Muqeddes Kalam (latin yéziq)

Pend-nesihetler 18

Köpchiliktin ayrilip yalghuz yürgen kishi haman öz nepsige chogh tartar;

Herqandaq chin hékmetke haman jan-jehli bilen qarshi chiqar.

Exmeq yorutulushqa qiziqmas;

Qiziqidighini peqet öz oylighanlirini körsitishla, xalas.

Yaman kishi kelse, nepretmu peyda bolar;

Nomussiz ish iza-ahanettin ayrilmas. 1

Ademning sözliri chongqur sulargha oxshar;

Danaliq buliqi ériq süyidek örkeshlep aqar.

Yaman’gha yan bésishqa,

Soraqta heqqaniygha uwal qilishqa qet’iy bolmas. 2 3

Exmeqning lewliri uni jédelge bashlar;

Uning aghzi «Méni dumbala» dep teklip qilar.

Exmeqning aghzi öz béshigha halakettur;

Uning lewliri öz jénigha qapqandur. 4

Gheywetxorning sözliri herxil nazunémetlerdek,

Kishining qelbige chongqur singdürüler. 5 6

Ishida hurun bolghan kishimu,

Buzghunchi bilen ülpetdash bolidu. 7

Perwerdigarning nami mezmut munardur;

Heqqaniylar uning ichige yügürüp kirip yuqirida aman bolar. 8

Bay adem mal-dunyasini «mustehkem shehirim» dep biler;

Neziride özini saqlaydighan égiz sépildek turar. 9

Bitchit bolushtin awwal, köngülge tekebburluq kéler;

Awwal kemterlik bolsa, andin shöhret kéler. 10

Sözni anglimay turup, aldirap jawab bergen,

Exmeqliqini körsitip özini xijalette qaldurur.

Tendiki aghriq azabigha ademning öz rohi berdashliq bergüzer;

Biraq rohi sun’ghan bolsa uni kim kötürer?

Yorutulghanning qelbi bilimge érishmekte,

Aqilanining qulaqliri bilimni izdimekte.

Sowghat öz igisige ishikni daghdam échip bérer;

Uni chong erbablar aldigha yetküzer.

Dewa qilghanda, awwal sözligüchining sözliri orunluq körüner;

Lékin qarshi terep soal qoyup ishni sürüshtürer. 11

Chek tashlash jédellerni tügiter;

Ghojilarning arisidiki ishnimu hel qilar.

Renjigen qérindashning könglini élish mustehkem sheherni élishtinmu tes;

Jédel-majira qorghanning taqaq-baldaqlirigha oxshashtur.

Adem durus sözligenlikidin qorsiqi toq bolar;

Öz könglidin chiqqan sözliridin mol hosul alar. 12 13

Hayat-mamat tilning ilkididur;

Kimki uning tesirini etiwarlisa uning méwisidin yer. 14 15

Xotunni tallap alghan kishi yaxshiliq tapidu,

U Perwerdigarning merhimitige érishken bolidu. 16

Miskinler pes awazda yélinip sözler;

Bay bolsa qopalliq bilen jawab bérer.

Dostni köp tutqan kishi xarab bolar;

Lékin qérindashtinmu yéqin baghlan’ghan bir dost bardur. 17

Source notes (17)

Footnote ◼ «nepretmu peyda bolar» — yaki «peslikmu peyda bolar».
Footnote ◼ «qet’iy bolmas» — ibraniy tilida «yaxshi emes».
Cross-reference ◘ Law. 19:15; Qan. 1:17; 16:19; Pend. 24:23
Cross-reference ◘ Pend. 10:14; 12:13; 13:3
Footnote ◼ «Kishining qelbige...» — ibraniy tilida «Qorsiqining ichki yerlirige...».
Cross-reference ◘ Pend. 26:22
Footnote ◼ «kishimu...» — ...mu — démek, hurun adem gheywethorgha oxshash buzghunchidur.
Cross-reference ◘ Hak.9:51; 2Sam. 22:51; Zeb. 18:1-3; 61:3-4; Pend. 29:25
Cross-reference ◘ Pend. 10:15
Cross-reference ◘ Pend. 11:2; 15:33; 16:18
Cross-reference ◘ Pend. 25:8
Footnote ◼ «Adem durus sözligenlikidin .. mol hosul alar» — ayet ibraniy tilida «Aghzining méwisidin ademning qorsiqi toq bolar; lewlirining hosulidin qanaetliner» dégen sözler bilen bildürülidu.
Cross-reference ◘ Pend. 12:14; 13:2
Footnote ◼ «Kimki uning tesirini etiwarlisa uning méwisidin yer» — yaki «Kimki öz sözlirige amraq bolsa, shu uning méwisini yer».
Cross-reference ◘ Pend. 21:23; Yaq. 3:2
Cross-reference ◘ Pend. 19:14
Cross-reference ◘ Pend. 17:17

Muqeddes Kalam (latin yéziq). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.