1 ಪೆತ್ರಾ 5

ಕ್ಹುದಾನಾ ಮನಕ್ಹೊನು ಹಿಂಡ

1ತುಮಾರಿ ಸಬೆಮಾ ಮ್ಹೊಟಾ ರ‍್ಹಯಲವಾಲಾವೊನಾ ಮಿ ದಕ್ಹಿಯೊ ವಾತೊ ಕೌ ಕೈನ ಛೆ. ಮಿ ಯಕ್ಲೊ ಮ್ಹೊಟೊ ಥಯೊಸ. ಮಿ ಕ್ರಿಸ್ತನೆ ತ್ರಾಸ ದಿವಾನು ಡೊಳೆ ದೆಕ್ಯೊಸ. ಹಮೊನೆ ದಿಕ್ಹಾನಾ ಟೈಮ್ಮಾ ಮಿ ತಿಮಾ ಭಾಗಿದಾರ ಥಯೊಸ. 2ತುಮೆ ಸಬೆನಾ ಜವಾಬದಾರಿಲಿದಲವಾಲಾ ಸಬೆನೆ ರಾಕು ಕೈನ ಮಿ ಮಾಂಗಿಲ್ಯುಸ್. ತ್ಯುನೆ ಕ್ಹುದಾನಾ ಹಿಂಡ ವ್ಹೈ. ತುಮೆ ತೆ ಹಿಂಡನೆ ಕೈದೊ. ಕಾಕದ್ಯಾಮ ತೆ ತುಮಾರಿ ಆಸ ವ್ಹೈ. ತೆ ವಜ್ಜು಼ ಜ಼ಬರದಸ್ತಿಕ್ಹು ಉಚಾಯಲ ವಜ್ಜು಼ ನ್ಹವೈ. ಕ್ಹುದಾ ತೆಜ಼ ಆಸ ಕರಸ; ತುಮೆ ತೆ ಹಿಂಡನೆ ಕೈದಾನು ದೊಕ್ಕಡಾಹುತಿ ನ್ಹವೈ, ಕ್ಹುದಾನಿ ಸೆವೆ ಕರಾನು ತುಮೊನೆ ರ‍್ಹಯಲ ಕ್ಹುಶಿನಾ ಹುತಿ ವ್ಹೈ. 3ತುಮೆ ಜವ್ದಾರಿರ‍್ಹಯಲವಾಲಾ ತೆ ಹಿಂಡಪರ ಜ಼ಬರದಸ್ತಿ ಕರೊ ನಕೊ. ತುಮೆ ತ್ಯುನೊನೆ ಚೊ಼ಕಿ ಸಾಕ್ಷಿ ಥಾವೊ. 4ಮ್ಹೊಟೊ ಕುರಬುರ‍್ಯೊ (ಕ್ರಿಸ್ತ) ದಿಕ್ಹತಾಮಾ, ತುಮೊನೆ ಮಾತಾಪರ ಕಿರಿಟ ಮಳಸ. ಮ್ಹೊಟಿ ತಾಕತಮಾ ರ‍್ಹಯಲ ತೆ ಕಿರಿಟ ತಿನೆ ಕಳಾ ಜ಼ವೈಲಿತಿಜ಼ ನೈ. 5ಜಾಂಜಿಮಾನೊ ಮಿ ತುಮೊನೆ ದಕ್ಹಿಯೊವಾತೊ ಕೌ ಕೈನ ಛೆ. ತುಮೆ ಮ್ಹೊಟಾವೊನೆ ಅಧಿನ ಥೈನ ರ‍್ಹವೊ. ತುಮೆ ಯಕ್ನಾ ಯಕ್ಕ ಮಯಾಕ್ಹು ಚಾ಼ಲಿಲಿವೊ. ಕ್ಹುದಾ ಸ್ವಕ್ಕ ರ‍್ಹಯಲವಾಲಾವೊನಾ ವಿರುದ್ದ ವ್ಹೈ. ತೆ ನೈ ತಗ್ಗಿನ ರ‍್ಹಯಲ ಮನಕ್ಹೊನೆ ಮರಗಾ ದೆಕಾಡಸ್" ಜ್ಞಾನೊಕ್ತಿ 3:34 6ತಿನಾಹುತಿ ಕ್ಹುದಾನಾ ಹತೊನಾ ತಾಕತನಾ ಹೆಟಾ ರ‍್ಹಯಲವಾಲಾ ತಗ್ಗಿನ ರ‍್ಹವೊ. ಚೊ಼ಕೊ ದಿನ್ನ ಆಯಲಪರ ತುಮೊನೆ ಉಪ್ಪರ ಉಚಾವಸ. 7ತೆ ತುಮೊನೆ ರಾಕಲ ಹುತಿ ತುಮಾರಿ ಚಿಂತಾ ತಿನೆ ವಪ್ಸಿನ ದಿವೊ. 8ಯಕ್ಕಜ಼ ಮನಸ ವಾಲಾರ‍್ಹವೊ ವರಿ ಹುಶಾರ ಥೈನ ರ‍್ಹವೊ. ಸೈತಾನ ತುಮಾರೊ ದುಶ್ಮನ ವ್ಹೈ. ತೆ ವದ್ರಾನೊ ಶಿಯ್ಯಾ ಲಿಂಗತ ಕಿನೆ ಖೌ ಕೈನ ಹುಡ್ಕತೊ ರ‍್ಹವಸ ತೆ ಮನಕ್ಹೊನೆ ಹುಡ್ಕಾಡ್ಯೊಸ. 9ತುಮಾರಾ ಬರೊಕ್ಹಾಮಾ ಘಟ್ಟರ‍್ಹೈನ ತಿನೆ ದೆಕೊ. ಕಾಕದ್ಯಾಮ ಜಗತ್ಮಾ ರ‍್ಹಯಲ ತುಮಾರಾ ಭಾಯೊ ಭೆನೊ ತುಮೊನೆ ರ‍್ಹಯಲ ತ್ರಾಸ ಖಾವಾಡ್ಯಾಸ ತುಮೊನೆ ಗ್ವತ್ತ ಛೆ. 10ಹೊ, ತುಮೆ ದಕ್ಹಾಜ಼಼ ದಿನ್ನ ತ್ರಾಸ ಖಾವೊಸಿ, ತೆ ಥಯಲಪರ ಕ್ಹುದಾ ಕ್ಹಾರು ಕರೆಟ್ಟ ಕರಸ. ತೆ ತುಮೊನೆ ತಾಕತ ದಿವಸ. ತುಮೆ ಹೆಟಾ ಪಡೆನೈಸೊ ತೆ ತುಮೊನೆ ಅಸ್ರೊ ಥೈನ ರ‍್ಹವಸ. ಕ್ಹಾರಾವೊನೆ ಮರಗಾ ದೆಕಾಡಾಲೊ ಕ್ಹುದಾ ತೆಜ಼ ವ್ಹೈ. ತಿನಾ ತಾಕತಮಾ ಪಾಲ ಲಿವಾಲಾ ಕ್ರಿಸ್ತಜ಼ ತುಮೊನೆ ಬಲಾಯೊ. ತೆ ತಾಕತ ಹಮೆಶಾ ರ‍್ಹಯಲ ವ್ಹೈ. 11ಕ್ಹಾರೊ ಅದಿಕಾರ ತಿನೊಜ಼ ವ್ಹೈ. ಆಮೆನ್.

