Onger Akaba 111

Godɨn ziam fer ighiam

1E Ikiavɨra Itir Godɨn ziam fam.

Gumazamizir God baghavɨra itiba,

me uari akuvamin dughiam,

kɨ men tongɨn ikɨva, uan navir averiamɨn aven nɨghnɨzir vamɨra ikɨva

Ikiavɨra Itir God mɨnamam.

2Ikiavɨra Itir God amir biziba, da bar bizir bar aghuiba.

Gumazamizir Ikiavɨra Itir God, bar a gɨfofoghasa ifongeziba,

me an ingangariba bar deragh dagh fogham.

3Bizir an amiba, e dar gara

an ziar ekiam fa egha fo,

an atrivir gavgavir ekiam a bar dera.

An arazir aghuir kam zurara ikɨvɨra ikɨ

mamaghɨra ikiam.

4Ikiavɨra Itir God zurara gumazamizibar nɨghnɨzibagh amima,

me zuraram an amir dɨgavir kuram gamir arazibagh nɨghnɨghvɨra iti.

Ikiavɨra Itir God en apangkuva en akurvasi.

5A gumazamizir an atiatiba, a dagheba me ganɨdi.

Egha a uan Akar Gavgavir a gumazamiziba ko dɨkɨrɨzir kam,

a zuraram a gɨnɨghnɨsi.

6A uan gavgavim uan gumazamizibar akagha

Kantrin Igharazibar Gumazamizibar nguaziba isa

uan gumazamizibagh anɨngi.

7An araziba, da bar guizbangɨra egha bar dera.

E an Akar Gavgaviba nɨghnɨzir gavgavim adar ikɨ

egh dar gɨn mangam.

8God Akar Gavgavir kaba e ganɨga ghaze,

da gavgavigh ikɨ mamaghɨra ikiam.

Guizbangɨra, God guizɨn arazir aghuimɨn gɨn ghua

Akar Gavgavir kaba e ganɨngizɨ da bar dera.

9A ua uan gumazamizibagh ivezegha ua me ini.

Egha Akar Gavgavim me koma anekɨra ghaze,

Akar Dɨkɨrɨzir Gavgavir kam zurara ikɨ mamaghɨra ikiam.

Ikiavɨra Itir God, an arazir aghuibaram amua bar derazir God,

ezɨ gumazamiziba an ziar ekiam gɨnɨghnɨgha ghaze,

a bar pɨn kozɨ,

me an atiatia an apengan iti. 101

Gumazitam nɨghnɨzir aghuim inisɨ

a faragh Ikiavɨra Itir Godɨn atiating an apengan ikɨ.

Gumazamizir an Akar Gavgavibar gɨn zuiba,

me fofozir aghuiba ikiam.

Eghtɨ e an ziam fɨ ikɨ mamaghɨra ikiam.