Dɨboboniba

Israelian Dɨboboniba

O

Namba

Akar faragha zuim

Akɨnafarir kam, a Israelian darorir me Sainain Mɨghsɨam ategha ghua Moapɨn kantrin otozim, kar Kenanɨn nguazimɨn mɨtaghniam, nguazir God me danɨngasa akam akɨrizim a geghari. Me Sainain Mɨghsɨam ataghɨraghasava amima, Moses Israelian gumazamiziba bar me menge. Ezɨ gɨn me Moapɨn kantrin itima, a ua me menge. Kamaghɨn amizɨ, me ziam, “Dɨboboniba,” akɨnafarir kam gatɨ.

Israelia, me gumazamiziba puvatɨzir danganimɨn aven azenir avɨribar arui. Me faragha Kades Barnean nguibamɨn otifi, a Kenanɨn nguazimɨn sautɨn amadaghan iti. Me azenir avɨribar danganir kamɨn ike, egha me Kenanɨn nguazimɨn ghuezir puvatɨ. Egha gɨn me danganir kam ategha ghua Jordanɨn Fanemɨn, aruem anadi naghɨn otifi. Marazi bar nguazir otevir kam gapia, ezɨ marazi pura avughsegh Jordanɨn Fanem abigh nguazir God me bagha inabazir kam iniasa.

Akɨnafarir kam, Godɨn adarazir darorim geghari. Me dughiar avɨribar osei, egha osɨmtɨzibar dughiabar me atiati. Me dughiar avɨribar akɨriba igha Moses ko God gasi. Egha akɨnafarir kam uaghan God geghari. God Israelia ataghizir puvatɨ. Egha me atiatia arasava amima, God me ataghɨrazir puvatɨ. A me ko Akar Dɨkɨrɨzir Gavgavir amizir kam gɨnɨghnɨgha, uaghan fomɨra men ovaviba ko Akar Dɨkɨrɨzir Gavgavir amizir kam gɨnɨghnɨsi. God deraghavɨra men gara ghua an akar dɨkɨrɨzimɨn daghem guizɨn oto.