Onger Akaba 47

God gumazamiziba bar men atrivimɨn iti

Kar Koran adarazir onger akam.

Kar gumazir onger akar kamɨn faragha zuimɨn onger akam.

1Ia gumazamiziba bar, ia God bagh bar akongegh,

egh uan dafaribav sogh pamtem dɨmɨva

onger akabar amuva an ziam fɨ.

2Ikiavɨra Itir God, a Godɨn Bar Pɨn Itim,

an atrivir ekiamɨn ikia nguazir kam gativagha an gari.

Kamaghɨn amizɨ, e bar an atiatiava an apengan iti.

3God ikɨzir igharaziba bar me abɨrazɨ, e me gatifa.

A Kantrin Igharazibar Gumazamizibagh amizɨ, me en apengan iti.

4E Jekopɨn ovavir boriba, ezɨ God bar e gifonge.

God Kenanɨn nguazim e bagh a ginabagha,

a isa e ganɨngi.

(Ighiam gamua an suiam // atugha avughsegha ua // ighiam gami.)

5God uan Nguibamɨn ghuavanangamin dughiamɨn,

gumazamiziba bar akuegha tiariba akari,

ezɨ sɨghabagh ivir gumaziba dagh ivi.

6E God bagh ongɨva an ziam fam!

A en atrivim, e a bagh ighiabar amuva

ziar ekiam a danɨngam!

7God, a nguazimɨn itir gumazamiziba bar men atrivim.

E a bagh ongɨva an ziam fam!

8God uan atrivir dabirabim gaperagha,

nguazir kamɨn itir kantriba bar dagh ativagha dar gari.

9Gumazamizibar gumazir dapaniba,

me Abrahamɨn Godɨn gɨn zuir gumazamiziba ko uari akuvagh ikiam.

Nguazimɨn itir atriviba bar men mɨdorozir gumazibar oraba, da bar Godɨn biziba.

Eghtɨ me bar an ziam fam!