ದೇವ್ನಿ ಖ್ಹಾಚಿ ವಚನ್
ಯಾಕೋಬ 2
ಪಕ್ಷಪಾತನಿ ವಿರೋದ್‌ ಝೇತಾವ್ಣಿ
ಮಾರ ಭೇನೆ ಭೈಯೇವೊ ಮಹಿಮೆಮ ರ‍್ಹವಾಳೊ ಅಪ್ಣೊ ಪ್ರಭು ಹುಯಿರೋತೆ ಯೇಸುಕ್ರಿಸ್ತಮ ವಿಶ್ವಾಸಿ ಹುಯಿರಾತೆ ತುಮಾರಮ ಬೇದ್‌ಭಾವ್‌ ನಾರ‍್ಹೇವ್ಣು. ಏಕ್ ವೇಳ್ಮ ಶೌಕಾರ್ ಅದ್ಮಿ ಖ್ಹೊನ್ನಾನಿ ಅಂಗುಠಿನಾಬಿ ಶನ್‍ಗಾರ‍್ನು ಲುಂಗ್ಡು ಫೇರಿಲಿನ್ ತುಮಾರಿ ಸಬೆಮ ಆಯುತೊ ಅಜು಼ ಏಕ್‍ಗರೀಬ್ ಅದ್ಮಿ ಫಾಟು ಲುಂಗ್ಡು ಪೇರ‍್ಹಿಲಿನ್ ಆಯೂತೆ, ತುಮೆ ಅಛ಼್ಛ ಲುಂಗ್ಡು ಪೇರ‍್ಹಿರಾಖವಾಳನ ಮರ್ಯಾದಿ ಕರೀನ್ ಇನ “ತೂ ಹಿಜ್ಜಾ಼ನಿ ಆ ಅಛ್ಛಿ ಝ಼ಗೋಪರ್ ಬೇಖ್ಹ್‌” ಕರೀಬಿ, ಯೋ ಗರೀಬ್‌ನ, “ತು ಹಿಜ಼್ಜ ಭೀರೆ ನತರ್ ಹಜ಼್ಜ ಮಾರ ಗೋಡ ಮ್ಹೇಲಾನ ರಚ್ಚಾ಼ಕನ ಬೇಖ್ಹ್‌” ಕರೀಬಿ ಬೋಲ್ಯುತೊ, ತುಮೆ ತುಮಾರಮಸ್ ಗುಮಾನಿ ಕರೋಸ್ ಆ ನಾಹುಯಿನ್ ತುಮೆ ಕರಸ್ತೆ ನ್ಯಾವ್‍ನಿ ತೀರ್ಪ್ ಗಲತ್‌ ಖ್ಹಯಾಲ್ನು ಹುಯಿರ‍್ಹುಸ್. ಮಾರ ಪ್ಯಾರ್‌ನ ಭೈಯೇ ಭೇನೆವೊ ಖ್ಹಮ್‍ಜೊ ದೇವ್ ಆ ಜಗತ್‌ನು ಗರೀಬ್‌ನ ವಿಶ್ವಾಸ್‌ಮ ಶೌಕಾರ್ ಬಣೈನ್‍ಬಿ ಇನ ಪ್ಯಾರ್ ಕರಾವಾಳನ ದೇವ್ನೆ ವಾಗ್ದಾನ್ ಕರ‍್ಯೊತೆ ರಾಜ್ಯನ ಭಾದ್ಯ ಬಣೈನ್‍ಬಿ ರ‍್ಹೇವ್ಣುಕರಿ ಚೂ಼ಣಿಲಿದೊ ಕೊಯ್ನಿಕಿಶು? ಕತೋಬಿ ತುಮೆತೋ ಗರೀಬ್‌ನ ಖ್ಹರಮ್‌ ಕಾಡಿನಾಖಿದಿದ. ತುಮುನ ಖ್ಹತೈನ್ ನ್ಯಾವ್‍ನಿ ಝ಼ಗೋನ ಖ್ಹಾಮ್ಣೆ ಖೇಚಿಲೀಜಾ಼ವಾಳ ಶೌಕಾರ್ ಕಾಹೆಕಿಶು? ತುಮೆ ಬೋಲಸ್ತೆ, ಯೋ ಮಹಾನ್ ನಾಮ್ನ ದೂಷಣೆ ಕರಾವಾಳು ಇವ್ಣೆಸ್ ಕಾಹೇಕಿಶು? ಕತೋಬಿ ಧರ್ಮಶಾಸ್ತ್ರಮ ಛಾ಼ತೆ, “ತಾರ ಭೀಡೆವಾಳನ ತಾರಿನಿತರಸ್‍ ಪ್ಯಾರ್ ಕರ‍್ನು!” ಕರಿ ಬೋಲಾನು ರಾಜ಼ನಿ ಹುಕುಮ್‌ನ ಚ಼ಲಾವವಾಳ ಹುಯಿರ‍್ಹಾತೊ ತುಮೆ ಅಛ಼್ಛು ಕರಾವಾಳ ಹುಯಿರ‍್ಹಿಶು. ತುಮೆ ಅಶಿಲ್‌ಕಮ್‌ಶಿಲ್‌ಕರಿ ಬೋಲವಾಳ ಹುಯಿರ‍್ಹಾತೊ ಪಾಪ್ ಕರಾವಾಳ ಹುಯಿರ‍್ಹಿನ್ ಅಪರಾದಿಕರಿ ಧರ್ಮಶಾಸ್ತ್ರನಿ ಪರಕ್ಮ ಫೇಡ್‍ ಲೀಲಿಶು. ಶನಕತೊ ಕೋಣ್‍ತೋಬಿ ಧರ್ಮಶಾಸ್ತ್ರನಸ್ ಪಾಡಿಚಾ಼ಲಿನ್ ಏಕ್‍ನು ಎಕ್ಕಸ್ ವಾತ್ಮ ಗಲತ್‌ ಹುಯಿಗಯುತೊ ಅಥ್ರಾನವಾಳು ಅಖ್ಖೀಸ್ ಬಾರೆಮಾಬಿ ಅಪರಾದಿ ಹುಯಿರ‍್ಹೆಸ್. ಶನಕತೊ ವ್ಯಬಿಚಾರ್ ನಕೊಕರ್ ಕರಿ ಬೋಲ್ಯೊ ಹುಯೊ ದೇವಸ್ ಅದ್ಮಿನ ಖೂನಿ ನಕೊಹು ಕರೀಬಿ ಬೋಲ್ಯೊ. ಇನಖ್ಹಾಜೆ ತೂ ವ್ಯಬಿಚಾರ್ ನಾ ಕರ‍್ಯೊತೋಬಿ ಖೂನ್ ಕರಿನಾಖ್ಯೊತೊ ಧರ್ಮಶಾಸ್ತ್ರನ ಮೀರಿನ್ ಚಾ಼ಲವಾಳೊ ಹುಯೊ. ಛುಟ್ಕಾರ್ ದ್ಯಾವಾಳು ಧರ್ಮಶಾಸ್ತ್ರನಿ ಪರಕ್ಮ ತುಮೆ ತೀರ್ಪ್ ಲೀಲ್ಯಾವಾಳನ ಬರೊಬರ್‌ಥಿ ವಾತ್‍ಬೋಲೊ ಅಜು಼ ವಿಧೇಯ ಹುವೊ ಶನಕತೊ ಗೋರ್‌ಕರಾಕೊಂತೆ ರ‍್ಹವಾಳಾನ ನ್ಯಾವ್‍ನಿ ತೀರ್ಪ್‌ಮ ಗೋರ್‌ ವತಾಳ್‌ಶೆ ಕೊಯ್ನಿ. ಗೋರ್‌ ನ್ಯಾವ್‍ನಿ ತೀರ್ಪ್‌ನಾಸ್‌ ಜಿತಿಲಿಶೆ.
ವಿಶ್ವಾಸ್ ಅಜು಼ ಕಾಮ್
ಮಾರ ಭೈಯೇ ಭೇನೆವೊ. ಏಕ್‍ಜ಼ಣೊ ಮನ ವಿಶ್ವಾಸ್‍ಛಾ಼ ಕರಿ ಬೋಲಿನ್ ಕಾಮ್ಮ ನಾರ‍್ಹಯೊತೊ ಶನೊ ಫಾಯಿದೊ? ಎಥ್ರಾನಿ ವಿಶ್ವಾಸ್ ಇನ ಬಚಾ಼ಡ್‌ಶೆ ಕಿಶು? ಏಕ್ ವೇಳ್ ತುಮಾರೊ ಏಕ್ ಭೈ ನತರ್ ಏಕ್ ಭೇನ್ನ ಫೇರಾನ ಲುಂಗ್ಡು ಅಜು಼ ಯೋ ದನ್ನು ಖಾಣುಬಿ ನಾರ‍್ಹವಾಪರ್; ತುಮಾರಮ ಎಕ್‍ಜ಼ಣೊ ಇವ್ಣುನ ಶರೀರ್‌ನ ಹೋಣುತೆ ಯೋ ನಾದೀನ್‍, “ಸಮಾಧಾನ್‌ಥಿ ಜಾ಼ವೊ, ಆಗ್ ಶೇಕಿಲೆವೊ, ಪೇಟ್‍ಭರಿಖಾವೊ” ಕರಿ ಬೋಲ್ಯುತೊ ಶನೊ ಫಾಯಿದೊ? ಇಮ್ಮಸ್ ಕಾಮ್ಮಕೊಂತೆ ವಿಶ್ವಾಸ್ ಜಾನ್‌ ಕೊಂತೆ ಹುಯಿರ‍್ಹುಸ್.
