurar me amiziba ikarvagham.” 7

Ezɨ kɨ orazi tiarir mam Godɨn ofa gamir dakozimɨn aven otogha pamten diagha ghaze:

“Ekiam, nɨ Godɨn Gavgaviba Bar Itim.

Nɨ kotɨn gumazamizibar araziba bar guizbangɨra da tuisɨsi,

ezɨ nɨn kotiam a bar guizbangɨra ghua

egha bar dera.” 8

Ezɨ namba 4 ensel uan itarim aruem ginge, ezɨ God aruemɨn amamangatɨzɨ an avim pamten isia puvɨra gumazamizibar isi. 9Aruemɨn avir gavgavir kam bar puvɨra isia, egha puvɨra gumazamizir kabar mɨkarzibar isi. Ezɨ me bar puvɨra Godɨn ziam gasɨghasɨgha a mɨgei, kar bizir kurar kabar garir Godɨn gavgavim itim. Egha me uan navibagh iragha an ziam fer puvatɨ. 10

Ezɨ enselɨn namba 5 uan itarim asɨzir atiamɨn atrivir dabirabim ginge. Ezɨ mɨtatem gumazamizir an gavgavimɨn apengan itiba avara. Ezɨ me uan duaba ko mɨzazir men mɨkarzibar otiviba bagha nɨghnɨgha, Godɨn uan Nguibamɨn itimɨn ziam gasɨghasɨgha mɨgei. Ezɨ mɨzazir me isim a bar men ikufi, kamaghɨn amizɨ me uan mɨzebagh ivi. Egha me uan arazir kurar me amiba bagha uan navibagh irazir puvatɨ. 11

Ezɨ enselɨn namba 6 uan itarim Yufretisɨn Faner ekiam ginge. Ezɨ an dɨpam bar moghɨra dake, egha aruem anadi naghɨn atrivir izamiba bagha tuavim atɨ. 12Ezɨ kɨ gari, duar kurar 3plan mɨtivibar mɨn gariba, da asɨzir atiam ko, kuruzir ekiam ko akar ifavariba akurir gumazim, da vaghvagha men akatoribar otifi.13 14Duar bar kurar kaba arazarazir igharagha garibagh ami da otiva, nguazimɨn itir kantriba bar dar atriviba bagha, tintinibar zui. Me atrivibar amutɨ me uan mɨdorozir gumaziba inigh izɨ me akuvasa. Eghtɨ Godɨn Gavgaviba Bar Itim gumazamiziba tuisɨghamin dughiar ekiamɨn, me mɨdorozim damuam. 15

“Ia orakigh! Kɨ, okɨmakɨar gumazimɨn mɨn izam, a izir dughiam ia a gɨfozir puvatɨzɨ moghɨn, kɨ zuamɨra otogham. Kamagh amizɨ, gumazim akuir puvatɨgha, uan korotiaba uabɨn boroghɨn da arɨsi, a bibiamra daruan kogham, eghtɨ gumazamiziba an gantɨ, an aghumsɨghan kogham. Kamaghɨn amizɨ, gumazir kam bar akongegh.”16 17

Ezɨ duar kuraba atriviba inigha iza danganir kamɨn me akufa, me Hibrun akamɨn kamaghɨn danganir kam dɨbori, Armagedon.18 19

Ezɨ namba 7 ensel uan itarim overiamɨn a inge. Ezɨ Godɨn Dɨpenimɨn aven tiarir ekiar mam Godɨn atrivir dabirabimɨn otogha kamaghɨn pamten mɨgei, “Biziba bar gɨfa.” 20Ezɨ overiamɨn onɨmariba taghtagha zuima, nɨgɨnir dafam overiamɨn otozɨ, arariba dagarvasi, ezɨ mɨkɨmkɨzir ekiam oto. Kar mɨkɨmkɨzir bar ekiam, fomɨra gumazamiziba otozir dughiamɨn iza datɨrɨghɨn tu, mɨkɨmkɨzir ekiar kamagh garitam fomɨra otozir puvatɨ. 21Ezɨ Babilonɨn nguibar ekiam bɨaghiregha 3plan okoruabar otifi, ezɨ gumazamizibar nguibaba bar moghɨra ikufi. God Babilonɨn nguibar ekiamɨn arazir kuram gɨnɨghnɨgha, egha a gamizɨ a uan wainɨn kap bar aneme, kar Godɨn anɨngagharir arazimɨn wainɨn kap. 22Ezɨ arighatɨziba bar arav ghue, ezɨ mɨghsɨatam ua itir puvatɨ. 23Amozir ofɨzir ekiaba dagɨabar mɨn izaghiri. Ezɨ amozir ofɨzir dagɨar kaba vaghvagha, dar osɨmtɨziba 50 kilogremɨn iti. Amozir dagɨar kaba overiamɨn izaghira gumazamizibagh isɨn ira bar me gasɨghasɨsi. Ezɨ bizir kurar kam bagha me Godɨn ziam gasɨghasɨgha mɨgei.

