ಅಪೊ 23

1ತದೆ ಪೌಲನೆ ಯೆಹೂದ್ಯರ್‌ನ ನ್ಯಾವ್ನಿಸಭೆನ ಠರ್‌ಕಿ ದೇಖಿನ್, “ಭೈಯೇವೊ, ಮೆ ಹಮ್ಕೆಲಗು ಅಛ್ಛಿ ದಿಲ್ನಿಸಾಕ್ಷಿಥಿ ದೇವ್ನಖ್ಹಾಮ್ಣೆ ಚಾ಼ಲಿರ‍್ಹೋಸ್” ಕರಿ ಬೋಲ್ಯೊ. 2ಇನಖ್ಹಾಜೆ ಮಹಾಯಾಜಕ ಹುಯಿರೋತೆ ಅನಾನೀಯನೆ; ಪೌಲಕನ ಭಿಯಹುಯಖ್ಹಾರಾನ ಇನ ಮ್ಹೋಡಾಪರ್ ಮಾರೊ ಕರಿ ಬೋಲ್ಯೊ. 3ತದೆ ಪೌಲನೆ ಇನ ಅಮ್‍ ಬೋಲ್ಯೊ, “ದೇವ್ ತುನಾಬಿ ಮಾರ್‌ಶೆ. ಛು಼ನ್ನೊ ಲಗಾಡಿಹುಯು ಭೀತಸ್ ತು. ಶನಕತೊ ಮೋಶೆನ ಧರ್ಮಶಾಸ್ತ್ರನಿಘೊಣಿ ನ್ಯಾವ್‌ಕರಾನ ಹಿಜ್ಜಾ಼ ಬೇಶಿನ್, ಮನ ಮಾರ್‌ವಾನ ಇವ್ಣುನ ಬೋಲುಕರಸ್ ಕಿಶು? ಆ ಧರ್ಮಶಾಸ್ತ್ರನವಿರುದ್ ಹುಯಿರ‍್ಹುಸ್ನಿ” ಕರಿ ಬೋಲ್ಯೊ. 4ತದೆ ಪೌಲನ ಖನ್ನೆ ಭಿಯಹುಯಾನೆ, “ದೇವ್ನ ಮಹಾಯಾಜಕನ ಅಮ್ನಿ ಪರಕ್ ವಾತ್ ನಾ ಬೋಲ್‌ನು. ತೂ ಇನ ಖ್ಹರಮ್‌ ಕಾಡುಕರಸ್” ಕರಿ ಬೋಲ್ಯು. 5ಪೌಲನೆ, “ಭೈಯೇವೊ, ಆ ಅದ್ಮಿ ಮಹಾಯಾಜಕ ಕರಿ ಮನ ಮಾಲುಮ್ ಕೋಥೂನಿ. ಶನಕತೊ ಅದ್ಮಿಖ್ಹಾರಾನೊ ಅದಿಪತಿನಿ ಬಾರೇಮ ಖರಾಬ್ ವಾತ್ ನಾ ಬೋಲ್‌ನು ಕರಿ ಧರ್ಮಶಾಸ್ತ್ರ ಲೀಖೈರುಸ್” ಕರಿ ಬೋಲ್ಯೊ. 6ಸಭೆಮ ಥೂತೆ ಅದ್ಮಿಮ, ಥೋಡು ಸದ್ದುಕಾಯವಾಳು,ಅಜು಼ ಥೋಡು ಫರಿಸಾಯರ್‌ವಾಳನ ದೇಖಿನ್ ಪೌಲನೆ, “ಮಾರ ಭೈಯೇವೊ, ಮೇ ಫರಿಸಾಯರ್‌ವಾಳೊ ಮಾರೊ ಬಾಬಿ ಪರಿಸಾಯ ಹುಯಿರ‍್ಹೋಥೊ ಮಾರವಾಳು ಪಾಛು಼ಜಿವ್ತು ಉಷೆಕರಿ ಕರಿ ಮೆ ವಿಶ್ವಾಸ್ ಕರೀನ್ ಹಜ಼್ಜ ನ್ಯಾವ್‌ನ ವಿಚಾರಣೆಮ ಪಡ್ಯೊಸ್” ಕರಿ ಚಿಕ್ರಿನ್ ಬೋಲ್ಯೊ. 