ರೊಮಾಪುರ 6

ಪಾಪನಾ ಪಾಲೆ ಮರಲವಾಲಾ ತೆನೈಸೊ ಕ್ರಿಸ್ತಮಾ ಜಿವ್ತಾ ರ‍್ಹಯಲವಾಲಾ

1ತಿಮ್ಮ ರ‍್ಹಯಾಮ ತುಮಾರಿ ವಿಚಾರ ಸು ವ್ಹೈ? ಕ್ಹುದಾ ಅಪೊನೆ ಘನ್ನಿ ಮರಗಾ ದೆಕಾಡಸ ಕೈನ ಅಪೆ ಹಜು಼ನ ಪಾಪ ಕರತಾ ರ‍್ಹೌ ಸು? 2ಕ್ಹರಿಜ಼ ನೈ! ಅಪೆ ಅಪ್ನಾ ಪಾಚ಼ಲ್ಯಾ ಪಾಪನಿ ಜಿವ್ನಾನಾ ಪಾಲೆ ಮರಿ ಗಯಾಸ. ತಿಮ್ಮ ರ‍್ಹಯಾಮ, ಅಪೆ ಪಾಪಮಾಜ಼ ಜಿವ್ನಾ ಕರಾನು ಕಿಮ ಸಾದ್ಯ ಛೆ? 3ಅಪೆ ಬಾಪ್ತಿಸ್ಮ ಕರಲೆತಾಮಾ, ಕ್ರಿಸ್ತಮಾ ಪಾಲ ಲಿವಾಲಾ ಥಯಾ ಕವಾನು ತುಮೆ ಇಕ್ಹರಿ ಪಡ್ಯಾ ಸು? ಅಪ್ನಿ ಬಾಪ್ತಿಸ್ಮ ಕ್ಹು ತಿನಾ ಮರಣಮಾ ಪಾಲ ಲಿವಾಲಾ ಥಯಾ. 4ತಿಮ್ಮ ರ‍್ಹತಾಮಾ, ಅಪೆ ಬಾಪ್ತಿಸ್ಮ ಕರಲೆತಾಮಾ, ಅಪೊನೆ ಕ್ರಿಸ್ತನಾ ಕ್ಹಾತೆ ಸಮಾದಿ ಥೈ ವರಿ ಅಪೆ ತಿನಾ ಮರಣಮಾ ಪಾಲ ಲಿವಾಲಾ ಥಯಾ. ಅಪೆ ಜಿವ್ತಾ ಥೈನ ಉಟಿನ ನಯಿ ಜಿವ್ನಾ ಕರುಕೈನ ಅಪೊನೆ ಕ್ರಿಸ್ತ ಕ್ಹಾತೆ ಸಮಾದಿ ಥೈ. ಕ್ರಿಸ್ತ ಬಾನಿ ಅದ್ಬುತ ಕರಾನಿ ತಾಕತ ಕ್ಹು ಮರ‍ಲವಾಲಾವೊಮಾತೊ ಜು಼ವ್ತೊ ಥೈನ ಆಯಲ ಲಿಂಗತ ಅಪೆ ಬಿ ಜಿವ್ತಾ ಥೈನ ಆಯಾಸ. 5ಕಿಮ್ಮ ಅಪೆ ಕ್ರಿಸ್ತ ಮರಣನಾ ಪಾಲ ಥಯಾಸ ತಿಮ್ಮಜ಼ ತೆ ಜಿವ್ತೊ ಥೈನ ಆಯಲ ಲಿಂಗತ ಅಪೆಬಿ ಜಿವ್ತಾ ಥೈನ ಆಯಲ ತಿನಾ ಪಾಲಮಾ ಮಳ್ಯಾ. 6ಅಪ್ನಿ ಜು಼ನ್ನಿ ಜಿವಿತ ಕ್ರಿಸ್ತನಾ ಕ್ಹಾತೆ ಶಿಲುಬಿಪರ ಮರಿ ಗೈಸ ಕವಾನು ಅಪೊನೆ ಗ್ವತ್ತ ಛೆ. ಅಪ್ನಿ ಪಾಪನಿ ಚಾಳಿಕ್ಹು ಅಪೊಪರ ಕಯೊ ಅದಿಕಾರ ರ‍್ಹೌ ನೈ ಕೈನ ಅಪೆ ಅಗಾ ಪಾಪನಾ ಗುಲಾಮೊ ಥೈ ರ‍್ಹೌ ನೈ ಕೈನ ಇಮ್ಮ ಥಯೊ. 7ಪಾಪನಾ ಪಾಲೆ ಮರಲವಾಲೊ ಪಾಪನಾ ಹತ್ಮಾತೊ ಛೊಡೈಲಿದ್ಯೊಸ. 8ಅಪೆ ಕ್ರಿಸ್ತನಾ ಕ್ಹಾತೆ ಮರಿ ಗಯಾ, ವರಿ ಅಪ್ನೊ ಬರೊಕ್ಹೊ ತಿನಾ ಕ್ಹಾತೆ ಜಿವ್ತೊ ಕರಸ ಕವಾನು ಕ್ಹರಿಜ಼ ಛೆ. 