Source notes (23)
  1. Cross-reference Onger Akaba 69:24; Jeremaia 10:25; Esekiel 22:31; Sefanaia 3:8; Akar Mogomem 14:10; 15:1; 15:7; 16:17
  2. Cross-reference Ua Me Ini 9:10; Godɨn Araziba 28:35; Akar Mogomem 8:7; 13:12-17
  3. Cross-reference Ua Me Ini 7:17-21; Akar Mogomem 8:8-9
  4. Cross-reference Ua Me Ini 7:17-21; Onger Akaba 78:44; Akar Mogomem 8:10
  5. Cross-reference Onger Akaba 119:137; Akar Mogomem 1:4; 1:8; 11:17; 15:3
  6. Cross-reference Onger Akaba 79:3; Aisaia 49:26; Matyu 23:34-35; Akar Mogomem 11:18; 13:15; 18:20
  7. Cross-reference Onger Akaba 19:9; Akar Mogomem 15:3; 19:2
  8. Cross-reference Akar Mogomem 8:12; 14:18
  9. Cross-reference Daniel 5:22-23; Akar Mogomem 9:20-21; 11:13; 16:21
  10. Cross-reference Ua Me Ini 10:21-22; Aisaia 8:22; Akar Mogomem 9:2; 9:20-21; 11:10; 13:2; 16:21
  11. Cross-reference Aisaia 11:15; 41:2; 41:25; Jeremaia 50:38; Akar Mogomem 9:14
  12. Cross-reference 1 Jon 4:1-3; Akar Mogomem 12:3; 12:9; 19:20; 20:10
  13. Footnote Akar ifavariba akurir gumazim, an asɨzir atiar namba 2ɨn ababanim. A faragha itir asɨzir atiamɨn akar ifavariba akurir gumazim. A gumazamizibav geima, me asɨzir atiar faragh itimɨn marvir guamɨn ziam fe. Nɨ Akar Mogomem 13:11-16ɨn gan.
  14. Cross-reference 2 Tesalonika 2:9; 1 Timoti 4:1; Jems 3:15; Akar Mogomem 17:14; 19:15; 19:19-20
  15. Cross-reference Matyu 24:43-44; Luk 12:39-40; 2 Korin 5:3; 1 Tesalonika 5:2; 2 Pita 3:10; Akar Mogomem 3:3; 3:18
  16. Footnote Ves 15ɨn kam, kar Krais Iesus uabɨ mɨkemezir akam.
  17. Cross-reference Gumazir Dapaniba 5:19; Sekaraia 12:11; Akar Mogomem 19:19
  18. Footnote Ziar kam Armagedon kamakɨn, “Megidon Mɨghsɨam.” Fomɨra apaniba Israelia ko uariv sogha egha Atrivim Josaia mɨsoghezɨ an areme. Me Megidon nguibar ekiamɨn boroghɨra itima bizir kam oto. (Nɨ 2 Atriviba 23:29-30 ko 2 Eghaghaniba 35:20-24ɨn gan.) Kamaghɨn amizɨ, fofozir gumazir maba ghaze, ziar kam Megido bighavɨra mɨgeir puvatɨ. Me ghaze, an akar isɨn zuimɨn mɨdorozir gumaziba mangamin danganim mɨgei. Egh me mangɨ bar ikuvigh egh bar ovengam.
  19. Cross-reference Akar Mogomem 16:1
  20. Cross-reference Daniel 12:1; Akar Mogomem 4:5; 8:5; 11:13; 11:19
  21. Cross-reference Aisaia 51:17; Jeremaia 25:15-16; Akar Mogomem 14:8-10; 17:18; 18:5
  22. Cross-reference Akar Mogomem 6:14
  23. Cross-reference Ua Me Ini 9:23-24; Akar Mogomem 11:19; 16:9-11

Godɨn Eghaghanim: Akar Gavgavir Dɨkɨrɨzir Ghurim ko Igiam. Copyright © 2020 Pioneer Bible Translators. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.