7ಪೌಲ ಅಮ್ ಬೋಲಾಮ, ಫರಿಸಾಯರ್‌ಮಾಬಿ, ಸದ್ದುಕಾಯವಾಳಾಮ ಘಣಿ ಅಬ್ಬಾಜ಼ಬ್ಬಿ ವಾತೆ ಹುಯಿನ್ ಇವ್ಣಾಮಸ್ ಲಡೈ ಹುಯಿನ್ ಸಭೆ ಫುಟ್‍ವಾನಿ ಮತ್‍ ಹುಯು. 8ಶನಕತೊ ಮರ‍್ಯುಹುಯು, ಪಾಛು಼ ಜಿವ್ತುಹುವಾನು ರ‍್ಹವೊ, ದೇವ್ನದೂತ ರ‍್ಹವೊ, ಶರೀರ್‌ಕೊಂತೆ ಆತ್ಮರ‍್ಹೇವೊ ಕೊಯ್ನಿಕರಿ, ಸದ್ದುಕಾಯವಾಳು ಬೋಲಸ್. ಕತೋಬಿ ಆ ಭೇಬಿ ಛಾ಼ಕರಿ ಫರಿಸಾಯರ್ ಮಾನಿಲೇಸ್. 9ತದೆ ಯೋ ಯೆಹೂದ್ಯರ್‌ಮ ಘಣಿ ಗಲಾಟ್ ಹುಯು ಫರಿಸಾಯರ್‌ನ ಝೂ಼ಂಡ್‌‍ನು ಥೋಡು ಧರ್ಮ ಬೋಧನೆ ಕರವಾಳು ಉಠಿಭೀರಿನ್, “ಆ ಅದ್ಮಿಮ ಶನೀಬಿ ಅಪರಾದ್ ದೇಖವ್‌ಕರಕೊಯ್ನಿ. ದಮಸ್ಕನ ಜಾ಼ವಾನಿ ವಾಟ್‌ಮ ದೇವ್‌ದೂತರ್‌ಕೀ, ಆತ್ಮಾಕಿ, ಇನಜೋ಼ಡೆ ವಾತ್‍ಬೋಲಿರಾಕ್ಣು ಕರಿ ಅಬ್ಬಾಜ಼ಬ್ಬಿ ವಾತೆ ಚಾ಼ಲಿ. 10ಆ ಹೊಜ್ಜತ್ ಘಣಿ ಹುಯಿನ್, ಅದ್ಮಿನು ಝೂ಼ಂಡ್‌ ಪೌಲನ ಖೇಚ಼ತಾಣಿ ಕರೀನ್ ಫಾಡಿ ಟುಕ್‌ಡ ಟುಕ್‌ಡಾ ಕರಿನಾಕ್ಷೆಕರಿ ಡರ್‌ಥಿ ಸೇನಾಧಿಪತಿನೆ ಶಿಪಾಯಿಖ್ಹಾರಾನ ತುಮೆ ಹೇಟ್ ಉತ್ರಿಜೈ಼ನ್ ಪೌಲನ ಜು಼ಲಮ್‌ಥಿ ಇವ್ಣಕಂಥು ಛೋ಼ಡೈನ್ ಕೋಟೆಮ ಲ್ಯಾವ್ಣುಕರಿ ಹುಕುಮ್ ದಿದೊ. 11ಯೋ ದನ್ನಿ ರಾತ್ಮ ಪ್ರಭು ಪೌಲಕನ ಭೀರಿನ್, “ಭಾಲಿಥಿ ರ‍್ಹೇ; ತೂ ಯೆರೂಸಲೇಮ್ಮ ಮಾರಿಬಾರೇಮ ಬೋಲ್ಯೊತೆ ಇಮ್ಮಸ್ ರೋಮ್‍ನ ಅದ್ಮಿನಾಬಿ ಸಾಕ್ಷಿ ಬೋಲ್ನುಕರಿ ಬೋಲ್ಯೊ.

