ಯಾಕೋಬ 3

ಜೀಬ್

1ಮಾರ ಭೈಯೇ ಭೇನೆವೊ. ಖ್ಹಾರುಸ್ಜ಼ಣು ಶಿಕಾಡನ ಉತ್ವಾಳಿ ನಕೊಕರೊ, ಶಿಕಾಡವಾಳ ಹುಯಿರ‍್ಹಾತೆ ಅಪ್ಣೆ ಅಲಕ್‍ ಜ಼ಣೆಥೀಬಿ ಘಣಿ ನ್ಯಾಯತೀರ್ಪ್‌ನ ಶುಶತ್ಉಶು. 2ಶನಕತೊ ಕೈಯೇಕ್ ವಾತೇಮ ಅಪ್ಣೆ ಖ್ಹಾರೂಸ್ ಗಲತ್‌ಹುಯಿ ಜೈ಼ಯೇಸ್‍. ಏಕ್‍ಜ಼ಣೊ ವಾತ್ಮ ಗಲತ್‌ ನಾಹುಯೋತೊ ಯೊ ಇನ ಪೂರ ಶರೀರ್‌ಮ ಚ಼ಪ್ಪಣ್‌ಮ ರಾಖನ ಯೊ ಶಕತ್‌ವಾಳೊ ಹುಯಿರ್‍ಹೊಸ್. 3ಹಂದೇಖೊ ಘೋಡೊಖ್ಹಾರು ಅಪ್ಣಿ ಚ಼ಪ್ಪಣ್‌ಮ ಚಾ಼ಲನಿತರ ಯೋ ಅಖ್ಖಾನ ಮ್ಹೋಡಾನ ಲಗಾಮ್‌ ಘಾಲಿಯೆಸ್, ತದೆ ಇನ ಅಖ್ಖಯೇಕ್‌ ಶರೀರ್‌ನಾಸ್‍ ಅಪ್ಣುನ ಹೋಣುತೆ ಬಾಜು಼ ಫರಾಯೆಜಾ಼ಯ್. 4ಜ಼ಹಾಜ಼್‌ನ ಜಿನು ದೇಖೊ. ಯೋಖ್ಹಾರು ಘಣು ಮೋಟು ರ‍್ಹಯುತೋಬಿ ತೋಫಾನ್ ವ್ಹಯಿರೆಥಿ ರುಕ್‍ ಬದ್ಲಿಜಾ಼ಸ್. ಕತೋಬಿ ಚ಼ಲಾವವಾಳೊ ಘಣು ನ್ಹಾನು ಚುಕ್ಕಾಣಿಥಿ ಯೋಖ್ಹಾರಾನ ಯೋ ಜಾ಼ವ್ಣುತೆ ಬಾಜು಼ ಫರೈಲೇಸ್. 5ಇಮ್ಮಸ್ ಜೀಬ್‍ ಜಿನುಬಿ ನ್ಹಾನು ಖ್ಹಂದೊ ರ‍್ಹಯುತೋಬಿ ಮೋಟ ಕಾಮ್ನು ಬಡೈಮಾರಿನ್‍ ಕಂಡಿ ಚ಼ಢೈಲೇಸ್‍. ಆಗ್‍ನಿ ನ್ಹಾನಿ ಚಿನ್‍ಗಾರಿ ಮೋಟಿ ಝಾ಼ಡಿನಸ್ ಬಾಳಿನಾಖಸ್. 6ಜೀಬ್‍ಬಿ, ಆಗ್‍ನಿ ಚಿನ್‍ಗಾರಿನಿತರಾಸ್‌. ಯೋ ಖರಾಬ್ ಜಗತ್‌ನು ಖ್ಹಣೇದ್ ಹುಯಿನ್ ಅಪ್ಣ ಖ್ಹಂದಾವ್‌ನ ಇಚ಼್‌ಮ ರ‍್ಹೀನ್ ಅಖ್ಖಾಏಕ್ ಶರೀರ್‌ನ‍ ಮೈಲು ಕರಸ್. ಇನು ಯೋಸ್ ನರಕನಿ ಆಗ್ನಲಗಾಡಿಲಿನ್ ಯೋ ಅಖ್ಖಿ ಜಿ಼ಂದಗೀನಸ್ ಆಗ್‍ಲಗಾಡಸ್. 7ಹರೇಕ್ ಜಾ಼ತ್ನು ಜೀನ್ ಜಿನಾವರ್‌ನಾಬಿ ವ್ಹವವಾಳು ಕೀಡ್‌ಕಮ್ಟನಾಬಿ, ಪಾಣಿನುಜಾನ್ವಾರ್‌ನಾಬಿ ಅದ್ಮಿ ಚ಼ಪ್ಪಣೆಮ ಲಾಯೆಜಾ಼ಯಿ ಅಜು಼ ಲೈರಾಖ್ಯೂಸ್‍ಬಿ. 8ಕತೋಬಿ ಜೀಬ್‌ನ ಕೆಹೊ ಅದಮ್‍ಜ಼ಮಾನೋಬಿ ಚ಼ಪ್ಪಣೆಮ ಲ್ಯಾವಕೊಯ್ನಿ. ಯೋ ಚ಼ಪ್ಪಣ್‌ಮ ಆವಾಕೊಂತೆ ಕೇಡ್‍ಹುಯಿರ‍್ಹೂಸ್‍ ಮರಣ್ಣ ಝಾರ್‌ಥಿ ಭರೈರ‍್ಹೂಸ್. 9ಯೋಸ್ ಜೀಬ್‍ಥಿ ಪ್ರಭು ಬಾಹುಯಿರೋತೆ ದೇವ್ನ ಧನ್ಯವಾದ್ ಕರಿಯೇಸ್, ಇನೀನಿಘೋಣಿನಿತರಸ್‍ ಉಬ್ಜಿಗಯುತೆ ಅದ್ಮೆವ್‍ನ ಅಪ್ಣೆ ಶಾಪ್‍ದಿಯೇಸ್. 10ಯೋಸ್‍ ಮ್ಹೋಡೇಥಿ ಧನ್ಯವಾದ್ ಅಜು಼ ಗಾಳೆ ಭೇಬಿ ಆವಸ್. ಮಾರ ಭೈಯೇ ಭೇನೆವೊ, ಅಮ್‍ ನಾರ‍್ಹೇವ್ಣು. 11ಎಕ್ಕಸ್ ಚೇಜ಼್‌ಭಾರೇಥಿ ಮಿಠ್ಠು ಪಾಣಿ ಅಜು಼ ಕಡುಪಾಣಿ ಭೇಬಿ ನಿಕಳ್‍ಶೆಕಿ ಶು? 12ಮಾರ ಭೈಯೇ ಭೇನೆವೊ, ಅಂಜೀರ್‌ನು ಝಾ಼ಡು ಓಲಿವ್ ಝಾ಼ಡಾನು ಪಂಡು ಮ್ಹೇಲ್‌ಶೇಕಿ ಶು? ದ್ರಾಕ್ಷಿನ ವೇಲಮ ಅಂಜೀರ್‌ ಮಳ್‍ಶೆಕಿ ಶು? ಇಮ್ಮಸ್ ಕೆಹೊ ಚೇಜ಼್‌ಭಾರೋಬಿ ಖಾರುಪಾಣಿನಾಬಿ ಮಿಠ್ಠು ಪಾಣಿನಾಬಿ ಕೋದಿಶೇನಿ.

