Onger Akaba 57

Gumazim akurvazim bagha Godɨn azangsɨsi

Devit Solɨn aravghugha dagɨar torir mamɨn ikia ighiar kam osiri.

Gumazir ighiabar faragha zuim a gumazamizibav kɨmtɨ, me tiarir kamɨn gɨn mangɨ ighiar kam bangam, “Gumazitam gasɨghasɨghan markɨ.”

Onger akar kabar mam, me ziam Miktam, a garɨsi.

11

O God, nɨ nan apangkuvigh nan akuragh.

Kɨ nɨn boroghɨra ikia bar deragha iti,

mati tuarir nguziba uan amebamɨn avɨzibar apengan modoghav ikia deraghavɨra iti.

Kɨ kamaghɨra deravɨra ikɨ mangɨtɨ, bizir na gasɨghasɨghamin kaba mangɨ gɨvagham. 22

Godɨn Bar Pɨn Itim, a God,

kɨ uabɨn akurvaghasa an dei.

Bizir kɨ oteveziba,

a bar ada isa na ganɨdi.

3God uan Nguibamɨn iti, ezɨ kɨ a ko mɨgeir mɨgɨrɨgɨaba,

a da baregh nan akuragh ua na iniam.

A gumazir na gasɨghasɨghamba abɨnigh egh ua na iniam.

(Ighiam gamua an suiam // atugha avughsegha ua // ighiam gami.)

God bar nan apangkuvigha mɨkemezɨ moghɨra,

a zurara uan akamɨn gɨn ghua bizibagh ami. 43

Nan apaniba bar na okarizɨ kɨ men torimɨn akui.

Me laionbar mɨn gumazibar amasa men atariba baribar mɨn bar ghumi.

Ezɨ men mɨzeba sabar ghumtɨzir pumuning itimɨn mɨn bar ghumi.

5O God, nɨ overiamɨn uan gavgavim akaghtɨ,

nguazimɨn gumazamiziba ganigh fogh suam,

nɨn gavgavim bar ekevegha me gafiragha pɨn iti.

6Nan apaniba nan suighasa na bagha ivem agura.

Mati gumazim asɨzir atiamɨn suighasa azuazim agura.

Kɨ magɨramin mozim, me tuavir kɨ zuimɨn an okorezɨ osɨmtɨzir ekiam nan iti.

Ezɨ puvatɨ, me atamakuigha uari torir kam giraghue.

(Ighiam gamua an suiam // atugha avughsegha ua // ighiam gami.) 74

O God, kɨ uan navir averiamɨn nɨghnɨzir gavgavimra nɨn ikia,

egha nɨghnɨzir igharaziba ua nan puvatɨ.

Kɨ gitabav sogh

nɨn ziam famin ighiabar amuasa.

8Kɨ daguim ategh dɨkavigh uan gita ko kulele mɨsogham.

Eghtɨ dar ararer aghuim otivtɨ aruem bigh anangam.

9O Ekiam, kɨ Kantrin Igharazibar Gumazamizibar tongɨn nɨ mɨnamam.

Gumazamiziba bar moghɨra oraghtɨ,

kɨ nɨn ziam fɨ ighiam bangam. 105

Kɨ fo, nɨ en apangkuvir arazim, a bar ekefe,

egha overiamɨn ababanimɨn tu.

Nɨ zurara amir arazir aghuir kaba

e da meng mangɨtɨ,

da mangɨ overiamɨn ghuariabar suiragham.

11O God, nɨ overiamɨn uan gavgavim akagh.

Eghtɨ nguazimɨn gumazamiziba ganigh fogh suam,

nɨn gavgavim bar ekevegha me gafiragha pɨn iti.