ಪೌಲನಿ ವಿರೋದ್ ಯೆಹೂದ್ಯರ್‌ನಿ ಮಶ್ಲತ್

12ಇನವ್ಹಾಣೆ ಥೋಡು ಯೆಹೂದ್ಯರ್‌ಖ್ಹಾರು ಎಕಾಡಿ ಐನ್ ಎಕ್ಟುಹುಯು ಅಜು಼ ಮಹಿ ಮಹಿಸ್ ಮಶ್ಲತ್ ಭಂದೈನ್ ಹಮೆ ಪೌಲನ ಮರಾಲಗು ಖಾಣುಪಾಣಿ ಛಿಮ್‍ಶುಕೊಯ್ನಿ. ಕರಿ ಆಣ್‌ಲಿದು. 13ಅಮ್ ಕರ‍್ಯಾಹುಯಾಮ ಚಾ಼ಳಿಖ್ಹ್‌ಜ಼ಣೇಥಿ ಜಾ಼ಖ್ಹತ್ ಥು. 14ಅವ್ಣೆ ಗಲ್‌ಢಯಾಜಕರ್‌ನ ಬಿಜು಼ ಗಲ್‌ಢಖ್ಹಾರಾಕನ ಜೈ಼ನ್, “ಪೌಲನ ಖೂನ್ ಕರಾಲಗು ಹಮೆ ಮ್ಹೋಡಾಮ ಶಾತ್ಬಿ ಘಾಲ್‍ಶುಕೊಯ್ನಿಕರಿ ಕಠಣ್‍ಥಿ ಆಣ್ ಲೀರಾಖ್ಯಸ್ ಕರಿ ಬೋಲ್ಯು. 15“ಇನಖ್ಹಾಜೆ ಹಮ್ಕೆ ತುಮೆ ಶಾತ್‍ಕರ‍್ನುಕತೊ, ನ್ಯಾವ್‌ನು ಸಭೆವಾಳಾನಿಜೋಡ್ಮ ರೋಮ್ನೊಸಿಪಾಯ್ನೊ ಮೋಟಾಕನ ಜೈ಼ನ್‌, ಪೌಲನಿ ಬಾರೇಮ ಬಿಜೂ಼ಬಿ ಜಾ಼ಖ್ಹತ್ ತರೀಪ್‌ಶ ಕರ್ನುಕರಿ ಭಾಣುಬೋಲಿನ್ ಇನ ಹಮಾರಕನ ಬುಲೈಲಿನ್ ಆವ್ಣುಕರಿ ಸೇನಾಪತಿನ ಖ್ಹಮ್‌ಜಾ಼ಡ್ ತದೆ ಪೌಲ ಹಜ಼್ಜ ಆವ್‍ತೊಸ್‍ ಜಾ಼ವ್ಣು ಹಮೆ ವಾಟ್‌ಪರ್ ಟಿವೈರ‍್ಹೀನ್, ಇನ ಮಾರಿನಾಖೇಸ್” ಕರಿ ಬೋಲ್ಯು. 16ಕತೋಬಿ ಅವ್ಣಿ ಮಶ್ಲತ್ ಪೌಲನ ಭೇನ್ನಛಿಯ್ಯಾನ ಮಾಲುಮ್ ಪಡ್ಯು. ಇನೆ ಶಿಪಾಯ್ನ ಕೋಟೆನ ಮಹಿಜೈ಼ನ್ ಪೌಲನ ಖ್ಹಮ್‍ಜಾ಼ಡ್ಯೊ. 17ತದೆ ಪೌಲನೆ ಏಕ್‌ ಖ್ಹೋಶಿಪಾಯಿನ ಮೋಟಾನ ಬುಲೈನ್, “ಆ ಜ಼ವಾನಿ ಛೋ಼ಕ್ರಾನ ಸೇನಾಧಿಪತಿಕನ ಬುಲೈಲಿನ್ ಜಾ಼. ಯೋ ಇನ ಖ್ಹಮ್‍ಜಾ಼ಡಾನಿ ಏಕ್‌ ವಾತ್ ಛಾ಼” ಕರಿ ಬೋಲ್ಯೊ. 