ಇಬ್ರಿ 2

ಮಹಾನ್ ರಕ್ಷಣೆ

1ಇನಖ್ಹಾಜೆ ಅಪ್ಣೆ ಖ್ಹಮ್‍ಜ್ಯಾತೆ ಬಾರೇನು ನಾ ಛು಼ಕಿಜಾ಼ವ್ಣುತೆ ಯೊ ಅಖ್ಖಾನ ಜಾ಼ಖ್ಹತ್ ಧ್ಯಾನ್ ದ್ಯಾವಾಳ ಹುಯಿರ‍್ಹೇಣು. 2ಶನಕತೊ ದೇವ್‌ದೂತರ್‌ಥಿ ಅಪ್ಣ ಗುರುಗುರಬ್‍ಲ್ಯನ ದೆವೈರ‍್ಹೂಸ್ತೆ ಸಂದೇಶ್ ಖ್ಹಾಚು಼ಥು, ಇನಾಬಿ ಭಡಿನ್ ಕರಾನು ಹರೇಕ್ ಗಲ್ತಿ ಅಜು಼ ಕೋಣ್ ವಿಧೇಯ ಕೊಹುಯುನಿಕಿ ನತರ್ ವಿಧೇಯ ಹುಯಿನ್ ಬರಬರ‍್ನಿ ನಿಶತ್ ಲಿದು. 3ಅಪ್ಣ ಖ್ಹಾಮ್ಣೆ ಮ್ಹೇಲಿರಾಖ್ಯೊತೆ ಅಥ್ರಾನಿ ಮಹಾನ್ ರಕ್ಷಣೆನ ಅಪ್ಣೆ ಕರ‍್ಹಯ್ಯಕಾಡ್ಯುತೊ, ಛು಼ಕಿಜಾ಼ವನುತೋಬಿ ಕಿಮ್? ಆ ಹೈರುತೆ ಪ್ರಭುಥಿ ಪಹಿಲೆ ಬೋಲಾಯು ಅಜು಼ ಇನೇಥಿ ಖ್ಹಮ್‌ಜ್ಯಥಾತೆ ಅನ ಹಮೂನ ಘಟ್‌ಕರಾಯು. 4ಖ್ಹಣೇದ್‍ನು ಕಾಮ್‍ಥೀಬಿ, ಅದ್ಭುತ್‌ಕಾಮ್ ಖ್ಹಾರಥಿಬಿ, ಕೈಯೇಕ್ ಥರಾನು ಮಹಾನ್ ಕಾಮ್‍ಥೀಬಿ ಅಜು಼ ಇನಿ ಸೋಚ್‌ನಿತರ ಪವಿತ್ರಾತ್ಮನು ವರಾನ ವಾಟಪಾಡಿ ದ್ಯವಾಥಿ ದೇವ್ನೇಸ್ ಇನ ವತಾಳಿಲಿದೊ.

ಅಪ್ಣುನ ರಕ್ಷಣೆಮ ಚ಼ಲಾವವಾಳೊ

5ಅಪ್ಣೆ ಬೋಲುಕರೇಸ್ತೆ ಖ್ಹಾಮ್ಣೆ ಆವ್‌ಶೇತೆ ನವುಜಗತ್ನ ಚ಼ಲಾವನ ದೇವ್ನೆ ಇನ ದೂತರ‍್ನ ಕಬ್‌ಜಾ಼ಮ ದಿದೊ ಕೊಯ್ನಿ. 6ಕತೋಬಿ ಪವಿತ್ರ ದಪ್ತರ್‌ಮ ಕಿಜ್ಜಾ಼ಕಿ ಏಕ್‌ ಝ಼ಗೊ ಅಮ್ ಬೋಲಿರಾಖ್ಯುಸ್, ಅದ್ಮಿ ಕೆವ್ಡೋಖ್ಹೊ,

ಇನ ತೂ ಶನ ಯಾದ್ ಕರಾಸ್?

