Acoli Bible Revision
Jabuli 118:24
Verse 24 is marked below, with the whole chapter around it. Read from the start
Lega me pwoc pi loc
Wumii pwoc bot Rwot, pien en ber,
mar mere ma pe loke bedo nakanaka!
Jo Icrael myero guwac ni,
“Mar mere ma pe loke bedo nakanaka.”
Jo me ot pa Aron myero guwac ni,
“Mar mere ma pe loke bedo nakanaka.”
Jo ma lworo Rwot bene myero guwac ni,
“Mar mere ma pe loke bedo nakanaka.”
Akok bot Rwot ki i can ma odiya;
Rwot ogamo legana ci ogonya woko. 2
Rwot tye kweda, pe abilworo gin mo.
Dano adana kono twero timo gin ango ikoma?
Rwot tye kweda, en aye ma konya.
Abineno ki wang me loc jo ma daga.
Ringo kalare bot Rwot
ber kato geno dano.
Ringo kalare bot Rwot
ber kato geno luloc me lobo.
Rok ducu onongo oruma woko dyere,
ento atyekogi woko ducu i nying Rwot!
Gin onongo guruma woko dyere,
guruma woko dyere i kabedo ducu;
ento atyekogi woko ducu i nying Rwot!
Gin onongo guruma woko dyere calo nyig kic,
gubino ikoma oyotoyot macalo mac ma wango okutu,
ento atyekogi woko ducu i nying Rwot!
Gucora matek ma onongo dong acok poto,
ento Rwot okonya. 3
Rwot aye teka ki kerona,
en dong odoko lalara.
Wuwiny wer ma kiwero me loc i kema pa jo ma kitgi atir ni,
“Twero pa Rwot olwenyo lweny matek!
Twerone omiyo waloyo,
twero pa Rwot kelo loc!”
Pe abito, ento abibedo kwo,
kun abitito pi gin ma Rwot dong otiyo.
Rwot dong opwoda marac tutwal,
ento pe oneka woko gire.
Yaba dog gang me kit ma atir,
wek adony ki iye,
ci amii pwoc bot Rwot.
Man aye dog gang pa Rwot,
jo ma kitgi atir gibidonyo ki iye.
Apwoyi pien dong igamo doga,
Got ma lugedo gukwero,
en aye odoko got madit me twok ot.
Man Rwot aye ma otimo,
obedo botwa lok me aura.
Man aye nino ma Rwot oyubu;
wabibedo iye ki yomcwiny madwong. 6
Ai Rwot, walegi, ilarwa!
Rwot walegi, mii ticwa ducu ocobe kakare! 7
Lubanga omii gum ikom ngat ma bino i nying Rwot!
Walamo gum ikomi ki i Ot pa Rwot.
Rwot aye Lubanga
en dong obedo ber ikomwa.
Wumak jang yat wuwot kwede ma wurye i tyeng,
wuwot wurum kwede keno tyer.
In Lubangana, abimiyo pwoc boti;
in Lubangana, abidwori.
Wumii pwoc bot Rwot, pien en ber,
mar mere ma pe loke bedo nakanaka!
Source notes (7)
- Cross-reference 1 Tek 16:34; 2 Tek 5:13; 7:3; Eji 3:11; Jab 100:5; 106:1; 107:1; 136:1; Jer 33:11
- Cross-reference Ibru 13:6
- Cross-reference Nia 15:2; Ica 12:2
- Cross-reference Luk 20:17; Tic 4:11; 1 Pet 2:7
- Cross-reference Mat 21:42; Mar 12:10-11
- Cross-reference Mat 21:9; Mar 11:9; Jon 12:13
- Cross-reference Mat 21:9; 23:39; Mar 11:9; Luk 13:35; 19:38; Jon 12:13
Acoli Bible Revision. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.