Jabuli 61

Lega pi gwok

1Winy kokona, Ai Lubanga,

dok iwiny legana.

2Akok boti ki kamabor, ki i agiki lobo,

ka cwinya dong odem woko.

Tela itera ikom got mabor kagwokena;

3pien in aye kalarena,

in wir matek me gwoka ki ikom lukwora.

4Wek abed i kemani nakanaka!

Wek akane ite bwomi abed iye ki gwok ma oromo!

5In dong ityeko winyo lok me kwong mera, Ai Lubanga,

dok ityeko miya gipiny pa jo ma gilworo nyingi.

6Med mwaka mapol ikom nino me kwo pa rwot;

wek obed kwo nakanaka ikare pa yalwak ducu!

7Mii en obed iwi komkere matye inyimi nakanaka, Ai Lubanga;

dok igwoke ki mar meri ma pe loke, pien in Lubanga ma lagen icobo cike meri kakare.

8Pimeno abiwero wer me pako nyingi,

kun acobo bene kwong ma mera ma akwongo inyimi nino ki nino.