Godɨn Eghaghanim: Akar Gavgavir Dɨkɨrɨzir Ghurim ko Igiam
Onger Akaba 93
God atrivimɨn iti
Ikiavɨra Itir God, an atrivimɨn ikia,
ziar bar ekiam ikia, gavgavir ekiam iti.
A nguazir kam gamizɨ,
a uan danganimra ikia
bar gavgavigha kamaghɨra iti. 1
O Ikiavɨra Itir God, biziba tɨghar otivam,
nɨ fomɨra ikia kamaghɨra iti.
Nɨ atrivimɨn ikia zurara ikia kamaghɨra iti.
Ikiavɨra Itir God, ongarir konim mɨghɨgha nɨga,
bar pamten dɨpɨra tɨngazi.
O Ikiavɨra Itir God, nɨn gavgavir ekiamɨn,
nɨn Nguibamɨn itir biziba, nɨ bar dagh ativagha dar gari.
Ongarim dɨpɨra nɨdir nɨgɨnim, a sufi.
Nɨn gavgavim a gafiragha bar ekefe. 2
Ikiavɨra Itir God, nɨn Akar Gavgaviba ikɨ kamaghɨra ikiam.
Nɨn Dɨpenim zurara zuegh kamaghɨra ikiam.
Bar guizbangɨra!
Source notes (2)
- Cross-reference Onger Akaba 45:6; 90:2; Azir Akam 5:19
- Cross-reference Onger Akaba 19:7; 29:2; 96:9; 1 Korin 3:17
Godɨn Eghaghanim: Akar Gavgavir Dɨkɨrɨzir Ghurim ko Igiam. Copyright © 2020 Pioneer Bible Translators. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.