ಕ್ಹುದಾನಿ ಕ್ಹರಿನಿ ವಾಕ್ಯಾ
ರೊಮಾಪುರ 8
ಪವಿತ್ರಾತ್ಮನಿ ಅಧಿನಮಾನಿ ಜಿವನ
ತಿನಾಹುತಿ ಹಮ್ನಾ ಕ್ರಿಸ್ತ ಯೆಸುಮಾ ರ‍್ಹವಾಲಾ ಮನಕ್ಹೊನೆ ಅಪರಾದಿಯೊ ವ್ಹೈ ಕೈನ ಫೈಸಲೊ ನೈ ಥಾತೊ. ಕಾಕದ್ಯಾಮ ಯೆಸು ಕ್ರಿಸ್ತಮಾ ಜ಼ಲಮ ದಿವಾನಿ ಆತ್ಮಾನಿ ನಿಲಯ ಮನೆ ಮೌತನೆ ಲಿನ ಜಾ಼ವಾನಾ ಪಾಪನಾ ನಿಯಮಕ್ಹು ಮನೆ ಸ್ವತಂತ್ರ ಕರ‍್ಯುಸ. ಧರಮಶಾಸ್ತ್ರ ತಾಕತ ನೈಸೊ ವ್ಹತ್ತು. ಕಾಕದ್ಯಾಮ ಅಪ್ನಾ ಮಾನವ ಸ್ವಭಾವನಿಯೊ ಚಾಳಿಯೊಜ಼ ತಿನೆ ತಾಕತ ನೈಸೊ ಕರ‍್ಯು. ಇಮ್ಮ ರ‍್ಹತಾಮಾ, ಧರಮಶಾಸ್ತ್ರ ನೈ ಕರಾನು ಕ್ಹುದಾ ಕರ‍್ಯೊ. ಕ್ಹುದಾ ತಿನಾ ಸ್ವಂತ ದಿಕ್ಕರಾನೆಜ಼ ಪಾಪನಾ ಚಾಳಿಯೊನಾ ಮನಕ್ಹನಾ ಚಾಳಿಯೊಮಾ ಪಾಪನೆ ಪ್ರಾಯಶ್ಚಿತ ಥೈನ ವಳೈನ ದಿದ್ಯೊ. ತಿನಾಹುತಿ ಕ್ಹುದಾ ಪಾಪನೆ ಮೌತನೊ ಫೈಸಲೊ ದಿವಾನೆ ಮನಕ್ಹನಾ ಚಾಳಿಯೊನೆ ಉಪಯೊಗ ಕರ‍್ಯೊ. ಹಮ್ನಾ ಅಪ್ನಾ ಚಾಳಿಯೊ ಲಿಂಗತ ಜಿವ್ನಾ ಕರ‍್ಯಾವಾಚಿ ಪವಿತ್ರ ಆತ್ಮಾ ಕದಲ ಲಿಂಗತ ಜಿವ್ನಾ ಕರಾಲಾ ಅಪೊಮಾ ಧರಮಶಾಸ್ತ್ರನಾ ನಿಯಮೊ ಥೌ ಕೈನ ಕ್ಹುದಾ ಇಮ್ಮ ಕರ‍್ಯೊ. ತ್ಯುನಾ ಮನಕ್ಹೊ ಶಾರಿರಿಕನಿಯೊ ಚಾಳಿಯೊ ಲಿಂಗತ ಜಿವ್ನಾ ಕರಾಲಾ ಮನಕ್ಹೊ ತ್ಯುನಾ ಮನಕ್ಹೊನಾ ಸ್ವಭಾವನಿಯೊ ಚಾಳಿಯೊ ಸಂಗತಿಯೊನಾ ಹುತಿ ಯಕ್ಕಜ಼ ವಿಚಾರ ಕರಸ. ತೆನೈಸೊ ಆತ್ಮಾ ಕದಲ ಲಿಂಗತ ಜಿವ್ನಾ ಕರಾಲಾ ಮನಕ್ಹೊ ತ್ಯುನಾಕ್ಹು ಆತ್ಮಾ ಆಸ ಕರಾನಾ ಕಾಮೊನಾ ಹುತಿ ವಿಚಾರ ಕರಸ. ಯಕ್ಲಾನಿ ವಿಚಾರ ತಿನಾ ಪಾಪನಾ ಸ್ವಭಾವ ಲಿಂಗತ ರ‍್ಹಯುಮ ತಿನೆ ಆತ್ಮಿಕ ಮೌತ ಥಾವಸ. ತೆನೈಸೊ ಯಕ್ಲಾನಿ ವಿಚಾರ ಪವಿತ್ರ ಆತ್ಮಾನಾ ಹತ್ಮಾ ರ‍್ಹಯಲ ರ‍್ಹಯುಮ, ತಿನಾಮಾ ಜ಼ಲಮ ಸಮಾದಾನ ರ‍್ಹವಸ. ಕಾಕದ್ಯಾಮ ಯಕ್ಲಾನಿ ವಿಚಾರ ತಿನಿ ಪಾಪನಿ ಚಾಳಿನಾ ಹತ್ಮಾ ರ‍್ಹಯಲ ರ‍್ಹಯುಮ, ತೆ ಕ್ಹುದಾನೆ ವಿರೊದ ಥಯೊಸ. ತೆ ಕ್ಹುದಾನಿ ನಿಯಮನೆ ವಿಧೆಯ ಥಾತೊ ನೈ, ವಿಧೆಯ ಥಾವಾನೆ ಸಾದ್ಯಾಜ಼ ನತ್ತಿ. ತ್ಯುನಾ ಪಾಪನಾ ಚಾಳಿಯೊ ಲಿಂಗತ ರ‍್ಹವಾಲಾ ತೆ ಮನಕ್ಹೊ ಕ್ಹುದಾನೆ ಮೆಚ್ಚಸಾನೆ ಸಾದ್ಯಾಜ಼ ನತ್ತಿ. ತೆನೈಸೊ ತುಮೆ ತುಮಾರಾ ಪಾಪೊನಾ ಸ್ವಭಾವ ಲಿಂಗತ ನತ್ತಿ. ಕ್ಹುದಾನಿ ಆತ್ಮಾ ತುಮೊಮಾ ಕ್ಹರಿಬಿ ರ‍್ಹಯಲ ರ‍್ಹಯುಮ, ತುಮೆ ಆತ್ಮಾನಾ ಹತ್ಮಾ ಛೆ. ಕಿನಾಮಾಬಿ ಕ್ರಿಸ್ತನಿ ಆತ್ಮಾ ನೈ ರ‍್ಹಯುಮ, ತೆ ಕ್ರಿಸ್ತಮಾ ರ‍್ಹಯಲವಾಲೊ ನ್ಹವೈ. ತೆನೈಸೊ ಕ್ರಿಸ್ತ ತುಮೊಮಾ ರ‍್ಹಯೊಮ, ಆತ್ಮಾ ತುಮಾರಿ ಜಿವಿತ ಥಯುತು, ಕಾಕದ್ಯಾಮ ತುಮಾರಾ ಅಂಗೊ ಪಾಪಕ್ಹು ಮರ‍್ಯಾತುಬಿ ತುಮೆ ಕ್ಹುದಾನಾ ಕ್ಹಾತೆ ಛೆ. ಯೆಸುನೆ ಮೌತಕ್ಹು ಉಟಾಡಲ ಕ್ಹುದಾನಿ ಆತ್ಮಾ ತುಮೊಮಾ ರ‍್ಹಯಮ, ಕ್ರಿಸ್ತನೆ ಮೌತಕ್ಹು ಉಟಾಡಲವಾಲೊ ತುಮಾರಿ ಆತ್ಮಾ ಕಂತೊ ತುಮಾರಾ ಮರಲ ಅಂಗೊನೆ ಜ಼ಲಮ ದಿವಸ. ತಿನಾಹುತಿ ಮಾರಾ ಭಾಯೊ, ಭೆನೊ, ಅಪೊನೆ ಯೊಗ್ಯತಾ ಛೆ, ತೆನೈಸೊ ಅಪ್ನಿ ಮಾನವ ಸ್ವಭಾವ ಅಪೊನೆ ಪಸಂದ ಆಯಲ ಲಿಂಗತ ಜಿವ್ಸಾನೆ ಸಾಧ್ಯ ನತ್ತಿ. ತುಮಾರಿ ಪಾಪ್ನಿ ಸ್ವಭಾವ ಛಾಳಿಯೊ ಆಸ ಕರಾನಿಯೊ ಕೆಟ್ಟ ಕಾಮೊ ಕರಾನಾಹುತಿ ತುಮೆ ತುಮಾರಿ ಜಿವಿತ ಉಪಯೊಗ ಕರ‍್ಯಾಮ, ತುಮೆ ಆತ್ಮಿಕಮಾ ಮರೊಸಿ. ತೆನೈಸೊ ತುಮೆ ತುಮಾರಿ ಅಂಗನಾ ಮುಕಾಂತರ ಕರಾನಾ ಕೆಟ್ಟ ಕಾಮೊ ಪವಿತ್ರ ಆತ್ಮಾನಿ ಸಹಾಯಾ ಕ್ಹು ಹುಬ್ರಾಡ್ಯಾಮ ಜಿವ್ತಾ ರ‍್ಹವೊಶಿ. ಕುನ್ನ ತ್ಯುನೊನೆ ಕ್ಹುದಾನಿ ಆತ್ಮಾ ಚ಼ಲಾವಾನೆ ವಪ್ಸಿನ ದಿವಸ. ತ್ಯುನೆಜ಼ ಕ್ಹುದಾನಾ ಬಚ್ಚಾ ಥಯಾಸ. ಅಪೆ ಹೊಂದಿಲಿದಲ ಆತ್ಮಾ ವರಿ ಅಪೊನೆ ಗುಲಾಮೊ ಕರ‍್ತೊ ನೈ ವರಿ ಅಪೊಮಾ ಬೆ ಹುಟ್ಸಾತೊ ನೈ. ಅಪೆ ಹೊಂದಲಿದಲ ಪವಿತ್ರ ಆತ್ಮಾ ಅಪೊನೆ ಕ್ಹುದಾ ಬಚ್ಚಾಲಿಂಗತ ಕರಸ. ಎ ಆತ್ಮಾನಾ ಮುಲಕ ಅಪೆ ಕ್ಹುದಾನೆ ಬಾ ಬಲೈಯೆಸ. ಅಪೆ ಕ್ಹುದಾನಾ ಬಚ್ಚಾ ಥಯಾಸ ಕೈನ ಪವಿತ್ರ ಆತ್ಮಾಜ಼಼ ಅಪ್ನಾ ಆತ್ಮಾಮಾ ಸಾಕ್ಷಿ ದಿವಸ. ಅಪೆ ಕ್ಹುದಾನಾ ಬಚ್ಚಾ಼ ಥಯಾಮ, ಹೊ ಕ್ಹುದಾನೆ ವಾರಸ್ದಾರ ಥಯಾಸ. ವರಿ ಕ್ರಿಸ್ತನಾ ಕ್ಹಾತೆ ಛೆ, ಇಮ್ಮ ಥಯುಮ, ಕ್ರಿಸ್ತನಾ ಕ್ಹಾತೆ ಅಪೆ ವಾರಸ್ದಾರ ಥಯಾಸ. ತಿನಿ ಮಹಿಮಾಮಾ ವಾಟೊಲಿವಾ ವ್ಹೈ.
ಅಗಿ ಆವಾನಿ ಮಹಿಮಾ
ಮನೆ ಕಳಲ ತೆಕ್ಲು ಹಮ್ನಾ ಅಪೆ ತ್ರಾಸೊಮಾ ತಡ್ದಿಲಿವಾಡ್ಯಾಸ. ವರಿಬಿ ಅಪೊನೆ ಅಗು ದಿವಾನು ಮಹಿಮಾನೆ ಎ ಕಸ್ಟ ತ್ರಾಸೊ ಹೊಲಶ್ಯಾಮ ಎ ಮೊಜಾ಼ನೆ ಥಾತೊ ನೈ. ಕ್ಹುದಾ ತಿನಾ ಬಚ್ಚಾ಼ವೊನೆ ದೆಕಾಡಾನಾ ದಿನೊಮಾ ಕ್ಹುದಾನಿ ಕ್ಹಾರಿ ಸೃಷ್ಟಿ ಉತ್ಸಾಹಕ್ಹು ಆಸ ಕರಾಡ್ಯುಸ. ಕ್ಹಾರಿ ಸೃಷ್ಟಿಜ಼ ನಿರಾಶನೆ ಮ್ಹೈನ ಥೈನ ಛೆ. ಇಮ್ಮ ಥಯಲ ತಿನಿ ಸ್ವಂತ ಉದ್ದೆಶಕ್ಹು ವರಿ ಮನಸಕ್ಹು ನ್ಹವೈ, ಕ್ಹುದಾನಿ ಮನಸ ಕ್ಹುಜ಼ ವ್ಹೈ ವರಿ ಇಮ್ಮ ಥೌ ಕೈನ ಕ್ಹುದಾನಿ ಆಸ ವ್ಹತ್ತಿ. ತಿನಾಹುತಿ ಸೃಷ್ಟಿ ಹಜು಼ನಬಿ ಆಸ ಕರಾಡಿಸ. ಕ್ಹಾರಿ ಸೃಷ್ಟಿ ನಾಶಕ್ಹು ಬಿಡುಗಡೆ ಥೈನ ಕ್ಹುದಾನಾ ಬಚ್ಚಾವೊನೆ ಸ್ವತಂತ್ರ ಮಹಿಮಾ ಹೊಂದಿಲಿವಸ ಕವಾನು ವ್ಹೈ. ಕ್ಹಾರಿ ಸೃಷ್ಟಿ ಜ಼ನ್ನಾನಿ ಬಾಣತಿ ತ್ರಾಸ ಖಾತಿ ರ‍್ಹಯಲ ಹೆಣ ಮನಕ್ಹ ಲಿಂಗತ ದುಖ ಕ್ಹು ನೆಳ್ತಿ ಹಜು಼ನ ಲಕ್ಕಾ ಕೈದಾಡ್ಯುಸ ಕವಾನು ಅಪೊನೆ ಗ್ವತ್ತ ಛೆ. ಸೃಷ್ಟಿ ಯಕ್ಕಜ಼ ನೈ, ಅಪೆಬಿ ಅಪ್ನೊಮಾ ದುಖ ಕ್ಹು ನೆಳ್ತಾ ಕೈದಾಡ್ಯಾಸ. ಕ್ಹುದಾನಿ ವಾತನಿ ಪೈಲಾನೊ ಭಾಗ ಥಯಲ ಕ್ಹುದಾನಿ ಆತ್ಮಾನೆ ಅಪೆ ಹೊಂದಿಲಿದ್ಯಾಸ. ಅಪೊನೆ ತಿನಾ ಸ್ವಂತ ಬಚ್ಚಾ಼ ಥೈನ ಕರಿಲಿವಾನೆ ಕ್ಹುದಾ ಕರತೊ ರ‍್ಹಯಲ ಕಾಮ ಪುರಾ ಥಾವಾನುಜ಼ ಕದ್ಯಾಮ, ಅಪ್ನಾ ಅಂಗನೆ ಥಾವಾನೆ ಬಿಡುಗಡೆಜ಼ ಅಪೆ ಕೈದಾಡ್ಯಾಸ. ಅಪೆ ರಕ್ಷಣೆ ಹೊಂದಿಲಿದ್ಯಾಸ ವರಿ ಅಪೊನೆ ಹಜು಼ನಬಿ ತೆ ಆಸ ಛೆ. ಅಪೆ ಶಾನಾಹುತಿ ಕೈದಾಡ್ಯಾಸ ತೆ ದೆಕಾಲಾ ರ‍್ಹಯಾಮ, ತೆ ಕ್ಹರಿನಿ ಆಸ ನ್ಹವ್ಹೈ. ಮನಕ್ಹೊ ತ್ಯುನೆ ಹಮ್ನಾ ಹೊಂದಿಲಿದಲ ಕೈಜ಼ ಆಸ ಕರಸಕೆಸ ಸು? ತೆನೈಸೊ ಅಪೆ ಹಜು಼ನಬಿ ನೈ ಹೊಂದಿಲಿದಲ ರ‍್ಹಯಲ ಆಸ ಕರತಾ ತಡ್ದಿಲಿನ ತಿನಾ ಹುತಿ ಕೈದಾಡ್ಯಾಸ. ತಿನಾ ಲಿಂಗತಜ ಅಪೊಮಾ ತಾಕತ ಕಮ ರ‍್ಹಯಲ ಹುತಿ ಅಪ್ನಿ ಕಮ ತಾಕತಮಾ ಪವಿತ್ರ ಆತ್ಮಾ ಅಪೊನೆ ಸಹಾಯಾ ಕರಸ. ಅಪೆ ಕಿಮ್ಮ ಪ್ರಾಥನಾ ಕರು ವರಿ ಶಾನಾ ಹುತಿ ಪ್ರಾಥನಾ ಕರು ಕವಾನು ಅಪೊನೆ ಗ್ವತ್ತ ನತ್ತಿ. ತೆನೈಸೊ ಪವಿತ್ರ ಆತ್ಮಾ ತೆ ಅಪ್ನಾ ಹುತಿ ಕ್ಹುದಾನೆ ಕವಾನೆ ಥಾಯೆ ನೈಸೊ ಮನಸೆ ಮಾಂಗಿಲಿವಸ. ಅಂತರಂಗ ದೆಕಾಲೊ ಕ್ಹುದಾನೆ ಪವಿತ್ರ ಆತ್ಮಾನೆ ಮನಸ್ಮಾ ರ‍್ಹಯಲ ಕ್ಹಾರುಜ಼ ಗ್ವತ್ತ ಛೆ, ಕಾಕದ್ಯಾಮ ಕ್ಹುದಾನಿ ಚಿತ್ತ ಲಿಂಗತಜ಼ ಪವಿತ್ರ ಆತ್ಮಾ ಕ್ಹುದಾನಾ ಮನಕ್ಹೊನಾ ಹುತಿ ಕ್ಹುದಾಕನ ಮಾಂಗಿಲಿವಸ. ಕ್ಹುದಾ ತಿನೆ ಮಯಾ ಕರಾಲಾವೊನಾ ಹುತಿ ಚೊ಼ಕಾ ಕ್ಹು ಹರಿ ಯಕ್ಕ ಕಾಮ ಆಸಾನ ಕರಸ ಕೈನ ತುಮೊನೆ ಗ್ವತ್ತ ಛೆ. ತೆ ಮನಕ್ಹೊ ಕ್ಹುದಾಜ಼ ಇನಿಲಿದ್ಯೊಸ, ಕಾಕದ್ಯಾಮ ತೆ ತಿನು ಉದ್ದೆಶ ವ್ಹತ್ತು. ಕ್ಹುದಾ ಪೈಲಾತೊಜ಼ ತೆ ಭಾಯೊನೆ ಇನಿಲಿದ್ಯೊತೊ ವರಿ ತೆ ಮನಕ್ಹೊ ಇನಾ ದಿಕ್ರಾನಾ ಲಿಂಗತ ರ‍್ಹೌ ಕೈನ ಫೈಸಲೊ ಕರ‍್ಯೊ. ಇಮ್ಮ ರ‍್ಹತಾಮಾ, ಬರೊಕ್ಹಾಮಾ ರ‍್ಹಯಲವಾಲಾವೊಮಾ ತಿನೊ ದಿಕ್ಕರೊಜ಼ ಮ್ಹೊಟೊ ವ್ಹೈ. ಇಮ್ಮ ರ‍್ಹತಾಮಾ ಕಿನೆ ತೆ ಬಲಾವಸ ತಿನೆ ಇನಿಲಿದ್ಯೊಸ ವರಿ ತ್ಯುನೊನೆ ತೆ ನಿತಿವಂತ ಥೈನ ಕರಸ ವರಿ ಮಹಿಮಾಮಾಬಿ ಬಲೈಲಿವಸ.
ಕ್ರಿಸ್ತ ಯೆಸುಮಾ ಕ್ಹುದಾನಿ ಮಯಾ
ಇಮ್ಮ ರ‍್ಹತಾಮಾ ಇನಾಹುತಿ ಅಪೆ ಸು ಕಯ್ಯೆ? ಕ್ಹುದಾ ಅಪ್ನಾ ಕ್ಹಾತೆ ರ‍್ಹತಾಮಾ, ಅಪೊನೆ ವಿರುದ್ದ ಕರಾಲಾ ಕುನ್ನ ವ್ಹೈ. ಕ್ಹುದಾ ತಿನಾ ಸ್ವಂತ ದಿಕ್ರಾನೆ ವಚಾ಼ಡಿ ಲಿದ್ಯಾವಾಚಿ ಅಪೊನೆ ಕ್ಹಾರಾವೊನಾ ಹುತಿ ವಪ್ಸಿನ ದಿದ್ಯೊ. ತಿನಾಹುತಿ ಹಮ್ನಾ, ಕ್ಹುದಾ ಯೆಸುನಾ ಕ್ಹಾತೆ ಅಪೊನೆ ಕ್ಹಾರುಜ಼ ಕ್ಹರಿಬಿ ದಿದ್ಯಾವಾಚಿ ರ‍್ಹವಸ ಸು? ಕ್ಹುದಾ ಇನಿಲಿದಲ ಮನಕ್ಹೊನಾ ಉಪ್ಪರ ಕುನ್ನಜ಼ ದೊಷ ನೈ ಘಾಲಸಕ್ಕತಾ? ತ್ಯುನೊನೆ ದೊಷಿ ನ್ಹವೈ ಕೈನ ಕ್ಹುದಾಜ಼ ಫೈಸಲೊ ಕರ‍್ಯೊಸ. ಕ್ಹುದಾನಾ ಮನಕ್ಹೊ ದೊಷಿ ವ್ಹೈ ಕೈನ ಕವಾಲಾ ಕುನ್ನ ವ್ಹೈ? ಕ್ರಿಸ್ತ ಯೆಸು