18ಇಮ್ಮಸ್ ಯೋ ಅಧಿಕಾರಿನ ಪೌಲನ ಭಾಣ್‍ಜ್ಯಾನ ಸೇನಾಧಿಪತಿಕನ ಬುಲೈಲಿನ್ ಗಯೊ. ಇನೆ ಸೇನಾಧಿಪತಿನ ಅಮ್‌ಬೋಲ್ಯೊ, “ಯೋ ಕೋಂಡೈರ‍್ಹೋತೆ ಪೌಲನೆ ಮನ ಬುಲೈನ್, ಆ ಛೋ಼ಕ್ರಾನ ಸೇನಾಧಿಪತಿಕನ ಲೀನ್‍ಜಾ಼ತೆ, ಇನ ಏಕ್‌ ವಾತ್‍ಬೋಲ್ನುಕರಿ ಛಾ಼” ಕರಿ ಬೋಲ್ಯೊ. 19ಸೇನಾಧಿಪತಿನೆ ಯೋ ಜ಼ವಾನಿ ಛೋ಼ಕ್ರಾನ ಹಾತ್‍ಧರೀನ್ ಏಕ್ಲನಾಸ್ ಏಕಾಡಿ ಬುಲೈಲೀಜೈ಼ನ್, “ತೂ ಶಾತ್ ಬೋಲ್ನುಕರಿ ಛಾ಼?” ಕರಿ ಪುಛಾ಼ಯೊ.

20ತದೆ ಯೋ ಜ಼ವಾನಿ ಛೋ಼ಕ್ರಾನ, “ಪೌಲನಿ ಬಾರೇಮ ಘಣು ಮಾಲುಮ್ ಕರಿಲೇವ್ಣುಕರಿ ಭಾಣುಕರೀನ್, ಕಾಲ್ನ ನ್ಯಾವ್‍ನಿ ಸಭೆಮ ಪೌಲನ ಬುಲೈಲಿನ್ ಆವ್ಣುಕರಿ ತುನ ಯೆಹೂದ್ಯರ್ ಖ್ಹಾರು ಬೋಲಾನ ಕರುಕರಸ್. 21ಕತೋಬಿ ಇವ್ಣಪರ್ ವಿಶ್ವಾಸ್ ನಕೊ ಕರಿಶ್. ಪೌಲನ ಮಾರಾನಖ್ಹಾಜೆ ಚಾ಼ಳಿಖ್ಹ್‌ಥೀಬಿ ಜಾ಼ಖ್ಹತ್ ಯೆಹೂದ್ಯರ್‌ಖ್ಹಾರು ಲಪೀನ್ ಟಿವೈರ‍್ಹುಸ್ ಇವ್ಣೆ ಇನ ಮಾರ‍್ವಲಗು ಶಾತ್ಬಿ ಖಾಶು ಕೊಯ್ನಿ ಕರಿ ಆಣ್‌ಕರ‍್ಯು ಅಜು಼. ಹಮ್ಕೆ ತಾರಿ ಹುಕುಮ್‌ನಖ್ಹಾಜೆ ಟಿವೈರ‍್ಹೂಸ್” ಕರಿ ಬೋಲ್ಯೊ. 22ತದೆ ಸೇನಾಪತಿನೆ ಯೋ ಜ಼ವಾನಿ ಛೋ಼ಕ್ರಾನ, “ಇವ್ಣಿ ಮಶ್ಲತ್ನಿ ಬಾರೇಮ ಬೋಲಿರಾಖ್ಯೊಸ್‍ಕರಿ ಕಿನಾಬಿ ನಕೊ ಬೋಲ್” ಕರಿ ಅಜು಼ ಜ಼ವಾನಿ ಛೋ಼ಕ್ರಾನ ಹುಕುಮ್‌ದೀನ್ ಮೋಕ್ಲಿದಿದೊ.

