Муқеддес Калам (кирил йезиқ)

Пәнд-несиһәтләр 16

Көңүлдики нийәтләр инсанға тәвәдур;

Бирақ тилниң җавави Пәрвәрдигарниң илкидидур. 1

Инсан өзиниң һәммә қилған ишини пак дәп биләр;

Лекин қәлбдики нийәтләрни Пәрвәрдигар таразиға селип тартип көрәр. 2 3

Нийәт қилған ишлириңни Пәрвәрдигарға тапшурғин,

Шундақ қилғанда планлириң пишип чиқар. 4

Пәрвәрдигар барлиқ мәвҗудийәтниң һәр бирини мәлум мәхсәт билән апиридә қилған;

Һәтта яманларниму балаю-апәт күни үчүн яратқандур. 5

Тәкәббурлуққа толған көңүлләрниң һәр бири Пәрвәрдигарға жиркиничликтур;

Қол тутушуп бирләшсиму, җазасиз қалмас. 6 7

Муһәббәт-шәпқәт вә һәқиқәт билән гуналар кәфарәт қилинип йепилар;

Пәрвәрдигардин әйминиш адәмләрни яманлиқтин халий қилар. 8

Адәмниң ишлири Пәрвәрдигарни хурсән қилса,

У һәтта дүшмәнлириниму униң билән енақлаштурар.

Һалал алған аз,

Һарам алған көптин әвзәлдур. 9

Инсан көңлидә өз йолини тохтитар;

Амма қәдәмлирини тоғрилайдиған Пәрвәрдигардур.

Һәтта падишаниң ләвлиригә қаритип әпсун оқулсиму,

Униң ағзи тоғра һөкүмдин чәтнимәс. 10

Адил тараза-мизанлар Пәрвәрдигарға хастур;

Тараза ташлириниң һәммисини У ясиғандур. 11

Падиша рәзиллик қилса жиркиничликтур,

Чүнки тәхт һәққанийәт биләнла мәһкәм турар.

Һәққаний сөзлигән ләвләр падишаларниң хурсәнлигидур;

Улар дурус сөзлигүчиләрни яхши көрәр.

Падишаһниң қәһри гоя өлүмниң әлчисидур;

Бирақ дана киши униң ғәзивини тиничландурар. 12

Падишаһниң чирайиниң нури кишигә җан киргүзәр;

Униң шәпқити вақтида яққан «кейинки ямғур»дур. 13 14

Даналиқ елиш алтун елиштин нәқәдәр әвзәлдур;

Йорутулушни таллаш күмүчни таллаштин шунчә үстүндур! 15

Дурус адәмниң егиз көтирилгән йоли яманлиқтин айрилиштур;

Өз йолиға еһтият қилған киши җенини сақлап қалар.

Мәғрурлуқ һалак болуштин авал келәр,

Тәкәббурлуқ жиқилиштин авал келәр. 16

Кәмтәр болуп мискинләр билән барди-кәлдидә болуш,

Тәкәббурлар билән һарам мал бөлүшкәндин әвзәлдур.

Кимки ишни пәм-парасәт билән қилса пайда тапар;

Пәрвәрдигарға таянған болса, бәхит-саадәт көрәр. 17 18

Көңли дана киши сәгәк атилар;

Йеқимлиқ сөзләр адәмләрниң билимини ашурар.

Пәм-парасәт өзигә егә болғанларға һаятлиқниң булиқидур;

Әқилсизләргә тәлим бәрмәкниң өзи әқилсизликтур. 19

Ақиланә кишиниң қәлби ағзидин әқил чиқирар;

Униң ләвзигә билимни зиядә қилар.

Йеқимлиқ сөзләр гоя һәсәлдур;

Көңүлләрни хуш қилип тәнгә давадур.

Адәм балисиға тоғридәк көрүнидиған бир йол бар,

Лекин ақивити һалакәткә баридиған йоллардур. 20

Ишлигүчиниң иштийи уни ишқа салар;

Униң қарни униңға һайдакчилик қилар. 21

Муттәһәм киши яман гәпни колап жүрәр;

Униң ләвлири лавулдап турған отқа охшар. 22 23

Әгир адәм җедәл-маҗира туғдурғучидур;

Ғәйвәтчи йеқин достларни айриветәр. 24

Зораван киши йеқин адимини аздурар;

Уни яман йолға башлап кирәр. 25

Көзини жумувалған киши яман нийәтни ойлар;

Левини чишлигән киши яманлиққа тәйярдур. 26 27

Һәққанийәт йолида ақарған чач,

Адәмниң шөһрәт таҗидур. 28

Асан аччиқлимайдиған киши палвандин әвзәлдур;

Өзини тутувалған шәһәр алғандинму үстүндур. 29

Чәк етәккә ташланғини билән,

Лекин нәтиҗиси пүтүнләй Пәрвәрдигардиндур.