ಅಪ್ನಾ ಹುತಿ ಜ಼ಲಮ ದಿದ್ಯೊ. ತೆಕ್ಲುಜ಼ ನ್ಹವ್ಹೈ, ತೆ ಮರಲವಾಲಾವೊಮಾತೊ ಜಿವ್ತೊ ಥೈನ ಉಟಿನ ಆಯೊ. ಹಮ್ನಾ ತೆ ಕ್ಹುದಾನಾ ಸಿದಾ ಬಗಲ ಶೆ ವರಿ ಅಪ್ನಾ ಹುತಿ ಕ್ಹುದಾಕನ ಮಾಂಗಿಲಿವಾಡೊಸ. ತಿಮ್ಮ ರ‍್ಹಯಮ ಕ್ರಿಸ್ತನಿ ಮಯಾಕ್ಹು ಅಪೊನೆ ಜು಼ದಾ ಕರಾಲಾ ಕುನ್ ವ್ಹೈ? ತ್ರಾಸೊ ತೆನೈಸೊ ಕಷ್ಟ ತೆನೈಸೊ ಕಿರಿಕಿರಿ ತೆನೈಸೊ ಭುಕ್ಕಕು ರ‍್ಹವಾನು ತೆನೈಸೊ ಗರಿಬಿ ತೆನೈಸೊ ಮುಸಿಬತ ತೆನೈಸೊ ಮೌತನು ತ್ರಾಸ ಛೆಸು? ಕ್ಹುದಾ, ತಾರಾ ಹುತಿ ಹಮೆ ದಿನ್ನಾ ಮೌತನೆ ಗುರಿ ಥಯಾಸ; ಮನಕ್ಹೊ ಹಮೊನೆ ಕಾಟಾನಾ ಬಕ್ಕರಿಯೊ ಲಿಂಗತ ಅಪ್ನಾ ಕ್ಹಾತೆ ಥಾವಾಡ್ಯುಸ. ಕಿರ್ತನೆ 44:22 ತೆನೈಸೊ ಅಪೊನೆ ಮಯಾ ಕರಲವಾಲಾ ಕ್ಹುಜ಼ ಎ ಕ್ಹಾರಿ ವಿಷಯಮಾ ಜಯಾ ಛೆ. ಕಯುಜ಼ ತಿನಿ ಮಯಾಕ್ಹು ಅಪೊನೆ ಜು಼ದು ಕರಾನೆ ಸಾಧ್ಯ ನತ್ತಿ ಕೈನ ಮಿ ತುಮೊನೆ ಕ್ಹರಿಜ಼ ಕೌಸ; ಮೌತ ನೈತೊ ಜ಼ಲಮ ನೈತೊ, ದೆವದುತೊ ನೈತೊ ಬಿಜಾ಼ ಸ್ವರ್ಗನಾ ಅದಿಕಾರಿಯೊ ನೈತೊ ಕ್ಹಾರಾ ಅದಿಕಾರಿಯೊ ನೈತೊ ಹಮ್ನಾ ನೈತೊ ಭವಿಷ್ಯ, ಮಹತ್ವನಿ ಸಂಗತಿಯೊ ರ‍್ಹೈನೆಕಾ, ಉಪ್ಪರ‍ಲ್ಯು ಲೊಕ ರ‍್ಹೈನೆಕಾ ಲೊಕ ರ‍್ಹೈನೆಕಾ ಬಿಜು಼ ಕಯುಬಿ ಸೃಷ್ಟಿ ರ‍್ಹೈನೆಕಾ ಅಪೊನೆ ಅಪ್ನೊ ಕರತಾ ಥಯಲ ಕ್ರಿಸ್ತ ಯೆಸುಮಾ ದಿಕ್ಹಿನ ಆಯಲ ಕ್ಹುದಾನಿ ಮಯಾಕ್ಹು ದುರ ಕರಾನೆ ಥಾತುಜ಼಼ ನೈ ಕೈನ ಕ್ಹರಿಜಮಾಜ಼ ಮನೆ ಗ್ವತ ಛೆ.
ಕ್ಹುದಾನಿ ಕ್ಹರಿನಿ ವಾಕ್ಯಾ. Copyright © 2023 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.