Nunei Reantenangfo

Nunei Reantenangfo

Kaiwo Dedung

Buku nunei reantenangfo nini, deikariri kariri todoni Allai niari nunei tuti rorafaisi tuti inontarainesa ne, sasarifoi reantenangfo tuti nunei sobu dadirafo, kontai todoni Allai medu ria inontarainesa fo. Buku nini ato kutu we rabuang fuba boru amani,

1. Robong 1-11. Kariri Allai niari nunei tuti rorafaisi tuti kariri inontarainesa na doni ma fo. Na robong ninai kontai soi kariri Adami tuti Hawai, Kaini tuti Habeli, Noki tuti foa fiabaifoi, kontai Menara Babeli.

2. Robong 12-50. Kariri werengno Israeli fosa ma fo. Ene wereng mano reantenang mani Abrahami. I mani wewonong paria na ne yoasoafo tuti dohong kariri Allai ne kaiwofo. Sua aha mani kariri Isaki, Abrahami kaisungfoi tuti kariri Yakupi, Isaki kaisungfoi (Yakupi nini esahui kontai we Israeli).

Mayeai riria kariri Yakupi ne kaisung ewesuraya mandu fosa ene ririafoi. Yakupi ne kaisung ewesuraya mandu nini saino ewe wereng we riria Israelio suraya mandu foi ne. Na kaiwone kontai soi kariri Yakupi ne kaisungno Yusupi tuti fi kawariaio wedaya Yakupi tuti ne arikangfosa etaunaung to Mesiria eminohi naya fo.

Masino buku nini soi kariri inontaraio na reantenang pari fosa ki, wape fi fuba buku nini medura ne mani, kariri fi Allai niarifo. Fi reantenang soi na buku nini mani kariri todoni Allai niari rorafaisi tuti nunei ne, tuti kife buku nei na ne kaiwo arerai dohongnai we wiro sawing inontaraine tata kaha fo. Na buku nini mani, medu fuba sewa kariri Allai mano kiutu kaiwo kariri nunei tuti dohong aiboifo we mandoni dino dohong sarawafo. Allai nani kontai andino wiwiaing tuti fiata ne inontarainesa kontai niari inontaraine ene ririafoi ne. Soi buku tawa nini weo deisaha kariri kaiwasa na nu bei, ene eroasoafo tuti ambori fiatasa we ene eroasoafo nayai darang pampang.

Kaiwo na buku nei deto kutuai tonina,

1:1—2:25 kariri Allai niari rorafaisi nunei tuti inontarainesa

3:1-24 kariri sasarifoi wereantenang tuti dadirafo

4:1—5:32 kariri Adami paria sobu Noki

6:1—10:32 kariri Noki tuti Foa Fiabai foi

11:1-9 kariri Menara Babeli

11:10-32 kariri Semi paria sobu Abrami

12:1—35:29 kariri Abrahami, Isaki tuti Yakupi itone munurorongfo

36:1-43 kariri Esauwi ne ririafoi

37:1—45:28 kariri Yusupi tuti ne doroi fosa

46:1—50:26 kariri Inontarai Israeli fosa na nu Mesiri foi.