ಕೈಸರೈ ಖ್ಹಯೇರ‍್ನ ಪೌಲನ ಮೋಕ್‌ಲ್ಯುತೆ

23ಇನಪಾರ್ ಖ್ಹೋಶಿಪಾಯಿನ ಮೋಟಾನೆ ಬೇಜ಼ಣ ಸೇನಾಧಿಕಾರಿನ ಬುಲೈನ್ ಇವ್ಣುನ, “ಆ ರಾತ್ ನೌಘಂಟಾನ ಕೈಸರೈ ಖ್ಹಯೇರ‍್ನ ಜಾ಼ವಾನ ಬೇಖ್ಹೋ ಶಿಪಾಯಿನಾಬಿ, ಖ್ಹಡ್‌ತೀನಿಖ್ಹ್‌ ಅದ್ಮಿ ಘೋಡಾಚ಼ಲಾವಳನಾಬಿ, ಬೇಖ್ಹೊ ಅದ್ಮಿ ಭಾಲವಳಾನಾಬಿ, ತಯಾರ್‌ಕರೊ. 24ಅಜು಼ ಘೋಡಾನ ತಯಾರ್‌ಕರ‍್ಲಿನ್, ಪೌಲನ ಬೆಖ್ಹಾಡಿನ್‌, ರಾಜ್ಯಪಾಲ್ ಹುಯಿರೋತೆ ಫೇಲಿಕ್ಸಕನ ಇನ ಜ಼ತನ್‍ಥೀಸ್‌ ಬುಲೈಲೀಜಾವ್ಣು” ಕರಿ ಬೋಲ್ಯೊ. 25ಅಜು಼ ಸೇನಾಧಿಪತಿನೆ ಆ ನಾಹುಯಿನ್ ಇವ್ಣುನ ಅಮ್ ಏಕ್‌ ಚಿಟ್ಟಿ ಲೀಖಿನ್ ದಿದೊ: 26“ಮಹಾಪ್ರಭು ಹುಯಿರೋತೆ ರಾಜ್ಯಪಾಲ್ ಫೇಲಿಕ್ಸ್‌ನ ಕ್ಲೌದ್ಯ ಲುಸಿಯಸ್‍ನಿ ಖ್ಹಲಾಮ್. 27ಆ ಅದ್ಮಿನ ಯೆಹೂದ್ಯರ್‌ಖ್ಹಾರು ಧರೀನ್ ಮಾರಿನಾಕ್ಣುಕರಿ ಥೂ. ಕತೋಬಿ ಆ ರೋಮ್‌ನೊ ಪ್ರಜೆಕರಿ ಮಾಲುಮ್ ಪಡ್ಯು. ಮೇ ಶಿಪಾಯಿಖ್ಹಾರಾನಿ ಜೋ಼ಡೆಜೈ಼ನ್ ಛೋ಼ಡಾಯೊ. 28ಇವ್ಣೆ ಶನ ಅನಪಾರ್ ಅಪರಾದ್ ನಾಖುಕರಸ್ ಕರಿ ಮಾಲುಮ್‌ ಕರಿಲ್ಯಾವಾನಖ್ಹಾಜೆ ಕರಿ ಅನ ಇವ್ಣೆ ನ್ಯಾವ್‍ನಿ ಸಬೆಮ ಮೇ ಬುಲೈಲಿನ್ ಗಯೊ. 29ಮನ ಹಿಜ್ಜಾ಼ ಮಾಲುಮ್ ಪಡ್ಯುತೆ ಶಾತ್‍ಕತೊ ಪೌಲ ಖರಾಬ್ ಕಾಮ್ ಕರಿರಾಖ್ಯೊಸ್ ಕರಿ ಯೆಹೂದ್ಯರ್‌ಖ್ಹಾರು ಬೋಲ್ಯುತೋಬಿ, ಇವ್ಣು ಅಪರಾದ್ ಖ್ಹಾರು ಇವ್ಣ ಧರ್ಮಶಾಸ್ತ್ರನಿ ಬಾರೇಮಾನಿ ವಾತೆನ ಪಾಡೀನ್, ಇನಪರ್ ಅಪರಾದ್ ಢೋವಡ್ಯು ಪಣ್ಕಿ ಮರಣ್ ದಂಡನೆ ರ‍್ಹವೊ ಬೇಡಿ ಘಾಲಾನ ರ‍್ಹವೊ ಕರಾಖ್ಹರ‍್ಕಿ ಖೇವಿಬಿ ಅಪರಾದ್ ಕೋಥಿನಿ. 