Apocalipsa 11

Doi Martiri

1Deapoea nji si deadi unã cãlami, tsi undzea ca unã bãstuni sh-nji dzãsi: “Scoalã-ti sh-misurã templul al Dumnidzãu sh-altarlu sh-numirã oaminjlji tsi s-alavdã pri nãsu. 2Ma uborlu di nafoarã a templui alasã nu l-misurã, cã si easti dat a pãngãnjilor sh-elji va lu calcã cu cicioari cãsãbãlu atsel sãmtu di patrudzãtsi doi di meshi.1 3Sh-mini va lã dau puteari atsilor doi martiri a melji sh-elji va prufitipseascã di unã njilji doauã suti shaidzãtsi di dzãli nviscuts cu sac.” 4Aeshti suntu atselji doi masnjilji sh-doauã shindãnjli, cai sta nãintea al Domnul a loclui.2 5Macã vãrã va s-lã zãrãseascã, dit gura a lor easi foc sh-lji astindzi dushmanjlji. Ashãtsi va si s-vatãmã tuts atselji cai vor s-lã facã zãrari a lor.3 6Aeshti au puteari si ncljidã tserlu, tra s-nu da ploai tu dzãlili a prufitipsiriljei a lor, tutashã au puteari pristi apili tra s-li toarnã tu sãndzi shi s-agudeascã loclu cu itsi soi di pleagã di cãti ori vor.4

7Cãndu s-bitiseascã mãrtiria a lor, agrul tsi s-alinã dit Ahãndamea, va s-facã alumtã cu nãshi, va lji azvingã sh-va lji vatãmã.5 8Cufumãli a lor va s-hibã zãcuti pri pada a marlui cãsãbã, cai sufliteashti s-acljima Sodom sh-Eghyptu, iu s-crutsisi sh-Domnul a lor.6 9Oaminjlji di populjilji, di soili, di limbili sh-di natsiunili va s-veadã cufumili a lor di trei dzãli giumitati sh-nu va s-alasã tsi cufumili a lor si s-bagã tu murmintu. 10Locuitorlji a loclui va s-hãrseascã trã elji sh-va si sãrbãtoreascã sh-va pitreacã doari la un-alantu, cã aeshti doi prufits lji munduirã atselji cai bãna pri loc.

11Ma dupã trei dzãli shi giumitati duhlu a banãljei di la Dumnidzãlu intrã tu nãshi, sh-elji stãturã pri cicioarili a lor, sh-unã fricã mari lji acãtsã atselji tsi videa.7 12Atumtsea elji avdzãrã unã boatsi analtã dit tser cai lã dzãsi a lor: “Alinats-vã aoa!” Sh-elji s-alinarã la tser tu nior, iarã neamitsilji a lor lã mutrea.8 13Tu atsea oarã s-featsi un cutrembur mari sh-unã a dzatsea parti a cãsãbãlui si surpã. Di cutremburlu s-vãtãmarã shapti njilji di oaminji, iarã alantsãlji s-lãhtãrsirã sh-alãvda Dumnidzãlu a tserlui.9 14Taxiratea a doaua tricu, ma ia, trãoarã yini taxiratea a treia.

Trumpeta a Shaptea

15Anghilu a shapti asunã trumpeta sh-tu tser s-avdzãrã boatsi mãri cai dzãtsea:

“Amirãriljea a lumiljei

s-featsi a Domnului a nostru

sh-a Hristolui a lui

sh-elu va domneascã

tu eta a etilor.”10

16Deapoea di patrusprãyinghits di aushi, tsi stãtea apunats pri thronurili a lor nãintea a Dumnidzãlui, cãdzurã pri dintsã sh-alãvdarã Dumnidzãlu, 17dzãcãnda:

“Ti hãristisim, Doamne, Dumnidzãlu Tutãputut,

tsi eshti, sh-tsi earai,

cã ai loat putearea a ta atsea marea

sh-ahurhish s-domneshti.11

18Natsiunili s-nãrãirã,

sh-vini nãrãirea a ta,

sh-chirolu trã giudicarea a mortsãlor

sh-trã dari arãsplata a sclayilor a tãlji, a-prufitsilor,

a sãmtsãlor sh-atsilor tsi au fricã di numa a ta,

njitslji sh-mãrlji,

shi s-dãrãnji atselji tsi aspargã loclu.”12

19Deapoea s-discljisi templul al Dumnidzãu tu tser shi s-vidzu arca a pisti-ligãturiljei a lui shi s-featsirã sfulguri, boatsi, bumbunidzãri, cutremburi sh-unã grãndinã mari.13