పవిత్ర్ బైబిల్‍
అపొ 17
థెస్సలోనికలకమా
పౌలుబి సీలల్‍బి అంఫిపొలిస్‍, అపోల్లోనియ, కరి హాఃయారేథీ ప్రయాణ్‍ కరీన్‍ థెస్సలొనిక కరి హాఃయార్‍మా ఆయా, ఏజ్గా యూదుల్‍ను సభ జోగో ఛా. అనటేకే పౌల్‍ ఇను క్రమంతీ యో యూదుల్నుసభ జోగొమా జైన్‍ ఇవ్నేతి తీన్ ఆరమ్ను ధన్‍ అమ్నితార వాదించో ర్హాయో, మే తుమ్నా ప్రచార్‍ కరుకరుతే యేసుస్‍ క్రీస్తు హుయిరోస్‍ కరి పవిత్ర లేఖనాల్‍ బోల్యుతిమ్‍ యో క్రీస్తు మీన్హాత్‍ పడిన్‍ మరణ్ మతు వుటిన్‍ కరి రుజువుయు, ఇవ్నామా థోడు జణు, భక్తివాళు గ్రీసు దేహ్ఃమా ఘణు అద్మీయే, ముఖ్యంని బాయిక్వాబి అజు దేవ్నా ఆరధాన కరిన్ ఒప్పిలిన్‍ పౌలు, సీలతి మళిగయే.
హుయుతో యూదుల్‍ యోహాఃరు దేఖిన్‍, అసూయతి కామ్‍ధామ్‍ కోయింతే థోడు అద్మీయేనా బులైన్‍, హఃయార్‍మా రావ్‍డీ కరానూ సురు కర్యా, యాసోను ఘర్‍మా పడీన్‍ పౌలు, సీలనా ప్రజల్నా సభల్‍నా హాఃమెలీన్‍ ఆవానా హఃజే కోసిష్‍ కర్యా. హుయుతో ఇవ్నే నా దేఖావమా యాసోనూనా, థోడు భైయ్యేవ్‍నా యో హఃయార్‍నూ అధికారుల్‍ కనా ఖేచ్లిన్‍ జైన్‍, అవ్నే హర్యక్ జోగొబి ఆటకం కరవాల ఆ నంగర్మాబి ఆయిరూస్‍; యాసోనూ ఆవ్నా చేర్సాయి రాక్యోస్‍. ఆవ్నే హఃరూ యేసు కరి బుజేక్‍ రాజో ఛాకరీ బోలిన్‍, రోమ రాజో చట్టంనా విరోధంతీ చాలుకరాస్‍ కరి బోలిదా. యో వాతె హాఃజ్యుతే అధికారుల్‍బి, ప్రజల్‍ గళ్లొ కలవర్‍ కర్యు. ఇనబాద్మా యాసోనుతి, ఇనా కనా ఛాతే ఇవ్నా కనాతూ తోడు పైసా లీన్ ఇవ్నా మ్హేందిదూ.