Source notes (29)

Cross-reference ◘ Пәнд. 16:1; 19:21; 20:24; Йәр. 10:23
Footnote ◼ «қәлбдики нийәтләр» — ибраний тилида «(адәмләрниң) роһлири» дейилиду.
Cross-reference ◘ Пәнд. 21:2
Cross-reference ◘ Зәб. 36:5; 54:23; Мат. 6:25; Луқа 12:22; 1Пет. 5:7
Cross-reference ◘ Аюп 21:30
Footnote ◼ «қол тутушуп бирләшсиму,...» — башқа бир хил тәрҗимиси: «шубһисизки,...».
Cross-reference ◘ Пәнд. 6:17; 8:13; 11:21
Footnote ◼ «...гуналар кәфарәт қилинип йепилар» — Тәврат дәвридә, гуналар қурбанлиқлар арқилиқ «йепилип кәчүрүм қилинди» (йәни, «кәфарәт қилинди»). Инҗил дәвригә кәлгәндила, гуналар «елип ташланди» (мәсилән, «Юһ.» 1:29).
Cross-reference ◘ Зәб. 36:16; Пәнд. 15:16
Footnote ◼ «Һәтта падишаниң ләвлиригә қаритип әпсун оқулсиму, униң ағзи тоғра һөкүмдин чәтнимәс» — йәнә икки хил тәрҗимиси бар: (1) «Падишаһниң ләвлиридә Пәрвәрдигарниң вәһийи болса, униң ағзи тоғра һөкүмдин чәтнимәс»; (2) «Падишаһниң ләвлири вәһийгә қарап сөзләйду; униң ағзи тоғра һөкүмдин чәтнимәслиги керәк».
Cross-reference ◘ Лав. 19:36; Қан. 25:13-16; Пәнд. 11:1; 20:10, 23
Cross-reference ◘ Пәнд. 19:12; 20:2
Footnote ◼ «Униң (падишаниң) шәпқити вақтида яққан «кейинки ямғур»дур» — ибраний тилида: «Униң (падишаниң) шәпқити «кейинки ямғурлар»ни әпкәлгән булуттур». «Кейинки ямғурлар» Исраилда 3-айда йеғип, әтиязлиқ зираәтләрни пишириштәк һалқилиқ рольни ойнайду. Шуңа һәр бир дехан «кейинки ямғур»ға тәшнадур, улар уни бәк қәдирләйду.
Cross-reference ◘ Пәнд. 19:12; Һош. 6:3; Зәк. 10:1; Яқ. 5:7
Cross-reference ◘ Аюп 28:15; Зәб. 18:11; 118:72; Пәнд. 3:14,15; 8:11,19
Cross-reference ◘ Пәнд. 11:2; 17:19
Footnote ◼ «Кимки ишни пәм-парасәт билән қилса пайда тапар» — яки «несиһәт сөзигә көңүл қойған пайда тапар».
Cross-reference ◘ Зәб. 2:12; 33:9-10; 124:1; Йәш. 30:18; Йәр. 17:7
Cross-reference ◘ Пәнд. 13:14
Cross-reference ◘ Пәнд. 14:12
Footnote ◼ «Униң қарни униңға һайдакчилик қилар» — ибраний тилида «Униң ағзи униңға һайдакчилик қилар».
Footnote ◼ «Муттәһәм киши» — ибраний тилида «Белиалниң оғли» дейилиду. «Белиал»ниң мәнаси «әрзимәс» дегәнлик болуп, бәлким Иблисни көрситиду.
Cross-reference ◘ Пәнд. 12:18
Cross-reference ◘ Пәнд. 15:18; 26:21; 29:22
Footnote ◼ «Уни яман йолға башлап кирәр» — ибраний тилида «Уни яхши әмәс бир йолға башлап кирәр».
Footnote ◼ «Көзини жумувалған киши» — яки «көз қисқучи киши», «көзини чимилдатқучи адәм».
Cross-reference ◘ Пәнд. 6:13,14
Footnote ◼ «Һәққанийәт йолида ақарған чач, адәмниң шөһрәт таҗидур» — айәтниң башқа бир хил тәрҗимиси: «Ақ чач болса адәмниң шөһрәт таҗидур; у һәққанийәт йолида пәйда болиду».
Footnote ◼ «Өзини тутувалған» — ибраний тилида: «Өз роһини идарә қилидиған» дегән сөзләр билән ипадилиниду.

Муқеддес Калам (кирил йезиқ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.