Skip to content
BibleKenya
MSY2020 Akar Mogomem 11 Verse

Godɨn Eghaghanim: Akar Gavgavir Dɨkɨrɨzir Ghurim ko Igiam

Akar Mogomem 11

Godɨn akam inigha izir gumazir pumuning

1

Egha me aghorir bizibar abarim na ganɨngi, an aghorir suiagharuimɨn mɨn gari, egha me kamagh na mɨgei, “Nɨ dɨkavigh Godɨn Dɨpenim ko ofa gamir dakozimɨn apan. Egh nɨ dɨpenir kamɨn Godɨn ziam fer gumazamizibar dɨbobonim dɨpon. 2Egh nɨ Godɨn Dɨpenim okarizir danganir dɨvazir ekiamɨn aven itim, an apanan markɨ. God Kantrin Igharazibar Gumazamiziba danganir uari akuvir kam me ganɨngi. Eghtɨ marazi izɨ Jerusalem dɨkɨ mangɨ 42plan iakɨnibar tugham. Kamaghɨn amizɨ, nɨ anetakigh.3 4Eghtɨ kɨ uan akamɨn gun mɨkɨmamin gumazir pumuning amadagh gavgavim aning danightɨma, aning nan akam inigh mangam. Aning osɨmtɨzir korotiabar aghuighɨva, egh nan akam kun mangɨva, 1,260plan dughiabar tugham.” 5

Gumazir kamning mati olivɨn temer pumuning ko lamɨn pumuning nguazir kamɨn Ekiamɨn guamɨn tughav iti.6 7Eghtɨ gumazitam arazir kurabar aning damusɨ damutɨ, avim aningɨn akamningɨn otogh, bar aningɨn apanibar isigh me gasɨghasigham. Kamaghɨn amizɨ, gumazir manam arazir kuramɨn aning damusɨ, an ovegham. 8Aning overiamɨn aneghoroghamin gavgavim iti, egh aning Godɨn akamɨn gun mɨkɨmamin dughiamɨn, aning mɨkɨmtɨ, amozim dughiar kamɨn izan kogham. Eghtɨ aning dɨpabar amutɨ, da bar ghuzimɨn otivamin gavgavim iti. Aning uaghan bizir kurar igharazibar amutɨ, da nguazimɨn gumazamizibagh asɨghasɨghamim gavgavim iti. Dughiar kamɨn, aning bizir kabara amutɨ da aning ifongezɨ moghɨn otivam. 9

Aning Godɨn akamɨn gun mɨgeir ingangarim agɨvaghtɨ, mozir torir bar konezimɨn itir asɨzir atiam, a torim ategh anangam. Egh an aning ko mɨsoghɨva, aning abɨragh aning mɨsueghtɨ aning aremegham. 10Eghtɨ aningɨn kuamning nguibar ekiar kamɨn tuavir ekiamɨn irɨghɨv ikiam. E akar isɨn zuimɨn a dɨbora ghaze, Sodom o Isip. Nguibar kamra me fomɨra gumazir kamningɨn Ekiam, ter ighuvimɨn a gafugha a mɨsoghezɨ an areme. Gumazamizir mɨkarzir igharagha gariba, men marazi ko anababa bar, dar gumazamizir maba ko nguibabar akaba bar, dar gumazamizir maba ko kantriba bar, dar gumazamiziba, men marazi dughiar 3pla ko akuamɨn aningɨn kuamningɨn ganam. Egh aningɨn kuamning afan anogoregham. 11Nguazimɨn gumazamiziba kamaghɨn mɨkɨm suam, Godɨn akam inigha izir gumazir kamning, aning mɨzazir bar kuram nguazimɨn gumazamizibagh anɨngi. Kamaghɨn amizɨ, me bar aningɨn ovevem gifuegham, egh bar ighiabar amu, damɨva, egh bizir aghuiba uan namakabar anɨngam. 12

Ezɨ 3plan dughiaba ko dughiar akuar kam gɨvazɨ, God uam aning gamizɨma, aning ua dɨkavigha tughav iti, ezɨ gumazamizir aningɨn ganiziba bar atiatingi. 13Ezɨ aning orazi tiarir mam Godɨn Nguibamɨn kamaghɨn aning mɨgei, “Gua kagh anang.” Ezɨ aningɨn apaniba garavɨra itima, aning Godɨn Nguibamɨn ghuavanabo. 14

Ezɨ dughiar kamra mɨkɨmkɨzir dafam otozɨ, God nguibar ekiamɨn dɨpeniba 10plan okoruabar da tuirazɨ dar okoruar mam bar ikufi. Ezɨ 7,000plan gumazamiziba ariaghire, ezɨ ariaghirezir puvatɨziba ikia, bar atiatigha Godɨn uan Nguibamɨn itimɨn ziam fe. 15

Iavzika, ia orakigh! Osɨmtɨzir bar ekiar namba 2, a gɨfa. Ezɨ osɨmtɨzir bar ekiar namba 3, an otivasa bar roghɨra izi.

Enselɨn namba 7 uan sɨgham givi

16

Ezɨ enselɨn namba 7 uan sɨgham givima, Godɨn Nguibamɨn itir darazi tiariba akara ghaze:

“En Ekiam ko an Gumazir a Gumazamiziba Ua Me Iniasa Mɨsevezim,

aning datɨrɨghɨn nguazir kam gativagha an gari.

Egh aning atrivimɨn ikɨ

mamaghɨra ikiam.”17 18

Ezɨ 24plan gumazir dapanir Godɨn guamɨn uan atrivir dabirabibagh apiaziba, me teviba apɨrigha uan guaba nguazim mɨtuagha Godɨn ziam fe. 19Egha ghaze:

“Ekiam, nɨ Godɨn Gavgaviba Bar Itim.

Nɨ bar fomɨra ikia

egha iza datɨrɨghɨn uaghan iti.

Nɨ uan gavgavir ekiam inigha

egha datɨrɨghɨn atrivimɨn iti.

Kamaghɨn amizɨ, e nɨ mɨnabi. 20

Kantrin Igharazibar Gumazamiziba bar puvɨram atari,

ezɨ nɨn anɨngagharim otogha gɨfa.

God gumazamizir ovengeziba tuisɨghamin dughiam

otogha gɨfa.

Kar dughiar nɨn ingangarir gumazamizir nɨn akam inigha izeziba,

me uan ivezir aghuim iniamim.

Gumazamizir nɨn atiatia egha nɨn ziamɨn apengan itiba,

gumazamizir ziaba itiba ko ziaba puvatɨziba uakan.

Eghtɨ gumazamizir nguazimɨn itir gumazamizibagh asɨghasɨziba,

God uaghan me gasɨghasɨgham.” 21

24plan gumazir dapaniba mɨkemegha gɨvazɨma, Godɨn Dɨpenir an Nguibamɨn itim kuiaghirɨzɨma, me garima, Akar Dɨkɨrɨzir Gavgavim itir Boksiam Godɨn Dɨpenimɨn aven iti. Ezɨ overiamɨn onɨmariba taghtagha tintinibar zuima, nɨgɨnir dafam otozɨ, arariba dagarvasi, ezɨ mɨkɨmkɨzim otozɨ amozir ofɨzir ekiar dagɨabar mɨn gariba iri.

Source notes (21)
  1. Cross-reference Dɨboboniba 35:5; Esekiel 40:3; Sekaraia 2:1-2; Akar Mogomem 21:15
  2. Cross-reference Esekiel 40:17-20; Daniel 8:10; Luk 21:24; Akar Mogomem 12:6; 13:5
  3. Footnote Akar Mogomem 11:2ɨn faragha itir akam, nɨ Aposelbar Ingangaribar 21:30ɨn gan. Akar Mogomem 11:2ɨn akar igharazir kam, 42plan iakɨniba, da 1,260plan arueba, o 3plan azeniba gɨvazɨma uam akuam. Da 42plan iakɨniba ko magh ghue. Nɨ Daniel 7:25 ko 12:7ɨn gan. Nɨ akar Kantrin Igharazibar Gumazamiziba Jerusalem dɨkabɨrazimɨn gansɨva, Luk 21:24ɨn gan.
  4. Cross-reference Akar Mogomem 12:6; 19:10; 20:4
  5. Cross-reference Jeremaia 11:16; Sekaraia 4:11-14
  6. Footnote Nɨ Sekaraia 4:1-5, ko 4:10-14, ko Akar Mogomem 1:12ɨn gan.
  7. Cross-reference Ofa Gami 10:2; 2 Samuel 22:9; 2 Atriviba 1:10-12; Onger Akaba 97:3; Jeremaia 5:14; Hosea 6:5
  8. Cross-reference Ua Me Ini 7:17-19; 1 Samuel 4:8; 1 Atriviba 17:1
  9. Cross-reference Daniel 7:7; 7:21; Sekaraia 14:2; Luk 13:32; Akar Mogomem 9:2; 12:17; 13:1; 13:5-7; 13:11; 17:8
  10. Cross-reference Aisaia 1:9-10; Luk 13:34; Hibru 13:12; Akar Mogomem 14:8; 18:10; 18:24
  11. Cross-reference Akar Mogomem 12:12; 13:8; 16:10
  12. Cross-reference Esekiel 37:5-14; Akar Mogomem 11:9
  13. Cross-reference 2 Atriviba 2:1; 2:5-7; 2:11; Aisaia 14:13; Aposel 1:9; Akar Mogomem 12:5
  14. Cross-reference Akar Mogomem 6:12; 8:5; 14:7; 16:9; 16:18
  15. Cross-reference Akar Mogomem 8:13; 9:12; 15:1
  16. Cross-reference Ua Me Ini 15:18; Onger Akaba 10:16; Aisaia 27:13; Daniel 2:44; 7:14; 7:27; Obadia 1:21; Akar Mogomem 10:7; 12:10; 19:6
  17. Footnote Grighɨn akamɨn, Gumazir God Gumazamiziba Ua Me Iniasa Mɨsevezim, me kamaghɨn a dɨbora ghaze, Krais.
  18. Cross-reference Akar Mogomem 4:4; 4:10; 5:8; 19:4
  19. Cross-reference Akar Mogomem 1:4; 1:8; 4:8; 15:3; 16:5; 19:6
  20. Cross-reference Onger Akaba 2:1; 2:5; 46:6; 110:5; 115:13; Daniel 7:9-10; Rom 2:5; Akar Mogomem 6:10; 10:7; 13:10; 18:6; 19:5; 20:11-13
  21. Cross-reference Hibru 9:4; Akar Mogomem 8:5; 15:5; 15:8; 16:18; 16:21

Godɨn Eghaghanim: Akar Gavgavir Dɨkɨrɨzir Ghurim ko Igiam. Copyright © 2020 Pioneer Bible Translators. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.