బెరీయమా
తెదె ఎగ్గిస్‍ భైయ్యే రాత్నుటేపార్‍ పౌలునా సీలనా బెరయ కరి హఃయార్‍నా మొకల్‍దిదూ. బెరయానా ఆయాతే ఇవ్నే యూదుల్‍ను సభ జోగొ గయా. బెరయనూ ప్రజల్‍ థెస్సలోనికనూ అద్మియేతిబి ఘణు ఇమాన్‍దార్‍నూ అద్మియే ఇనహఃజే యూవ్నే లేఖనంమా ధ్యాన్‍తి హఃమ్జవాళు, బుజు హర్‍ ధన్‍ యూవ్నే బోలాతే వాతె హఃరు ఇమ్మస్‍ ఛాకీ కోయినికి పరీక్చించీన్‍ కర్త ఆయు ఇనాటెకే ఇవ్నా మాబి కేత్రుకి విష్వాసుల్‍ హూయా గ్రీకునూ బాయిక్వా మరధ్‍మనా హాఃరాబి విష్వసుల్‍ విస్వస్ కర్యు హుయుతే బెరయమాబి పౌలు సీల దేవ్‍ని వాక్యం ప్రచార్‍ కరుకరాస్‍ కరి థెస్సలోనికమా రావాళు యూదుల్‍ మాలంకర్లీన్‍ ఏజ్గా ఆయిన్‍ ప్రజల్నా హూసీ కరిన్ కలవర్‍ కర్యు ఎగ్గిస్‍మా యో విష్వాసి పౌలునా ధర్యావ్‍ను ప్రాతంమా జాకరీ బోలిన్‍ మొకల్యా కానీ సీలబి తిమోతి ఎజ్గాస్‍ రైగా. పౌలునా బోలిమొక్‍లాన గయాతే ఇవ్నే ఏథెన్సునూ యార్‍తోడి కేడె గయా, ఇనబాద్మా పౌలు ఇవ్నేతి సీలనాబి, తిమోతినా హూవ ఏత్రె ఎగ్గిమా ఆవో కరి బోలో కరి బోలిన్‍ ఇవ్నా బోలిమొక్‍ల్యో, తెదె ఇవ్నే యో ఖభార్‍ లీన్ ఫాచు బెరయనా గయా.
ఏథేస్‍మా
పౌలు ఏథెన్సుమా సీల తిమోతి హాఃజే ఏదుర్‍ దేక్తోహుయిన్‍ రైగో, ఏజ్గా ఇను యో హాఃయార్‍ అక్కు మూర్తేవ్‍తీ భరైర్హవనూ దేఖిన్‍, ఇనూ దిల్మా ఘణు దుఃఖ పడ్యు. ఇనహఃజే యో సమాజ మందిరంమా ఆవాతే యూదుల్‍థీ, భక్తివాళాథి హర్యేక్‍ధన్‍ గల్లీయేమా, ఇనేతి మళాతే హర్యేక్‍తి యో వాతె బోల్తోథో. ఎపికూరీయుల్‍మనూ, స్తోయికుల్‍మనూ థోడు జ్ఞానుల్‍ ఇనేతి వాదించ్యా. ఆ మధంభరో ష్యాత్‍ బోలుకరాస్‍కీ కరి థోడు జణు బోల్యా. థోడు జణు యేసు ప్రభునూ గూర్చి బోలుకరాస్‍ కరి, బుజు థొడు జణు ఆ అలాదుదేవ్ను గూర్చి బోలుకరాస్‍ కరి బోల్లీదు. ఎత్రమా ఇవ్నే ఇనా అరేయొపగు కరి సభ కనా లీన్ జైన్‍, తూ కరుకరాతే ఆ కేవు నవు బోధకీ హమే మాలం కరాజైనా? థోడు అర్థంహువకొయితే వాతె హమ్నా హఃమ్జాక్రస్‍ ఇనూ మతలబ్‍ బోల్‍ కరి థోడు జణు పుఛాయు. ఏతెన్సునూ హాఃరుబి, ఏజ్గా ర్హవాళు అజు పరదేసియే వాళు నవూ వాతె బోలామబి, హాఃజామబి ఇవ్ను ధన్‍ అక్కు ర్హాయు.
