BurhSira 5

Obuhirhi n’obucîbone

1Orhacîkubagiraga obuhirhi1, orhaderhaga, erhi: «Nalamirako ebi». 2Orhayêmêraga enyifinjo n’emisî yâwe yakuhêka omu magene g’omurhima. 3Orhaderhaga, erhi: «Ndi wampasha?», bulya Nyamuzinda arhâbule kwàkuhana. 4Orhaderhaga, erhi: «Ci nabwîne najira ecâha, kurhigi nabîre?», bulya Nyamuzinda ayishivumbika gwahalâla. 5Orhacîkubagiraga okubabalirwa, olinde oyûshûla ebyâha oku bindi. 6Orhaderhaga, erhi: «Nyamuzinda arhahimwa bwonjo, k’arhambabalira?» bulya nêci ali wa bwonjo, ci ye lumbikunira, n’obukunizi bwâge kurhibuka burhibukira abanya-byâha. 7Orharhindiraga bwashubirira Nyakasane, orhalindaga ensiku zacikonya, bulyâla oburhè bwâge ye cirhibuka, wakabona wamagenda omu nsanya olusiku lw’obuhane. 8Orhacîkubagiraga ebirugu bizimbano, birhakucize hano obuhanya buyisha.

Ogwârhe obuzibu onasimike

9Orhakâgiyêrûlira ngasi mpûsi, orhakulikiraga ngasi njira, (omunya-byâha w’enderhera-habiri yeki ojira ntyo). 10osêze buzibu ebikuli emurhima, obè na kanwa kaguma. 11Obè mumvîrhiza mubidu, ci orhabâga wa kuhalabuka omu kushuza. 12Akabà omanyire eci washuza, oshuze owinyu, ci âkaba nanga, obumbe akanwa. 13Ekanwa erhenga obukuze, erhenge n’enshonyi, n’olulimi lunayîse nnalwo. 14Oleke okujà kwaderha abandi, orhabâga murhimbuzi wa kalimi, bulya oku enshonyi zigwârha omushambo, kwo n’obuhane bugwârha endyâlya. 15Omu hinene n’omu hinyi ocîlange oku byâha, orhahindukaga mushombanyi n’obwo wali mwîra.