Aromanian Frasherot
2 Corintenji 6
Hinda colucrutorlji a Dumnidzãlui, vã fãtsem rigeai s-nu aprucheats divãnat harul a Dumnidzãlui, cã elu dzãtsi,
“Tu chirolu tsi prindi ti ascultai,
sh-tu dzua a ascãpariljei ti agiutai.”1
Ia, tora easti chirolu tsi prindi, ia tora easti dzua a ascãpariljei.
Munduirili al Pavlu
Noi nu dãm vãrã itii trã nchidicari vãrã altu, cu nãeti tra s-nu zburãscu arãu ti huzmitipsirea a noastrã. Ma tu itsido, aspunãnda cã him huzmichearlji a Dumnidzãlui cu mari arãvdari, tu munduiri, tu ananghi, tu strimturi, tu bãteari, tu hãpsãniri, tu mintituri, tu curmari, tu noptsi nidurnjiti, tu agiunãri, tu chischineatsã, tu cunushteari, tu arãvdari, tu buneatsã, tu Duhlu Sãmtu, tu vreari fãrã ipucrizii, tu zborlu a alihiljei, tu putearea a Dumnidzãlui, cu armili a ndriptatiljei tu nandreapta sh-tu nastãnga, prit mãrirea sh-nitinjia, prit zborlu atsel nibunlu sh-zborlu atsel bunlu, tsãnut ca arãdiosh sh-cu tutã atsea alihios, ca nicunuscut, ma cu tutã atsea ghini-cunuscut, ca oaminji mortsã, ma ia bãnãm, ca condamnats sh-cu tutã atsea ninga nu tu moarti, ca nvirinats, ma totãna hãrsits, ca oarfãnji, ma avutsãnda multsã, ca niavãnda tsiva, ma cu tutã atsea avãnda di tuti.
Gura a noastrã ari grit discljisã cãtrã voi, Corintenji, inima a noastrã easti lãrdzit cãtrã voi. Noi nu him strimtsã tu vreari cãtrã voi, ma voi hits strimtsã tu ininjli a voastri. Tora easti arada a voastrã, vã zburãscu ca hilji a melji, lãrdzits sh-voi ininjli a voastri.
Templu a Dumnidzãlui Atsilui Yiu
Nu vã bãgats deadun tu un giug cu nipistimenjlji! Cã tsi urtãclãchi ari ndriptatea cu nindriptatea? Icã tsi ari comunã lunjina cu scutidlu? Tsi uidii ari Hristolu cu Belialu?2 Icã tsi parti ari un pistimen cu un nipistimen? Tsi achicãsiri ari templul a Dumnidzãlui cu idolji? Cã noi him templul a Dumnidzãlui atsilui yiu. Ashãtsi cum dzãsi Dumnidzãlu:
“Va bãnedz tu elji
sh-ma imnã tu mesea a lor,
va hiu Dumnidzãlu a lor
sh-elji va hibã populu a meu.”3
Trã atsea:
“Ishits dit mesea a lor
sh-dipãrtats-vã,
dzãtsi Domnul,
sh-nu ahulits tsiva nicurat,
sh-mini va vã ghini-ashteptu.”4
Shi:
“Mini va vã hiu Tatã,
sh-voi va nji hits hilji sh-hilje,
dzãtsi Domnul atsel Tutãpututul.”5
Source notes (5)
- Cross-reference Isa 49:8.
- Footnote Belialu easti Satanlu.
- Cross-reference Lev 26:12.
- Cross-reference Isa 52:11.
- Cross-reference 2 Sam 7:14; 1 Cro 17:13; Isa 43:6; Ier 31:9.
Aromanian Frasherot. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.