ಕತೋಬಿ ಥೋಡು ಜ಼ಣು, “ತುನ ವಿಶ್ವಾಸ್ ಛಾ಼, ಅಜು಼ ಮಾರಮ ಕಾಮ್ ಛಾ಼ ತೂ ಕಾಮ್ಮ ಕೊಂತೆ ತಾರಿ ವಿಶ್ವಾಸ್‌ನ ಮನ ವತಾಳ್. ಮೇ ಮಾರ ಕಾಮ್‍ಥಿ ಮಾರ ವಿಶ್ವಾಸ್‌ನ ವತಾಳುಸ್‌!” ಕರಿ ಬೋಲೆಜಾ಼ಯ್ನಿ. ದೇವ್ ಎಕ್ಕಸ್‍ಜ಼ಣೊ ಕರಿ ಯೋ ವಿಶ್ವಾಸ್ ಕರಸ್, ಯೋ ಅಛ್ಛು಼ಸ್‍. ಕತೋಬಿ ಶೈತಾನ್‍ಬಿ ಇಮ್ಮಸ್ ವಿಶ್ವಾಸ್ ಕರೀನ್ ಡರ್‌ಥಿ ಕಾಪಸ್. ಅಲಾ ಬಿಣ್‍ಅಕ್ಲಿ! ಕಾಮ್‍ಕೊಂತೆ ವಿಶ್ವಾಸ್ ಫಾಯಿದೊಕೊಂತೆ ಕರಿ ತುನ ವತಾಳ್‍ನುಕಿ ಶು? ಅಪ್ಣೊ ಗುರುಗುರುಬ್‍ಲ್ಯೊ ಹುಯಿರೋತೆ ಅಬ್ರಹಾಮ್‌ನೊ ಛೀಯ್ಯೊ ಇಸಾಕನ ಬಲಿಪೀಠ್‌ನ ಉಪ್ಪರ್ ಛ಼ಡಾವಾನಿ ವಖ್ಹ್‌ತೆ ನೀತಿನು ತೀರ್ಪ್‌ನ ಲೀಲಿದೋತೆ ವಿಶ್ವಾಸ್‌ನ ಕಾಮ್‌ಥೀಸ್‌ ಕಾಹೆಕಿ ಶು? ಇನಿ ವಿಶ್ವಾಸ್ ಕಾಮ್ನಿಜೋ಼ಡ್ಮ ಚಾ಼ಲ್ಯು ಅಜು಼ ಯೋ ಕಾಮ್‌ಥಿಸ್ ಇನಿ ವಿಶ್ವಾಸ್‌ನಿ ಖ್ಹಯಾಲ್ ಚಾ಼ಲಿಗಿ ಕರಿ ದೇಖೆಸ್‍ನಿ? ಇನಖ್ಹಾಜೇಸ್ ಅಬ್ರಹಾಮ್‌ನೆ ದೇವ್ನ ವಿಶ್ವಾಸ್ ಕರ‍್ಯೊ ಅಜು಼ ಯೋ ವಿಶ್ವಾಸ್ ಇನಿ ಗಣ್ತಿಮ ನೀತಿಕರಿ ಚೂ಼ಣೈಗು ಕರಿ ಬೋಲನಿ ಧರ್ಮಶಾಸ್ತ್ರನಿ ವಾತ್ ಅಮ್‍ ಪೂರಹುಯು ಇನಖ್ಹಾಜೆ ಅಬ್ರಹಾಮ್ ದೇವ್‌ನೊ ದೋಸ್ತಿಕರಿ ಬೋಲೈಲಿದೊ. ಅಮ್‍ ಅದ್ಮಿ ಚಾ಼ಲ್‌ಥಿ, ಕಾಮ್‍ಥಿ ನೀತಿವಾಳೊಕರಿ ಖ್ಹಣೇದ್‍ಮ ಆವಸ್ ಪಣ್ಕಿ ಖಲಿ ವಿಶ್ವಾಸ್‍ಥಿ ಕಾಹೆ ಕರಿ ದೇಖೊಸ್‍. ಇಮ್ನಿಸ್ ಪರಕ್ಮ ವ್ಯಬಿಚಾರಿಣಿ ರಾಹಾಬ ಜಿನು ಇನ ಘರ್‌ಮ ಹಾಲಿಹುಮಾಲಿಯೆವ್ನ ಮಳೈಲೀನ್‍ ಅಲಕ್‍ ವಾಟ್‍ಥಿ ಇವ್ಣುನ ಮೋಕ್ಲಿತೆ ಕಾಮ್‌ಥೀಸ್‌ ನೀತಿವಾಳಿ ಕರಿ ತೀರ್ಮಾನ್ ಲೀಲಿದಿ ಕೊಯ್ನಿಕಿಶು? ಆತ್ಮಕೊಂತೆ ಶರೀರ್ ಮರಿಹುಯು ಹುಯಿರ‍್ಹವಾನಿ ಪರಕ್ಮಸ್ ಕಾಮ್‍ಕೊಂತೆ ವಿಶ್ವಾಸ್‍ಬಿ ಮರ‍್ಯುಹುಯುಸ್‌.
ದೇವ್ನಿ ಖ್ಹಾಚಿ ವಚನ್. Copyright © 2023 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.