30ಕತೋಬಿ ಯೆಹೂದ್ಯರ್‌ಮ ಥೋಡುಜ಼ಣು ಪೌಲನ ಮಾರಿನಾಖನ ಮಶ್ಲತ್‌ ಕರುಕರಸ್‍ಕರಿ ಮನ ಮಾಲುಮ್ ಪಡ್ಯು. ಇನಖ್ಹಾಜೆ ಮೇ ಇನ ತುರಂತ್ ತರಾಕನ ಮೋಕ್ಲುಕರುಸ್. ಆಸ್ ಕಾಹೆತೆ, ಪೌಲನಪರ್ ಅಪರಾದ್ ನಾಖವಳಾನಾಬಿ ತಾರಸ್‍ಖ್ಹಾಮ್ಣೆ ಯೋ ಅಪರಾದ್ನಿ ವಾತೆ ಬೋಲಾನ ಹುಕುಮ್ ದೀರಾಖ್ಯೊಸ್”. 31ಶಿಪಾಯಿಖ್ಹಾರು ಇವ್ಣುನ ಹುಕುಮ್ ಹುಯುತೆ ತಿಮ್ಮಸ್ ಪೌಲನ ಇವ್ಣಿಜೋ಼ಡೆ ರಾತೋರಾತ್ ಬುಲೈಲಿನ್ ಅಂತಿಪತ್ರಿಕರಿ ಗಾಮ್‌ನ ಬುಲೈಲೀಗಯು. 32ಇನ ಅಗಲ್ಯದನ್ನೆ ಪೌಲನ ಜೋ಼ಡೆ ಅಗಾಡಿ ಜಾ಼ವಾನ ಘೋಡ ಚ಼ಲಾವವಾಳಾನ ಮ್ಹೇಲಿನ್, ಸಿಪಾಯಿಖ್ಹಾರು ಪಾಛು಼ಫರಿನ್ ಕೋಟೆನ ಆಯು. 33ಇವ್ಣೆ ಕೈಸರೈ ಖ್ಹಯೇರ‍್ನ ಜೈ಼ನ್, ರಾಜ್ಯಪಾಲ್‌ನ ಚಿಟ್ಟಿದಿದೊ. ಇನಪಾರ್ ಪೌಲಾನ ಇನ ಹಾತ್ಮ ದಿದೊ. 34ರಾಜ್ಯಪಾಲ್‌ನೆ ಚಿಟ್ಟಿ ಫಡೀನ್, ಇನೆ ಪೌಲನ, “ತು ಖೆವ ದೇಖ್ಹ್‌ನೊ?” ಕರಿ ಪುಛಾ಼ವಮ ಕಿಲಿಕ್ಯವಾಳೊ ಕರಿ ಮಾಲುಮ್‌ಪಡ್ಯು. 35ರಾಜ್ಯಪಾಲ್ನ, “ವಿರೋದ್ ಹುಯಿರ‍್ಹುತೆ ಯೆಹೂದ್ಯರ್‌ಖ್ಹಾರು ಹಜ್ಜಾ಼ ಆವಾದಿನ್, ಮೇ ತಾರ ಅಖ್ಖಾಸ್ ಕಾಮ್ನ ವಿಚಾರ್ ಕರಿಶ್” ಕರಿ ಬೋಲಿನ್ ಪೌಲನ ಹೆರೋದಾನಿ ಮಹೇಲ್‌ಮ ರಾಖಿನ್ ಕಾವ್ಲಿ ಕರ್ನುಕರಿ ಹುಕುಮ್‌ ದಿದೊ.