పౌలు అరేయొపగు సభమా హుబ్రీన్‍ ష్యాత్‍ బోల్యొ కతో ఏతెన్సువాళా తుమే హఃరూ హర్యేక్‍మా ఘణు దేవ్నూ భక్తివాళంతర దేఖౌంగ్రస్‍. మే హాఃయర్‍ పర్తోహుయిన్‍ తూమరు దేవతల్‍నా, మూర్తేవ్‍నా దేఖూకరుతో ఏక్ బలిపీటం మన దేఖాయు. ఇనాఫర్‍ మాలం కోయింతే దేవ్నా కరి లిఖైరూస్‍. ఇనటెకే తుమే మాలం కోయింతే క్హయు దేవ్నా హఃలామ్‍ కరుకరాస్‍కీ ఇనాస్‍ గూర్చి మే ప్రచార్‍ కరుకరూస్‍. ఆ జగత్‍నా, ఇనుమనూ సమస్తంనా బణాయోతే దేవ్‍ యోస్‍. ఆబ్‍నా జమీన్‍ యోస్‍ ప్రభు హుయిర్హఫర్‍ అద్మీయే భాంద్యుహుయు ఆలయంమా యో ర్హాసేకోయిని. యో హాఃరవ్నా జీవ్డొనా, ధమ్‍నా సమస్తంనా దేవవాళో, ఇనహఃజే “ఇనా క్హయుబి కమ్‍ ఛాతిమ్‍ కరి అద్మీయేనా హతేఖుః కరలీలేవళో కాహే.” యో ఏక్ అద్మీథీ హర్యేక్‍ జాత్‍వాళానా కరీన్‍, ఇవ్నే హఃరు జగత్ ఆక్కామా జీవా హఃర్‍ఖు కరీన్‍, ఇనా ఢూండనా హఃజే నిర్ణయించ్యుతే కాలంనా, ఇవ్ను జీవానూ జమీన్‍ పోలిమెరల్నా కర్యో. ఇవ్నే ఏక్ వోహాఃత్‍ దేవ్నా డుండిన్ మాలంకర్షే కరి, యో అప్నమతూ కినాబి దూర్‍ ర్హవాళో కాహే. అప్నె ఇనమా జీవుంగరీయేస్‍, ఇనామా ఛీయ్య, ఇమ్మస్‍ అప్నే ఇనూ సంతాన్‍ కరి తూమారు తోడు కవులు బోలుకరాస్‍. ఇనహఃజే అప్నే దేవ్నా సంతాన్‍ హూయిరైన్‍, అద్మీయేనూ అక్కల్ బణాయుతే ఘేణవ్‍నా, రూపునా, బండనా దేవ్‍నితర ఛాకరీ హుఃజ్‍నాకర్ను. యో బుధ్దునూ కాలమ్‍నా దేవ్‍ దేఖిన్‍బి నాదేఖాతిమ్‍ ర్హయో హంకే హుయుతో హార్యేక్‍జణు దిల్‍భద్‍లాయిన్ ఫార్ను కరి ఆజ్ఞాదిదో. ష్యానకతో యో నియమించ్యోతే అద్మీతి నీతినా అనుసరించిన్‍, జగత్‍మా ఛాతే హాఃర్నా న్యావ్‍ దేవానూ ఏక్ ధన్‍నా నిర్ణయించి రాక్యోస్‍; మర్యా హుయాతే యో ఫారిని వుఠాడమా ఇనా నమ్మానాటెకె హాఃరవ్నా భాల్ నా దీరాక్యోస్‍.
మర్యా హుయామతూ జీవిన్‍ వుట్యోతే టేకె, యూవ్నే హాఃజ్యా తెదె థోడు జణు నాక్లే కాడ్యా; బుజు థోడు జణు తూ బోలాతే వాత్‍ బుజేక్‍ ఛోట్‍ హాఃజీయేస్‍ కరి బోల్యా. ఇమ్‍ ర్హవమా పౌలు ఏజ్గాతూ నాకీన్‍ ఛలేగో. కాని థోడు జణు ఇనా కన్నెకరిన్‍ విష్వసించ్యు. యూవ్నామా అరేయొపగితుడ్‍నూ దియొనూషియు ఏక్ జణోబీ, దమరి కరి ఏక్ బాయిక్వోబి, బుజు థోడు జణు అవ్నా కేడె థూ.
పవిత్ర్ బైబిల్‍. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.