9ಕ್ರಿಸ್ತ ಮರಲವಾಲಾವೊಮಾತೊ ಜಿವ್ತೊ ಥೈನ ಉಟಿನ ಆಯೊ. ತೆ ವರಿ ಮರಾನೆ ಕೆಳಾಮಾಜ಼ ಸಾದ್ಯ ನತ್ತಿ ಕವಾನು ಅಪೊನೆ ಗ್ವತ್ತ ಛೆ. ಹಮ್ನಾ ಮರಣನೆ ತಿಪರ ಕಯೊ ಅದಿಕಾರ ನತ್ತಿ. 10ಹೊ, ಕ್ರಿಸ್ತನೆ ಹಬ್ದಾ ಪಾಪನಿ ತಾಕತ ಸೊಲ್ಸಾನೆ ಸಾದ್ಯ ನತ್ತಿ. ಹಮ್ನಾ ತಿಮಾ ನೈ ಜಿವ್ನಾ ಛೆ. ಕ್ಹುದಾನಾ ಕ್ಹಾತೆ ಜಿವ್ತಾ ರ‍್ಹವಾನು ತೆಜ಼ ನೈ ಜಿವಿತ ವ್ಹೈ. 11ತಿನಾ ಲಿಂಗತಜ಼ ತುಮೆಬಿ ತುಮೊನೆ ಪಾಪನಿ ತಾಕತನಿ ಪಾಲೆ ಮರ‍್ಯಾಸ ಕೈನ ವರಿ ಪಾಪನಿ ಅದಿಕಾರಮಾ ನಕೊ ಚಾ಼ಲೊ ಕ್ರಿಸ್ತ ಯೆಸುನಾ ಮುಕಾಂತರ ಕ್ಹುದಾನಾ ಕ್ಹಾತೆ ಜಿವ್ನಾ ಕರಿಯೆಸ ಕೈನ ತಿಳ್ದಿಲಿವೊ. 12ತೆನೈಸೊ ಪಾಪ ತುಮಾರಾ ಮರಾನಾ ಅಂಗಮಾ ಇತ್ತಿ ಉಪ್ಪರ ಅದಿಕಾರ ಕರು ನೈ, ತಿನಾಹುತಿ ತುಮೆ ತುಮಾರಾ ಸ್ವಾಭಾವಿಕ ಸ್ವಭಾವನಾ ಆಸೊ ಪುರಾ ಕರು. 13ತುಮಾರು ಅಂಗನು ಭಾಗನೆ ಪಾಪನಿ ಸೆವೆ ಕರಾನೆ ವಪ್ಸಿನ ದಿವೊನಕೊ. ತುಮಾರು ಅಂಗ ಪಾಪನೆ ವಪ್ಸಿನ ಕೆಟ್ಟ ಕಾಮನೆ ಚ಼ಲಾವಾನು ಚಿ಼ಜ ಕರಿಲಿವೊ ನಕೊ. ತಿನಾ ಬದ್ಲಿ ಮರಿನ ಹಮ್ನಾ ಜಿವ್ತೊ ಥೈನ ಉಟಿನ ಆಯಲ ಲಿಂಗತ ತುಮೊನೆ ಕ್ಹುದಾನೆ ವಪ್ಸಿನ ದಿಪಾಡೊ. ಚೊ಼ಕಾ ಕಾಮೊ ಕರಾನೆ ತುಮಾರು ಅಂಗ ಸಾಮನ ಥೈನ ಕ್ಹುದಾನೆ ವಪ್ಸಿನ ದಿವೊ. 14ಪಾಪ ತುಮಾರೊ ಮಾಲಕ ಥೈನ ರ‍್ಹತೊ ನೈ. ಕಾಕದ್ಯಾಮ ತುಮೆ ಧರಮಶಾಸ್ತ್ರನೆ ಅದಿನ ನ್ಹವೈ ತೆನೈಸೊ ಹಮ್ನಾ ತುಮೆ ಮರಗಾಮಾ ಜಿವ್ನಾ ಕರಾಲಾ ವ್ಹೈ. 15ಇಮ್ಮ ರ‍್ಹತಾಮಾ ಹಮೆ ಸು ಕರಿಯೆ? ಅಪೆ ಧರಮಶಾಸ್ತ್ರನೆ ಅದಿನಮಾ ರ‍್ಹಯಾವಾಚಿ಼ ಕ್ಹುದಾನಿ ಮರಗಾನಿ ಅದಿನಮಾ ರ‍್ಹಯಲ ಹುತಿ ಪಾಪ ಕರುಸು? ಕ್ಹರಿಜ಼ ನೈ!

