Uvreilji 9

Curbãnsita a Hristolui Easti Un sh-Perfectu

1Sigur cã sh-pisti-ligãtura di prota avea reguli ti huzmitipsirea dumnidzeascã sh-tenda sãmtã a loclui. 2Cã, s-etimãsi unã tendã, atsea di prota iu eara cum shindanlu, ashã sh-measa, sh-bãgarea a pãniljei nãinti. Aestã s-acljima “Loclu Sãmtu.” 3Sh-dupã velu a doaua eara unã tendã, atsea tsi s-acljima “Sãmta a Sãmtsãlor.” 4Aclo eara un altar di furii trã timeamã sh-arca a Pisti-ligãturiljei, anvãrligat di tuti pãrtsãli cu furii sh-tu cai eara un cupã di furii. Nãuntru avea manã sh-puleanlu al Aaron tsi avea nciulitã sh-tablili a pisti-ligãturiljei. 5Prisupru di Arcã eara heruvinjlji a Mãririljei, fãcãnda aumbrã la loclu a arãscumpãririljei. Trã aesti nu va zburãm tora detaliat.

6Tora hinda adrati ashãtsi aesti lucri, tu tenda atsea di prota intra dipriunã preftsãlji fãcãnda huzmitipsirili prifteshti. 7Tu tenda a doaua intra unã oarã ntru an mash arhipreftul, nu fãrã di sãndzi, cai u-adutsea ti elu sh-ti amãrtiili a popului cai li fãtsea di nishtirea. 8Duhlu Sãmtu nã spuni aestã: cã cala cãtrã Sãmta a Sãmtsãlor, ninga nu eara fãnurisit, iarã ma stãtea ninga la tenda atsea di prota. 9Atsea easti icoana di chirolu di tora sh-aspuni cã, doarili sh-curbãnjlji tsi aduc, nu pot s-facã perfectu conshtintsa atsilor cai facã huzmitipsirea dumnidzeascã. 10Atselji au s-facã mash cu mãcãri, cu biuturi, cu aspilari soi di soi sh-cu reguli di nafoarã a truplui, arãdãpsiti pãnã tu chirolu di un ordin ndreptu.

Sãndzili al Hristos

11Ma Hristolu cãndu vini ca arhipreftu a bunãtãtsilor tsi vinirã, prit unã tendã ma mari sh-ma perfectã, nu faptã cu mãna, va s-dzãcã nu aishtei fãpturi, 12sh-nu prit sãndzili a tsachilor sh-a yitsãljilor, ma prit sãndzili a lui, intrã unã oarã sh-ti totãna tu Sãmta a Sãmtsãlor amintãnda unã arãscumpãrari di daima. 13Cã, macã sãndzili a tsachilor sh-a dãmaljilor, sh-cinusha a unei yitsauã pruscuteashti atselji cai suntu lãvushitsi, lji sãmtsashti trã chischinipsirea a truplui, 14ahãntu ma multu sãndzili a Hristolui, cai prit Duhlu di daima s-curbãnsi ni fãrã amãrtii a Dumnidzãlui, va chischinipseadzã conshtintsa a voastrã di faptili atseali moarti trã huzmitipsirea a Dumnidzãlui atsilui yiu.

15Trã aestã elu easti misitlu a unei pisti-ligãturã noauã, cu nãeti cã, metsi undzi unã moarti trã arãscumpãrarea di cãlcãrili tsi s-featsirã tu pisti-ligãtura di prota, atselji acljimatslji s-ljea tãxirea a mushtiniriljei eternã. 16Cã aclo iu easti un testamentu, prindi s-alihipseascã moartea atsilui tsi featsi testamentul. 17Cã un testamentu easti axiu cãndu oaminjlji au moartã, cã nu ari fuchii cãndu ninga bãneadzã atsel tsi fatsi testamentul. 18Trã atsea sh-prota pisti-ligãturã nu s-alihipsi fãrã di sãndzi. 19Cã, cãndu s-dimãndarã a tut popului tuti ordinli di la Moisiu, luãnda sãndzili a yitsãljilor sh-a tsachilor, deadun cu apã sh-cu lãnã roshi apreasã sh-cu hisop, elu pruscuti sh-cartea sh-tut populu.1 20Ashãtsi elu dzãsi: “Aestu easti sãndzili a pisti-ligãturiljei, tsi ordinã trã voi Dumnidzãlu.”2 21Tutashã, elu pruscuti cu sãndzi sh-tenda sh-tuti vasili ti huzmitipsiri. 22Dupã legea, aproapi tuti lucrili s-chischinipsescu cu sãndzi, sh-fãrã virsarea a sãndzilui nu ari ljirtari.

23Prindea tsi copilji a lucrilor tsi suntu tu tser si chischinipseadzã prit aesti curbãnsiri, iarã lucrili tsereshti prit curbãnsiri ma buni di aesti. 24Cã Hristolu nu intrã tu Sãmta a Sãmtsãlor adrat di mãna, tsi easti icoana a atsiljei alihioasã, ma tamam tu tser tra s-fãniruseascã tora nãintea a Dumnidzãlui trã noi. 25Hristolu nu intrã si s-curbãnseascã di multi ori, ashãtsi dupã cum intrã arhipreftul la Sãmta a Sãmtsãlor cathi an cu sãndzi tsi nu easti a lui, ma a prãvdzãlor, 26cã va prindea tsi Hristolu va s-munduea di multi ori di tu thimiljiusirea a etiljei. Ma tora tu bitisita a etilor, mash unã oarã easti fãnirusitã trã ashtirdzearea a amãrtiiljei prit curbãnsirea a lui. 27Dupã cum easti apofãsitã ti oaminjlji tra s-moarã mash unã oarã, sh-dupã aestã yini giudicata, 28ashãtsi sh-Hristolu, cum s-curbãnsi unã oarã ti amãrtiili a multsãlor, va si aspunã di a doaua oarã, fãrã di amãrtii trã atselji tsi lu ashteaptã ti ascãpari.