Muⱪeddes Kalam (yǝngi yeziⱪ)

Pǝnd-nǝsiⱨǝtlǝr 18

Kɵpqiliktin ayrilip yalƣuz yürgǝn kixi ⱨaman ɵz nǝpsigǝ qoƣ tartar;

Ⱨǝrⱪandaⱪ qin ⱨekmǝtkǝ ⱨaman jan-jǝⱨli bilǝn ⱪarxi qiⱪar.

Əhmǝⱪ yorutuluxⱪa ⱪiziⱪmas;

Ⱪiziⱪidiƣini pǝⱪǝt ɵz oyliƣanlirini kɵrsitixla, halas.

Yaman kixi kǝlsǝ, nǝprǝtmu pǝyda bolar;

Nomussiz ix iza-aⱨanǝttin ayrilmas. 1

Adǝmning sɵzliri qongⱪur sularƣa ohxar;

Danaliⱪ buliⱪi eriⱪ süyidǝk ɵrkǝxlǝp aⱪar.

Yamanƣa yan besixⱪa,

Soraⱪta ⱨǝⱪⱪaniyƣa uwal ⱪilixⱪa ⱪǝt’iy bolmas. 2 3

Əhmǝⱪning lǝwliri uni jedǝlgǝ baxlar;

Uning aƣzi «Meni dumbala» dǝp tǝklip ⱪilar.

Əhmǝⱪning aƣzi ɵz bexiƣa ⱨalakǝttur;

Uning lǝwliri ɵz jeniƣa ⱪapⱪandur. 4

Ƣǝywǝthorning sɵzliri ⱨǝrhil nazunemǝtlǝrdǝk,

Kixining ⱪǝlbigǝ qongⱪur singdürülǝr. 5 6

Ixida ⱨurun bolƣan kiximu,

Buzƣunqi bilǝn ülpǝtdax bolidu. 7

Pǝrwǝrdigarning nami mǝzmut munardur;

Ⱨǝⱪⱪaniylar uning iqigǝ yügürüp kirip yuⱪirida aman bolar. 8

Bay adǝm mal-dunyasini «mustǝⱨkǝm xǝⱨirim» dǝp bilǝr;

Nǝziridǝ ɵzini saⱪlaydiƣan egiz sepildǝk turar. 9

Bitqit boluxtin awwal, kɵngülgǝ tǝkǝbburluⱪ kelǝr;

Awwal kǝmtǝrlik bolsa, andin xɵⱨrǝt kelǝr. 10

Sɵzni anglimay turup, aldirap jawab bǝrgǝn,

Əhmǝⱪliⱪini kɵrsitip ɵzini hijalǝttǝ ⱪaldurur.

Tǝndiki aƣriⱪ azabiƣa adǝmning ɵz roⱨi bǝrdaxliⱪ bǝrgüzǝr;

Biraⱪ roⱨi sunƣan bolsa uni kim kɵtürǝr?

Yorutulƣanning ⱪǝlbi bilimgǝ erixmǝktǝ,

Aⱪilanining ⱪulaⱪliri bilimni izdimǝktǝ.

Sowƣat ɵz igisigǝ ixikni daƣdam eqip berǝr;

Uni qong ǝrbablar aldiƣa yǝtküzǝr.

Dǝwa ⱪilƣanda, awwal sɵzligüqining sɵzliri orunluⱪ kɵrünǝr;

Lekin ⱪarxi tǝrǝp soal ⱪoyup ixni sürüxtürǝr. 11

Qǝk taxlax jedǝllǝrni tügitǝr;

Ƣojilarning arisidiki ixnimu ⱨǝl ⱪilar.

Rǝnjigǝn ⱪerindaxning kɵnglini elix mustǝⱨkǝm xǝⱨǝrni elixtinmu tǝs;

Jedǝl-majira ⱪorƣanning taⱪaⱪ-baldaⱪliriƣa ohxaxtur.

Adǝm durus sɵzligǝnlikidin ⱪorsiⱪi toⱪ bolar;

Ɵz kɵnglidin qiⱪⱪan sɵzliridin mol ⱨosul alar. 12 13

Ⱨayat-mamat tilning ilkididur;

Kimki uning tǝsirini ǝtiwarlisa uning mewisidin yǝr. 14 15

Hotunni tallap alƣan kixi yahxiliⱪ tapidu,

U Pǝrwǝrdigarning mǝrⱨimitigǝ erixkǝn bolidu. 16

Miskinlǝr pǝs awazda yelinip sɵzlǝr;

Bay bolsa ⱪopalliⱪ bilǝn jawab berǝr.

Dostni kɵp tutⱪan kixi harab bolar;

Lekin ⱪerindaxtinmu yeⱪin baƣlanƣan bir dost bardur. 17

Source notes (17)

Footnote ◼ «nǝprǝtmu pǝyda bolar» — yaki «pǝslikmu pǝyda bolar».
Footnote ◼ «ⱪǝt’iy bolmas» — ibraniy tilida «yahxi ǝmǝs».
Cross-reference ◘ Law. 19:15; Ⱪan. 1:17; 16:19; Pǝnd. 24:23
Cross-reference ◘ Pǝnd. 10:14; 12:13; 13:3
Footnote ◼ «Kixining ⱪǝlbigǝ...» — ibraniy tilida «Ⱪorsiⱪining iqki yǝrlirigǝ...».
Cross-reference ◘ Pǝnd. 26:22
Footnote ◼ «kiximu...» — ...mu —demǝk, ⱨurun adǝm ƣǝywǝthorƣa ohxax buzƣunqidur.
Cross-reference ◘ Ⱨak.9:51; 2Sam. 22:51; Zǝb. 18:1-3; 61:3-4; Pǝnd. 29:25
Cross-reference ◘ Pǝnd. 10:15
Cross-reference ◘ Pǝnd. 11:2; 15:33; 16:18
Cross-reference ◘ Pǝnd. 25:8
Footnote ◼ «Adǝm durus sɵzligǝnlikidin .. mol ⱨosul alar» — ayǝt ibraniy tilida «Aƣzining mewisidin adǝmning ⱪorsiⱪi toⱪ bolar; lǝwlirining ⱨosulidin ⱪanaǝtlinǝr» degǝn sɵzlǝr bilǝn bildürülidu.
Cross-reference ◘ Pǝnd. 12:14; 13:2
Footnote ◼ «Kimki uning tǝsirini ǝtiwarlisa uning mewisidin yǝr» — yaki «Kimki ɵz sɵzlirigǝ amraⱪ bolsa, xu uning mewisini yǝr».
Cross-reference ◘ Pǝnd. 21:23; Yaⱪ. 3:2
Cross-reference ◘ Pǝnd. 19:14
Cross-reference ◘ Pǝnd. 17:17

Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.