ನಿತಿನಾ ಗುಲಾಮೊ

16ತುಮೆ ಕಿನೆತುಬಿ ತಿನಾ ಆಗನ್ಯಾ ಪಾಲ್ಸಾನೆ ವಪ್ಸಿನ ದಿವೊಶಿ. ತೆ ತುಮೊನೆ ಮಾಲಕ ಥಾವಸ ವರಿ ತುಮೆ ತಿನೆ ಗುಲಾಮೊ ಥಾವೊಶಿ. ತಿನಾಹುತಿ ತುಮೆ ಪಾಪನೆ ಗುಲಾಮೊ ಥಾವೊಶಿ ತಿನು ಪರಿಣಾಮ ಮೌತ ಥಯುಸ. ತೆನೈಸೊ ವಿಧೆಯತೆನೆ ಗುಲಾಮೊ ಥಾವಾನು ತೆ ತುಮೊನೆ ಕ್ಹುದಾನಿ ಸನ್ನಿಧಿಮಾ ನಿತಿವಂತವಾಲಾ ಕೈನ ಫೈಸಲೊ ಕರಸ. 17ಪಾಚ್ಲಯಾ ದಿನೊಮಾ ತುಮೆ ಪಾಪೊನೆ ಗುಲಾಮೊ ವ್ಹತ್ತಾ. ಪಾಪ ತುಮೊನೆ ತಿನಾ ಹತೊಟಿಮಾ ಧರಲಿದ್ಯುತು. ತುಮೊನೆ ಕದಲ ವಿಷಯನೆ ತುಮೆ ಕ್ಹಾರಿ ತರಾಮಾ ವಿದೆಯ ಥಯಲ ಹುತಿ ಕ್ಹುದಾನೆ ಸ್ತೊತ್ರಾ ಥಾವಾದೆ. 18ತುಮೆ ಪಾಪಕ್ಹು ಬಿಡುಗಡೆ ಥಯಾಸ. ಹಮ್ನಾ ತುಮೆ ನಿತಿನೆ ಗುಲಾಮೊ ಥಯಾಸ. 19ಮನಕ್ಹೊನೆ ಕಳಲ ಉದಾಹರಣೆ ಮುಲಕ ಮಿ ಎ ತುಮೊನೆ ಕವಾಡ್ಯೊಸ. ಪಾಚ಼ಲ್ಯಾ ಕಾಲ್ಮಾ ತುಮೆ ತುಮಾರಾ ಅಂಗಕ್ಹು ಪಾಪನೆ ಕೆಟ್ಟ ಕಾಮೊನೆ ವರಿ ದುಷ್ಟ ಕಾಮೊನೆ ಗುಲಾಮ ಲಿಂಗತ ವಪ್ಸಿನ ದಿದ್ಯಾತಾ ತಿನಾ ಲಿಂಗತಜ಼ ಹಮ್ನಾ ತುಮಾರಾ ಅಂಗೊನಾ ಭಾಗನೆ ಪವಿತ್ರ ಆತ್ಮಾನೆ ವಪ್ಸಿನ ದಿದ್ಯಾಸ. 20ತೆಳಾಮಾ ತುಮೆ ಪಾಪೊನೆ ಗುಲಾಮೊ ವ್ಹತ್ತಾ ವರಿ ನಿತಿನೆ ಹತೊಟಿಮಾ ಪಡ್ಯಾನ್ಹೊತಾ. 21ತುಮೆ ಹಮ್ನಾ ಸರಮಾವಾನಾ ಕಾಮೊ ಕರೆ ನೈಸೊ ತುಮೆ ಸು ಪಡ್ದಿಲಿದ್ಯಾಸ? ತೆ ಕಾಮೊನು ಪರಿಣಾಮ ಮೌತ ವ್ಹೈ! 22ತೆನೈಸೊ ಹಮ್ನಾ ತುಮೆ ಪಾಪಕ್ಹು ಬಿಡುಗಡೆ ಥೈನ ಕ್ಹುದಾನಾ ಗುಲಾಮೊ ಥಯಾಸ. ಇನಾಹುತಿ ತುಮೊನೆ ಪರಶುಧ್ದ ಜಿವನ ಹಮೆಶಾನು ಜ಼ಲಮ ಮಳಸ. 23ಕಾ ಕದ್ಯಾ ಪಾಪನಿ ಪಗಾರ ಮರಣ ವ್ಹೈ. ತೆನೈಸೊ ಕ್ಹುದಾ ಫ್ರಿ ದಿವಾನು ಅಪ್ನೊ ಪ್ರಭು ಥಯಲ ಕ್ರಿಸ್ತ ಯೆಸುಮಾ ರ‍್ಹಯಲ ಹಮೆಶಾನೊ ಜ಼ಲಮ ವ್ಹೈ.