1 Sãruna 3

1Trã atsea, dupã tsi nu putum ma s-arãvdam, apofãsim s-armãnem singuri Athina,1 2sh-pitricum Timoteu, fratili a nostru sh-colucrutorlu tu lucrul al Dumnidzãu, ti predicarea a evanghelu al Hristos, tra s-vã nvãrtusheadzã shi s-vã inimuseascã tu pistea a voastrã, 3tsi vãrã nu si s-ascuturã di aesti munduiri. Cã voi singuri shtits cã trã aestã him bãgats. 4Cãndu earam la voi, vã prispusim cã va nã munduim, sh-tamam ashã undzi, sh-voi aestã u shtits. 5Trã aestã sh-mini, nu putui s-aravdu ma, pitricui tsi s-aduchescu pistea a voastrã, tsi s-nu earat cãrtitã di cãrtitorlu, sh-munduira a noastrã s-eara dusã digeaba.

Shtirili di la Timoteu

6Ma tora tsi nã vini Timoteu di la voi sh-nã adusi buni hãbãri trã pistea sh-vrearea a voastrã, sh-cã voi avets totãna minduiri buni trã noi sh-avets mari dor s-nã videts, ashã di-cum noi s-vã videm voi. 7Trã atsea, frats sh-surãri, namisa di munduirea sh-priaĝunirea a noastrã, noi aflãm curaiu di la voi prit pistea a voastrã. 8Cã tora noi bãnãm dealihea, macã voi armãnets tu Domnul. 9Cã tsi hãristisiri putem s-lji dãm a Dumnidzãlui trã voi, trã tut haraua tsi avem trã voi nãintea a Dumnidzãlui a nostru? 10Noi nã rugãm cu tutã inima, noaptea sh-dzua, tra s-videm fatsa a voastrã shi s-mplinim atseli tsi lji lipsescu a pistiljei a voastrã.

11Ma tora Dumnidzãlu a nostru, idyiul Tatãl, sh-Domnul a nostru Isus Hristos s-u ndripteadzã calea a noastrã cãtrã voi. 12Domnul s-vã multseascã shi s-vã artirseascã vrearea trã un-alantu sh-trã tuts, ashã di-cum sh-noi cãtrã voi. 13Elu si nvãrtusheascã ininjli a voastri, tsi s-hibã fãrã cusuri tu sãmtãsiri nãintea a Dumnidzãlui, Tatãl a nostru, cãndu Domnul a nostru Isus Hristos yini deadun cu tut populu a lui sãmtu.