Alago Bible Translation Project
Osayi 10
Oyoleho kpo Okpa Leke
Ebeni nmo oyoleho nyakwu bwi iso yawo okpagye. Akpa yogwu kweyi owusoshogwa para ikweyi nu; ahiyi nu lebye eno, ikpo nu lebyi ite kola. Ogbo okpa leke gwowa yabo nu. Oyikpo nu ka abore hi ikweyi ki ishu. Ikpo ka aboshe oyi ho okpagye, kweyi oyogwu kpo oko nyakwu bya ka awabaga. Ni oyogwu ni akpula ahapa kyogwu kpo oko loshu loshu. Ishini akpula ahapa mani kela ni, nyyimu ko yi ta. Nke pwoko kela bwi iso mo, <<Yo oza ni akpula ahapa kani yi teba; kayi ta lo!>> Ebeni oyoleho ni nmo hagye ikweyi ki ishu kpo okpagye ni za abore nu iso ogwene kpiye ko Owuso, ni yaba ko gbogbo-gbogbo, ni yi iso kpo okpagye, kpi ishu kpa awoza kpiri ni bipu wa ni. Oyoleho kamo, <<Oya gbeji kelo! Ishini oyoleho ko omwahapa ke ta ajigwo ni, Owuso ya ngmeyi ko oko ni oyi teba koya ni, byo ni okada ayole nu kawo bane ni.>>
Ebeni oko ni npwo bwi iso ni ya kela kpami ni ki kamo, <<Ga zokpa ni gwogwa ni yabo ko oyoleho ni hagye ipu ki ishu kpe ega ki ishu ni.>>
Ngebe ko oyoleho ga kadanu mo ona dami okpa leke. Oka dami mo, <<Ze sho oha; oya wowa ipu wo, okwunu wo ke oya lonye bye eyi.>>
Nzo okpa leke ni abo nu kweyi ha, oke lonye bye eyi okwunu hin. Itikpi koni nyyi me ni ke, opya wowa ipu hin. Ebeni Oyoleho kadami mo, <<Kwikyikyeni owotiri ko tono kela ko Owuso da awokpagye, ase nwashika kpa awigbenu kpe edo kasuse kpa awose.>>
Alago Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.