ಇಬ್ರಿಯ 5

1ಹರಿಯಕ್ಕ ಖಾಸ ಯಾಜಕನೆ ಮನಕ್ಹೊಮಾತೊ ಇನಿಲಿನ ಕ್ಹುದಾನೆ ಸಂಬಂಧ ರ‍್ಹಯಲ ಕಾಮೊ ಮನಕ್ಹೊನಾ ಹುತಿ ಕರಾನೆ ಹುಬ್ರಾಡಸ. ತೆ ಯಾಜಕ ತ್ಯುನಾ ಪಾಪೊನಾ ಹುತಿ ಕ್ಹುದಾನೆ ಕಾಣಿಕೆ ವರಿ ಬಲಿಯೊ ದಿವಸ. 2ತೆ ಕ್ಹಾರಾ ಮನಕ್ಹೊ ಲಿಂಗತ ತಾಕತ ನೈಸೊವಾಲೊ ಥಯಲ ಹುತಿ ನೈ ತಿಳ್ದಿಲಿವಾಲಾ ವರಿ ವಾಟ ಚು಼ಕಲ ಮನಕ್ಹೊನಾ ಹುತಿ ಶಾಂತಕ್ಹು ತಡ್ದಿಲಿವಾನೆ ಶಕ್ತ ಥಯೊಸ. 3ತಿನಾಹುತಿ ತೆ ತಾಕತ ನೈಸೊವಾಲೊ ಥಯಲ ಹುತಿ ತೆ ಮನಕ್ಹೊನಾ ಪಾಪೊನಾ ಹುತಿ ಯಕ್ಕಜ಼ ನೈ ತಿನಾ ಸ್ವಂತ ಪಾಪೊನಾ ಹುತಿಬಿ ಬಲಿಯೊ ಚ಼ಡಾವಸ. 4ಕುನ್ನಜ ತಿನಾಕ್ಹು ತೆಜ಼ ಮ್ಹೊಟೊ ಯಾಜಕ ಥಾವಾನೆ ಥಾತು ನೈ, ಕೆಳ್ಳಕಾ ಕ್ಹುದಾ ತಿನೆ ಇನಿಲೆತೊ ನೈ. ಕಿಮ್ಮ ಆರೊನನೆ ಇನಿಲಿದಲ ಲಿಂಗತ ತೆ ಮನಕ್ಹನೆ ಇನಿಲಿವಸ. 5ಕ್ರಿಸ್ತಬಿ ಇನಾ ಲಿಂಗತ ನೆಮ್ಸಲವಾಲೊ ವ್ಹೈ. ತೆ ಖಾಸ ಯಾಜಕ ವ್ಹೈ ಕೈನ ತಿನೆ ತೆಜ಼ ಇನಿಲಿದ್ಯೊ ನೈ, ತೆನೈಸೊ ಕ್ಹುದಾ ತಿನೆ ಇನಿಲಿದ್ಯೊ. ಕ್ಹುದಾ ಕ್ರಿಸ್ತನೆ ಅಮ್ಮ ಕದ್ಯೊ; ತು ಮಾರೊ ದಿಕ್ರೊ ವ್ಹೈ. ಆಜ಼ ಮಿ ತಾರೊ ಬಾ ಥಯೊ.”