ಲಾಸ್ಟನಿಯೊ ವಂದನೆ

12ಮಿ ಆ ನ್ಹಾನು ಪತ್ರ ಸಿಲ್ವಾನನಾ ಆಸ್ರಾಕ್ಹು ಬರ್ದ್ಯೊ. ತೆ ಕ್ರಿಸ್ತಮಾ ರ‍್ಹೈನ ಬರೊಕ್ಹಾವಾಲೊ ಭೈ ವ್ಹೈ ಕವಾನು ತುನೆ ಗ್ವತ್ತ ಛೆ. ಮಿ ತುನೆ ಪೊಕ್ಹಾಲಾವಾನೆ ವರಿ ಅಗೊ ಬಡಾನೆ ಎ ಪತ್ರ ಬರ್ದ್ಯೊಸ. ಎಜ಼ ಕ್ಹುದಾನಿ ಕ್ಹರಿನಿ ಮರಗಾ ಕವಾನು ತುಮೊನೆ ಕೌ ಕೈನಜ಼ ಮಾರಿ ಆಸ ವ್ಹತಿ. ತೆ ಮರಗಾಮಾ ಘಟ್ಟ ಥೈ ರ‍್ಹವೊ. 13ಬಾಬಿಲೊನಮಾ ರ‍್ಹಯಲ ಸಭೆವಾಲಾ ತುಮೊನೆ ನಮಸ್ಕಾರ ಕದ್ಯಾಸ. ತುಮೊನೆ ಇನಿಲಿದಲ ಲಿಂಗತಜ಼ ತೆ ಮನಕ್ಹೊನೆ ಇನಿಲಿದ್ಯಾಸ. ಕ್ರಿಸ್ತಮಾ ಮಾರೊ ದಿಕ್ರೊ ಥಯಲ ಮಾರ್ಕ ತುಮೊನೆ ನಮಸ್ಕಾರ ಕದ್ಯೊಸ. 14ತುಮೆ ಮಳಲ ಟೈಮ್ಮಾ ಯಕ್ನಾ ಯಕ್ಕ ಮಯಾಕ್ಹು ಮಟ್ಟಿ ದಿವೊ. ಕ್ರಿಸ್ತಮಾ ರ‍್ಹಯಲ ತುಮೊನೆ ಕ್ಹಾರಾವೊನೆ ಸಮಾಧಾನ ಥಾವಾದೆ.