2 Petru 2

Nvitsãtori Arãdioshi sh-Aspãrgãciunea a lor

1Namisa di populu a Dumnidzãlui ari avutã sh-prufits arãdioshi, ashã cum va aibã sh-ntrã voi nvitsãtori arãdioshi, cai va bagã pri ascumtu ereziili a aspãrdzeariljei shi, alipidãnda Domnul tsi lji acumpãrã, va tragã dupã nãshi unã aspãrdzeari dinãoarã. 2Multsã oaminji va urmeadzã cãljurili a aspãrdzeariljei a lor shi trã itia a lor, calea a alihiljei va s-ngiurã. 3Di orixea a lor di pãradz va vã arãdã cu zboari uidisiti, ma giudicata a lor di cu chiro nu amãni sh-aspãrdzearea a lor nu ma doarmi. 4Dumnidzãlu nu ljirtã nitsi anghilji tsi amãrtisirã, ma lji arcã tu Colasi ligats cu prãnghili a scutidlui iu s-veaglji trã giudicatã. 5Elu nu ljirtã nitsi lumea atsea veacljea, ma viglje deadun cu shapti altsã, Noeul, dimãndãtorlu a ndriptatiljei, cãndu Dumnidzãlu adusi nicarea pristi lumea a nipistimenjilor. 6Giudicã cu aspãrdzeari cãsãbadzli di Sodom sh-di Gomora, fãcãnda cinushi, sh-ashãtsi deadi un urnechi ti atselji di ma nãpoi tsi vor s-bãneadzã tu apistii. 7Sh-ascãpã ndreptul Lot tsi s-mundui di bana disfãrnatã atsilor zurljilor. 8Aestu ndreptu bãna ntrã elji sh-lu munduea cathi dzuã suflitlu a lui ndreptu, vidzãnda sh-avdzãnda faptili a lor fãrã di lege. 9Domnul shtii s-lji ascapã di cãrtearea dumnidzãstslji shi s-tsãnã nindreptsãlji tra s-condamnã dzua a giudicatãljei, 10ma multu atselji tsi s-ducã dupã orixili lãvushiti a truplui sh-dispretsueascã autoritatea.

Elji suntu fãrã-arushãni, fudulji sh-nu s-asparã s-blastimã fãpturili tsereshti, 11iarã anghilji, cai suntu ma mãri di fuchii sh-di puteari, nu aduc nãintea a Domnului giudicatã blãstimatã contra a lor. 12Ma aeshti ca prãvdzi fãrã minti, nimalji agri tsi suntu amintati trã acãtsari sh-trã tãljeari, blastimã atseali tsi nu li shtiu sh-va chearã tu aspãrdzearea a lor. 13Ashãtsi elji va ljea plata a nindriptatiljei a lor. Elji u-au trã harauã s-u treacã dzua cu chefi, suntu dãmtsi sh-lãvushituri, shi s-ducã dupã chehili a lor, cãndu s-acljeam tu uspetsili a voastri. 14Ocljilji li au mplinji di putãnsiri sh-nu pãpseascã di amãrtisiri, arãd suflitli nitsãnuti, au inimã nvitsatã tu tãmãchearlãchi sh-suntu cilimenji blãstimats. 15Elji, dupã tsi u alãsarã calea atsea ndreapta, chirurã urmãnda calea al Balaam, hiljiu al Beor, cai u vru plata a nindriptatiljei. 16Ma s-vãrghi trã arãu-fãcãtura a lui di la unã pravdã di ngãrcari fãrã gurã, tsi lji gri cu boatsea a omlui sh-dãnãsi zurleatsa a prufitlui.

17Aeshti oaminji suntu fãntãnji fãrã apã sh-niori tsi s-pingu di furtuna, trã cai easti vigljeat scutidlu di totãna. 18Cã zburãnda cu zboari umflati sh-goali, cu orixili a truplui sh-a disfãrnariljei, anganã atselji tsi cu zori avea ascãpatã di atselji tsi bãneadzã tu arãdeari. 19Elji lã tãxeascã a lor libertati, cãndu elji idyilji suntu sclayi a aspãrdzeariljei, cã atsel tsi ti domneashti, atsel ti sclãvueashti. 20Cã macã atselji tsi ascãparã di lãvushiturili a lumiljei prit cunushtearea a Domnului shi a Ascãpãtorlui Isus Hristos, nãpoi s-mintescu cu lucrili tsi li fac azvimts, atumtsea situata a lor di ma nãpoi easti ma arãu di atsea di prota. 21Va eara ma ghini di nãshi s-nu u avea cunuscutã calea a ndriptatiljei, dicãt, cã dupã tsi u cunuscurã, s-lji toarnã pãltãrili a ordinlui sãmtu tsi lã si deadi. 22Ma a lor lã undzi ashã cum dzãtsi un zbor mintimen sh-alihios: “Cãnjli s-turnã la vumearili a lui” shi, “Poarca aspilatã s-turnã s-arucuteascã tu lãschi.”