ಉಪ್ಪರ್‌ಥಿ ಆಯುತೆ ಅಕ್ಕಲ್

13ತುಮಾರಮ ಗ್ಯಾನೀಬಿ ಅಕ್ಲೀಬಿ ಕೋಣ್? ಅಥ್ರಾನವಾಳು ಅಛ್ಛಿ ಚಾ಼ಲ್‌ಥಿ ಸಮಾಧನ್ನಾ ಕಾಮ್‍ಥಿ ಜಿವಿನ್ ವತಾಳದೆ. 14ಕತೋಬಿ ತುಮಾರ ದಿಲ್ಮ ಬಳಾಪೊ, ಕಡ್‍ವೈ ಅಜು಼ ನಿಕ್‍ಳ್ಯೊಜಾನ್ ರಾಖಿನ್ ಅಕ್ಲಿಕರಿ ಖ್ಹಾಚ಼ನ ವಿರೋದ್‌ ಝೂ಼ಟಿ ಬೋಲಿನ್ ಕಂಡಿಛ಼ಡಾವೊ ನಕೊ. 15ಯೋ ಉಪ್ಪರ್‌ಥು ಆಯಾತೆ ಗ್ಯಾನ್‍ಕಾಹೆ. ಯೋ ಜ಼ಮೀನ್‍ನಸಂಬಂದ್‍ ಪಡ್ಯುಹುಯು, ಲೋಕ್ನಿಖ್ಹಯೆಲ್ನು ಅಜು಼ ಭೂತ್‌ನ ಸಂಬಂದ್ ಪಡ್ಯುಹುಯು. 16ಶನಕತೊ ಪೇಟ್ನೊ ಬಳಾಪೊಬಿ ವಹೇರ್‌ಬಿ ರ‍್ಹೆಯಿತೆ ಬಾಜು಼ ಕಲಾವ್ಣಿಬಿ ಖ್ಹಾರೀಸ್‍ ಥರಾನು ಖರಾಬ್ ಕಾಮ್‍ಬಿ ರ‍್ಹೇಸ್. 17ಕತೋಬಿ ದೇವ್‍ಥಿ ಆವಾನಿ ಗ್ಯಾನ್ ಪಹಿಲೆ ಪರಿಶುದ್ ಹುಯಿರ‍್ಹವಾಳು ಇನಪಾರ್ ಸಮಾಧಾನ್‍ವಾಳು, ಶೇದೇವ್‌ ಹುಯಿರ‍್ಹವಾಳು, ವಿಧೇಯ ರ‍್ಹವಾಳುಬಿ, ಗೋರ್‌ಥೀಬಿ ಅಜು಼ ಅಛ್ಛಿ಼ಫಲ್‍ಥೀಬಿ ಭರೈರ‍್ಹವಾಳು, ಶುದ್ಧಮನ್‌ಥಿ ಬೋಲವಾಳು, ಖ್ಹಾಚು಼ ಬೋಲವಾಳುಕರಿ ಖುಷಿಥಿ ಮಾನಿಲ್ಯಾವನು ಹುಯಿರ‍್ಹುಸ್. 18ಸಮಾಧಾನ್‍ ಕರಾವಾಳು ಸಮಾಧಾನ್‍ಕರಿ ಬೋಲಾನು ದಾಣಾನ ಗಾಡಿನ್ ನೀತಿಕರಿ ಬೋಲಾನು ಫಲ್ನ ವ್ಹಾಡಸ್.