Amaki̠

Ib̠eb̠i Asu̠gbagba Ma̠ Agu̠o̠

Amaki̠

Age̠ Bho̠

Otighom

Amaki̠ wa̠ ubhelegi nyen ma̠ Azo̠n Amaki̠ bho̠, age̠ ma̠ A̠d̠ire onon. I̠na bo̠ ani̠ d̠o̠ d̠a̠ d̠iobh na̠ i̠wal Ogbogir bho̠, ya̠a̠ i̠na alo̠gh agu̠o̠ a̠nigha̠ ma̠ Apo̠l na̠ Abanabas d̠a̠ o̠pu̠r e̠gi̠ o̠gba asu̠gbagba bho̠ (Rogir 13:13). Ubhin ma̠a̠, asu̠gbagba d̠o̠yo̠ ad̠u̠a d̠a̠ ibom asu̠gbagba ta̠ A̠pita̠ ya̠ i̠na age̠ a̠kokod̠i bho̠. Agu̠b̠an ka̠ Amaki̠ aro̠ ma̠ o̠pu̠r a̠d̠ire Ib̠eb̠i Asu̠gbagba bho̠, sa̠ i̠na age̠ ma ilologia̠n ya̠ ib̠uiy ipu ma̠ d̠a̠ A̠d̠ire ib̠eb̠i Asu̠gbagba iyed̠i. I̠na na̠ o̠gba ani̠ d̠o̠ a̠gboloma̠ ma̠ i̠mara ta̠ A̠zizo̠s, ya̠a̠ a̠b̠eton d̠a̠ owura̠ amu̠m bho̠ sekina̠ ogir d̠o̠yo̠ bho̠. I̠na age̠ d̠a̠ a̠duom d̠o̠yo̠ ma̠ ofenymeni a̠nwunom ta̠ Akrai̠st ya̠ od̠i d̠a̠ A̠rom bho̠ na̠ o̠gba omutiom ma̠a̠, A̠zizo̠s bha̠ Akrai̠st bho̠. I̠na agba asi̠se̠ghe̠ni̠ ma̠a̠, A̠zizo̠s Akrai̠st, bha̠ Ob̠a̠ra̠motu sekina̠ O̠nyi̠ ta̠ A̠zib̠a̠ ga̠i sa̠ age̠ a̠gboloma̠ nyen ogir na̠ atu̠ghu̠me̠ni̠ d̠o̠yo̠. A̠d̠ire bho̠ a̠kunugiom d̠a̠ omugh na̠ ob̠etina̠ d̠a̠ omugh ta̠ A̠zizo̠s. Obha̠ agu̠o̠ a̠bhin a̠muzughod̠iom rebu ebu a̠ghud̠um ta̠ A̠zizo̠s Akrai̠st.

Aru̠mu̠ i̠di̠ar ya̠ u̠ge̠ bho̠

Azo̠n Owurmamu̠m bho̠ na̠ owuramu̠m ta̠ A̠zizo̠s

Ogir wa̠ d̠a̠ ebhugh Agalili bho̠

O̠gi̠ d̠a̠ A̠zeruse̠le̠m na̠ od̠igh d̠a̠ e̠ma bho̠

Asu̠su̠ghu̠d̠i̠an d̠a̠ e̠ma A̠zeruse̠le̠m

Iwowa̠ i̠di̠ar ya̠ na̠ eru

Omugh ta̠ A̠zizo̠s na̠ ob̠etina̠ d̠a̠ omugh bho̠