ಅದ್ಮಿ ಕೆಥ್ರಾನೊವಾಳೊ, ಇನಾಮ ಶನ ನಿಘ್ಯ ರಾಕ್ಣು?

7ತೂ ಅದ್ಮಿನ ದೇವ್‌ದೂತರ್‌ಥಿ ಜ಼ರಸ್ ಕಮ್‌ಕರೀನ್ ಬಣೈರಾಖ್ಯೊಸ್ನಿ.

ಮಹಿಮೆಬಿ ಮರ‍್ಯಾದಿನ ಇನ ಕಿರೀಟ್ ಕರೀನ್ ದೀರಾಖ್ಯೊಸ್.

8ಅಜು಼ ಅಖ್ಖಾಸ್ನ ಇನ ಗೋಡಾನ ಹೇಟ್ ನಾಖಿನ್ ಇನ ಕಬ್‌ಜಾ಼ಮ ಕರಿರಾಖ್ಯೊಸ್ನಿ.1

“ಇನೆ ಅಖ್ಖಾಸ್ನ ಅದಮ್ಜ಼ಮಾನನ ಹೇಟ್‌ ಕರಿರಾಖ್ಯೋಸ್‌ಕರಿ” ಬೋಲಾಮ ಇನ ಏಕ್‍ತೋಬಿ ಹೇಟುಕೊಂತೆ ಮ್ಹೇಲ್ಯೊಕೊಯ್ನಿಕರಿ ಬೋಲಾನಿತರಹುಯು. ಕತೋಬಿ ಅಖ್ಖೂಬಿ ಇನ ಹೇಟ್‌ ಛಾ಼ಕರಿ ಅಪ್ಣೆ ಬಿಜೂ಼ಬಿ ಕೊದೇಖ್ಯಾನಿ. 9ಕತೋಬಿ ದೇವ್‌ದೂತರ್‌ಥಿ ಜ಼ರಸ್ ಕಮ್ ಬಣೈರ‍್ಹೋಸ್ತೆ ಯೇಸು ಖ್ಹತಾಪ್ಣಿನಲೀನ್ ಮರ‍್ಯೊತೆ ಇನಖ್ಹಾಜೆ ಮಹಿಮೆನಾಬಿ ಮರ್ಯಾದಿನ ಕಿರೀಟ್ ಕರೀನ್ ಘಾಲಿರಾಖನು ಅಪ್ಣೆ ದೇಖೆಸ್. ಇನಖ್ಹಾಜೇಸ್ ದೇವ್ನ ವಾರ್‌ಖ್ಹೇಥಿ ಯೇಸುನೆ ಹರೇಕ್‌ನಖ್ಹಾಜೆ ಮರಣ್ಣಿ ಖ್ಹತಾಪ್ಣಿನ ಲಿದೊ. 10ಹರೇಕ್‌ಬಿ ಕಿನಖ್ಹಾಜೆ ಕಿನೇಥಿ ಬಣ್ಯುಕಿ. ಯೊ ಘಣು ಜ಼ಣು ಛಿಯ್ಯಾವ್‍ನ ಮಹಿಮೆನ ಮಳಾವನಖ್ಹಾಜೆ; ಇವ್ಣ ಬಚಾ಼ಡವಾಳ ಮೋಟಾನ ಖ್ಹತಾವಥಿ ರಕ್ಷಣೆಲ್ಯವಾನು ಬರಬರಸ್. 11ಶನಕತೊ ಪರಿಶುದ್ಧ ಕರಾವಳನಾಬಿ ಪರಿಶುಧ್ ರ‍್ಹವಾಳನಾಬಿ ಯೋಸ್ ಬಾ. ಅನಖ್ಹಾಜೆಸ್ ಇವ್ಣುನ ಪರಿಶುಧ್ ಕರಾವಾಳೊ ಇವ್ಣುನ ಭೈಯೇ ಭೇನೆಕರಿ ಬೋಲಾನ ಖ್ಹರ್‌ಮಾಯೊ ಕೊಯ್ನಿ. 