Ahirani Bible
लेवीय 1
होमबली
परमेश्वरनी दर्शनमंडप माईन मोशेले आवाज दिसन बोलना. इस्राएल लोकेसले अस सांगानं, जर तुम्हना माईन एखादा माणुस पशुबळिना अर्पण करी तवय त्यानी शेरडामेंढारा यामातील अर्पण करानं. गुरंढोरसमातील होमबळी अर्पण करानं व्हई त्यासनी पाक नर अर्पण करानं; तो त्यासनी दर्शनमंडपना दारमा अर्पण करानं, तवय परमेश्वर देखत मान्य व्हई. होमबळीना पशुना डोकावर हात ठेवाना तवय तो पशु पश्चातापकरता मान्य व्हई. त्यानी त्या वासरुले देवना देखत मारानं अनं अहरोनना पोर्या ज्या सेवक शेतस त्यासनी त्यानं रंगत अर्पण करीसन दर्शनमंडपना दारपान जी वेदी शे त्यावर आजुबाजूले शितडानं. तवय होमबळी पशुना कातडा काढीसन त्यासना तुकडा कराना. नंतर अहरोन सेवकना पोर्यासनी वेदीवर इस्तव ठेवानं अनी त्यानावर लाकड ठेवानं; अनं अहरोनना पोर्या ज्या सेवक शेतस त्यासनी वेदीवरना इस्तववरना लाकडासवर पशुना त्या तुकडा, डोका अनं चरबि हाई रचाना. त्यानी आतडि आनं पाय त्यानी पाणीघाई धोवानं तवय सेवकसनी सर्वासना वेदीवर होम करीसन ते अर्पण करानं तवय ते परमेश्वरनि करता सुवासिक अर्पण व्हई. शेरडामेंढारा माईन होमबळी अर्पण करानं व्हईते तो नर पाक र्हावाले पाहिजे. त्यासनी त्याले परमेश्वरनां देखत वेदीना उत्तर बाजुले मारि टाकानं आनं अहरोनना पोर्या जे सेवक शेतस त्यासनी त्याना रंगत वेदीना आजुबाजूले शितडानं. त्यानी त्याना कापीसन तुकडा करानं अनी त्याना डोका अनं चरबी हाई वेगळा करानं ह्या सर्वा तुकडा सेवकसनी वेदीना इस्तववरना लाकडसवर रची देवानं. त्यानी आतडी अनं पाय त्यानी पाणीघाई धवानं. मंग सेवकसनी बठासना वेदीवर होम करीसन त्यानं अर्पण करानं. हाई होमबळी परमेश्वरना करता सुवासिक अर्पण शे. परमेश्वरनि करता त्याले पक्षीसनी होमबळी अर्पण कराना व्हईते होलासना आनं पारवसना पिल हयासना अर्पण करना पडि. सेवकसनी तो पक्षी वेदीजोडे आनीसन त्याना डोका मोडीसन येगळं करी टाकानं अनी वेदीवर त्याना होम करानं अनी त्यानं रंगत वेदीना बाजुले गाळी टाकानं. त्याना गळानी पिशवी अनं पिस काडीसन वेदीना पुर्व भागले राख टाकाना जागावर फेकी टाकानं. त्यानी तो पंखना मझारमाईन फाडी टाकानं. पण ते भाग वेगळा कराना नही. तवय सेवकसनी वेदीना ईस्तवना लाकडासवर त्याना होम करानं. हाई होमबळी परमेश्वरना करता सुवासिक अर्पण शे.
Ahirani Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.