Nfa 15

Nnap nshì áMusa

1Te uMusa ká̱ ovan oga aIsa̱rila shì nnap-nshì va̱ ta̱ ûYawe pa̱,

<<Mi shì nnap-nshì ûYawe,

uza̱ kúkúr pa̱ mmá rup ka̱ na.

Ipəri ká̱ onəm oga nkúkwák

uza̱ swang ka̱ ashe ìwá.

2UYawe uwa nggwanggwang mi nkamkam,

kang uwa nka̱mshi irirì mi.

Inan mi yà ta̱, kang mi shep na,

Inan apo mi, mi rup ka̱ na.

3UYawe uwa unəm uga nlung ìkum,

aɗiɗin pa̱ uYawe.

4Akeke ipəri áFirona ká̱ onəm ìkukum,

uza̱ swang ka̱ ashe ìwá.

Onənəm onəna̱n oga mpyal ìkum,

zhì ka̱ ashe Ìwá Ìsəksək.

5Ngbà̱ng ìwá gún oza̱,

oza̱ zhip fa ga ìjili wa ipang.

6Awo ari ɓu, áYawe,

ká̱ ìkam ìchumchum.

Awo ari ɓu, áYawe,

dəshin okpa ìkum.

7Ka̱ ashe rup ichumchum ɓu,

u túng okpa ìkum ɓu,

u re ǹre ká̱ nfə́l ìgwak ɓu

kang à ri oza̱ wa akùkwa.

8Ka̱ atak mɓur ǹyì ngga alúr ɓu te,

ìgum ndəng wong shàng.

Ndəng nnángnáng ɓut nchələng,

ngbà̱ng ndəng nə́k kà̱ ishimshe ìwá.

9Ukpa ìkum là pa̱,

<Mi ɓàk oza̱, mi kpán oza̱,

mi wur idur oza̱,

ká̱ nkpaktak iya̱m iva̱ n ɗom.

Mi dapchi ndokchi mi,

kang awo mi nzhì oza̱.>

10Te u ɓur ǹyì ɓu,

kang ìwá gún oza̱.

Oza̱ zhip wa acham aləbər

ka̱ ashe ìnang ìwá.

11Uda wa nji ɓu, áYawe, ka̱ ashe oga inan yà?

Uda wa nji ɓu, ká̱ ichumchum iga iyə́ryər,

uga nəm ayə́r uva yə́l ká̱ ashep,

uva i nnəm iya̱m iga nɗaktak yà?

12U yichi awo ari ɓu,

kang mbin ma̱ng oza̱.

13Ka̱ ashe mma̱n ɓu ngga nnandər

u ləp mpyal ónəm va̱ u fa ká̱ oza̱,

ká̱ ìkàm u pángchí oza̱

ka̱ atak ntəm ɓu ayə́ryər.

14Mbin fe te. Oza̱ tán,

kang ayər kpán oFilitti.

15Oponzhi oga aEdom təm ká̱ nləp ìchəgwak,

ayər kpán onəm oga mpyal aMowap,

onəm oga aKanana sərak le,

16ngga̱m ká̱ nləp ìchəgwak ru ka̱ apal oza̱.

Ka̱ atak ichumchum ìkàm ɓu

oza̱ sat pa̱ chə́k wa ipang

onəm ɓu watar kang, áYawe,

onəm va̱ u yáp watar kang.

17U ɓa ká̱ oza̱ kang u ɓal oza̱ ka̱ apal aɓam ɓu,

áYawe, atak va u nəm ka̱kul ntəm ɓu,

anəm uga nzhi, Atak Ayə́ryər va awo ɓu pak.

18UYawe i nəm ichumchum mbyet mbyet.>>

Nnap nshì aMiriya̱m

19Awalang va̱ ipəri áFirona, ká̱ akeke ipəri, ká̱ onəm oga nkwák ipəri táng ashe ìwá te, uYawe le nva̱ng ká̱ ndəng ìwá gún oza̱, kang oIsa̱rila chen kà̱ ìshimshe ìwá ka̱ apambin ngwomwom. 20Te uMiriya̱m uchar uga nlà ìchu Inan, ugənang aHaruna, yar akəshákkəshák ka̱ awo wò, kang nkpaktak ochar yar nvəva̱ng ká̱ akəshákkəshák ká̱ ngba̱p nza̱m. 21Te uMiriya̱m shì nnap-nshì óza̱.

<<Shì nnap-nshì ûYawe,

uza̱ kúkúr pa̱ mmá rup ka̱ na.

Ipəri ká̱ unəm uga nkúkwák

uza̱ swang ka̱ ashe ìwá.>>

Ndəng nɗuɗul

22Te uMusa dàp nkpánggang oIsa̱rila ka̱ anung Ìwá Ìsəksək, oza̱ ga ashe anyin aShur. Oza̱ chen ka̱ ashe anyin nra pa̱ nshatɗing, kang oza̱ ya ndəng ka̱t. 23Oza̱ ɓa aMara1 te, ndədəng ma̱t oza̱ kà̱ ngwa ka̱kul á ɗuɗul. 24Te onəm lwang nnap ka̱ apal áMusa, i là pa̱, <<Iza̱ í wá yà?>> 25Te uza̱ yə́ng ûYawe kang uYawe nyám ìkun iro á na. Uza̱ kakchi mandar ka̱ ashe ndəng te, ndəng chàng.

UYawe nak nnap nnəm óza̱, kang uza̱ ma oza̱ ka̱ ta. 26Te uza̱ là pa̱, <<A yà pa̱ o gwong achwang pa̱ dakdak kà̱ ìchu aYawe Inan wó, kang o nəm iya̱m va inəna̱n kà̱ mpipyal, o nak achwang kà̱ oga nnap mpakpakpakpak, o kpak nkpaktak oga nɗiɗyang te, mi yà ká̱ nlə̀p wó ká̱ arwa va̱ ka̱ n lə̀p oga aMasar ká̱ ka̱t. Ka̱kul mmami uYawe uva tàn wó.>>

27Te oza̱ ɓa aElim, atak va oga acé aga mɓəl ndəng kà̱, pa̱ gba̱pchi ama̱n pa̱ parəm, ká̱ oga ikún akulom ìsəm pa̱ ifangshat, kang oza̱ lə̀p apa̱k ka̱ ta ka̱ anung ndəng.