12ಯೊ ಬೋಲಸ್ ತಾರು ನಾಮ್ನ ಮಹಿಮೆನ ಮೆ ಮಾರ ಭೈಯೇ ಭೇನೆವ್‌ನ ಬೋಲಿದೆವುಸ್‌. ಸಬೆನ ಇಚ಼್‌ಮ ತುನ ಸ್ತುತಿನು ಗೀದ್‌ ಬೋಲಿಶ್ ಕರೀಬಿ, 132ಮೇ ಪಾಛೊ಼ ಫರಿನ್ ದೇವ್‌ಪರ್‌ ಭರೋಖ್ಹೊ ಕರಿರಾಖವಾಳೊಕರಿಬಿ, ಹಂದೇಖೊ ಮೇಬಿ ಅಜು಼ ದೇವ್ನೆ ಮನ ದಿರಾಖ್ಯೊಸ್ತೆ ಲಡ್ಕಾವ್‍ಬಿ ಛಿಯ್ಯೆಕರಿಬಿ ಬೋಲಾಸ್.3 14ಅತ್ರೇಸ್ ಕಾಹೆತೆ ಲಡ್ಕಾವ್‌ಖ್ಹಾರು ಲ್ಹೊಯಿಥಿಬಿ ಬೋಟಿಥಿ ಹುಯಿರುತೆ ಇಮ್ಮಸ್ ಯೇಸು ಜಿನು ಇವ್ಣಿನಿತರಸ್ ಲ್ಹೋಯಿಬಿ ಬೋಟಿಥಿಹುಯೊ. ಇನಿ ಮರಣ್‌ಥೀಸ್ ಮರಣ್ಣಿ ಅಧಿಕಾರ್‌ ಲೀರಾಖವಾಳ ಶೈತಾನ್ನ ಮಟಾಯೊ. 15ಅಜು಼ ಮರಣ್ಣ ಡರ್‌ಥಿ ಇವ್ಣು ಬಚಿರ‍್ಹವಾನು ಹಗಾಮ್ ಅಖ್ಖು ಗುಲಾಮ್ ರ‍್ಹವಾಳನ ಛೋ಼ಡಾಯೊ. 16ಖ್ಹಾಚಮಾಬಿ ಯೋ ದೇವ್ನದೂತರ‍್ನ ಮದತ್ ಕರಾನಖ್ಹಾಜೆ ಕಾಹೆ ಅಬ್ರಹಾಮ್‌ನಿ ಪಿಳ್ಗಿನ ಮದತ್‌ಕರಾನಖ್ಹಾಜೆ ಆಯೊ. 17ಇನಖ್ಹಾಜೆ ಯೊ ಹರೇಕ್ ವಿಚಾರ್‌ಮಾಬಿ ಇನ ಭೈಯೇ ಭೇನೆನ ತಕ್ಕೆರ‍್ಹವಾನು ಜ಼ರೂರತ್ ಥು. ಅಮ್ ಇನೆ ಅದ್ಮಿಯೇವ್‌ನು ಪಾಪ್ ಅಖ್ಖು ಕ್ಷಮಾಪಣ್ ಕರಾನಖ್ಹಾಜೆ ದೇವ್ನ ಕಾಮ್ಮ ಗೋರ್‌ಬಿ ವಿಶ್ವಾಸ್‍ಬಿ ಹುಯಿರ‍್ಹಾವಳೊ ಮಹಾಯಾಜಕ್ ಹುಯೊ. 18ಯೊ ಹಮ್ಕೆ ಶೋದನೆ ಪಡವಾಳನ ಮದತ್ ಕರೆಜಾ಼ಯ್.ಶನಕತೊ ಯೋಸ್ ಶೋದನೆಮ ಪಡಿರ‍್ಹೇಸ್, ಅಜು಼ ಖ್ಹತಾಪ್ಣಿ ಲೀಲ್ಯಾವಾಳೊ ಹುಯಿರ‍್ಹೋಸ್.