6ಪವಿತ್ರ ಗ್ರಂಥಮಾ ಬಿಜೆಕ ಬಗಲ ಕ್ಹುದಾ ಅಮ್ಮ ಕವಸ; ತು ಮೆಲ್ಕಿಜೆದಕ ಲಿಂಗತ ಹಮೆಶಾಬಿ ಮ್ಹೊಟೊ ಯಾಜಕ ಥೈನ ರ‍್ಹಸಿ.” 7ಕ್ರಿಸ್ತ ಭುಲೊಕಮಾ ಜಿವನಾ ಕರತಾಮಾ, ಕ್ಹುದಾಕನ ಪ್ರಾಥನಾ ಕರಿನ ಮದತ ಮಾಂಗಿಲಿದ್ಯೊ. ತೆ ಘನ್ನೊ ಹಲಬ್ತೊ ಜೊ಼ರ ರೊತೊ ಕ್ಹುದಾಕನ ಪ್ರಾರ್ಥನಾ ಕರ‍್ಯೊ. ತಿನೆ ಮೌತಮಾತೊ ವಚಾ಼ಡ ಕೈನ ತಿನಾಹುತಿ ತೆ ಕ್ಹುದಾನಾ ಚಿತ್ತ ಲಿಂಗತ ತೆ ಕ್ಹಾರು ಕರಲವಾಲೊ ಥಯೊ. ವರಿ ಸ್ವಭಾವಕ್ಹು ವ್ಹಂದ್ಯೊ. ತಿನಾಹುತಿ ಕ್ಹುದಾ ತಿನಾ ಪ್ರಾರ್ಥನಾನೆ ಜವಾಬ ದಿದ್ಯೊ. 8ತೆ ಕ್ಹುದಾನೊ ದಿಕ್ರೊ ಥಯೊತಬಿ ಕಸ್ಟ ವರಿ ತ್ರಾಸಕ್ಹು ವಚಾಡಿಲಿದ್ಯಾವಾಚಿ ತಿಮಾಜ಼ ವಿದೆಯ ಥಾವಾನು ಶಿಕ್ಕಿಲಿದ್ಯೊ. 9ಅಮ್ಮ ತೆ ಪರಿಶುದ್ಧ ವ್ಹತ್ತೊ. ಕ್ಹುದಾನೆ ವಿದೆಯ ಥಾವಾನಾ ಕ್ಹಾರಾ ಮನಕ್ಹೊ ಹಮೆಶಾ ರ‍್ಹಯಲ ರಕ್ಷಣೆ ವ್ಹಂದಿಲಿವಾನೆ ತೆಜ಼ ಕಾರಣ ವ್ಹೈ. 10ವರಿ ಕ್ಹುದಾ ತಿನೆ ಮೆಲ್ಕಿಜೆದೆಕ ಲಿಂಗತ ಮ್ಹೊಟೊ ಯಾಜಕ ಕರ‍್ಯೊ.

ಶೊಧನೆಮಾ ಪಡಾನಾ ಹುತಿ ಹುಷಾರ

11ಎ ವಿಷಯನಾ ಹುತಿ ಹಮೆ ತುಮೊನೆ ಕವಾನು ಘನ್ನು ಛೆ. ತೆನೈಸೊ ತುಮೆ ಅನೆ ತಿಳ್ದಿಲಿವಾನೆ ಕೊಶಿಸ ಕರಾನಾಹುತಿ ರ‍್ಹಯಲ ಕ್ಹಾರು ಕವಾನು ಘನ್ನು ಕಷ್ಟ ಛೆ. 12ತುಮೊನೆ ಟೈಮ ಚಾ಼ಯೆ ಥಯಲ ಅಕ್ಲು ಹಮ್ನಾಜ಼ ತುಮೆ ಉಪದೆಶ ಕರಾಲಾ ಥೌ. (ತೆನೈಸೊ ಹಜು಼ನ ತುಮೆ ಥಯಾ ನತ್ತಿ.) ಅಮ್ಮ ರ‍್ಹತಾಮಾ ಕ್ಹುದಾನಾ ಉಪದೆಶನೆ ಪೈಲಾ ಪಾಠತಾ ಜರುರತ ವ್ಹತ್ತು. ದುದ್ದ ಲಿಂಗತ ರ‍್ಹಯಲ ಉಪದೆಶ ಹಮೆ ತುಮೊನೆ ಕರಲಾ ಥೌ. ತುಮೆ ಘಟ್ಟ್ಟ ಅನ್ನ ಕ್ಹಾವಾಲಾ ನತ್ತಿ ಥಯಾ. 13ತುಮೆ ದುದ್ದ ಪಿವಾಲಾ ಬಚ್ಚಾ಼ವೊ ಲಿಂಗತ ಛೆ. ತುಮೆ ಸುಜ಼ ತಿಳ್ದಿಲಿದ್ಯಾವಾಚಿ ಕೆಟ್ಟ ಸುವೈ ವರಿ ಚೊ಼ಕು ಸು ವ್ಹೈ ಕವಾನು ತುಮೊನೆ ಗ್ವತ್ತ ನತ್ತಿ. 14ತೆನೈಸೊ ಘಟ್ಟ್ಟ ರ‍್ಹಯಲ ಅನ್ನ ಜಾಂಜಿಮಾನೊ ವ್ಹೈ ಬಚ್ಚಾವೊನೆ ನ್ಹವೈ, ಕದ್ಯಾಮ ಕೆಟ್ಟ ವರಿ ಚೊ಼ಕಾನೆ ಅನುಭಕ್ಹು ತಿಳ್ದಿಲಿನ, ತಿನಾ ಲಿಂಗತ ಚಾ಼ಲಾಲಾವೊನಾ ಹುತಿ ವ್ಹೈ.