BurhSira 49

Yoshiyahu na Yeremiya

1Yoshiyahu okumukengêra kuli nka kujira envangè nyinjà y’obubâni kula omuvanzi w’amarâshi anajira; buli nka bûci bwo bununa omu ngasi kanwa, nka lulanga lwazihwa omu idinye. 2Aj’aho, Yoshiyahu, akulikira enjira nyinjà, erya y’okugalula omurhima gw’olubaga, arhenza obugalugalu bulya bukakabulirwa; 3omurhima gwâge aguyêrekeza Nyamuzinda, n’omu mango g’amabî, a­lwîsa anahimira obukunda-Lulema.

Abâmi n’abalêbi bazinda

4Kuleka ba Daudi, Hezekiyahu, na Yoshiyahu, abandi boshi baluza obugoma, bajahika irhegeko ly’Ow’Enyanya: abâmi b’e Yudeya bahwa. 5Obuzibu bwâbo erhi babulekîre abandi, irenge lyâbo erhi balirekîre ecihugo c’emahanga. 6Ecishagala citagatîfu cîshogwa, abashombanyi baciyôca, emihanda ya­co bayihambya, 7Kulya Yeremiya anaderhaga. Bâli bamulibuzize n’obwo ali mulêbi mwîshogwa kurhenga omu nda ya nina, mpu akundule, ashâbe analambike, ci kwône kandi mpu ayûbake anarhwere1. 8Ezekiyeli abonekerwa n’irenge, Nyamuzinda amuyerekalyo oku nyanya ly’engâlè ya Bakerubi2. 9akengêra abashombanyi omu nkuba y’ecihonzi, mpu lyo ahimira abakulikira enjira nyinjà. 10Balya balêbi ikumi na babiri nabo, amavuha gâbo gashabuke nka mburho omu nshinda zâbo, bulya barhûlirîze Yakôbo, bamuciza omu buyêmêre n’omu bulangâlire.

Zorobabeli na Yozwè

11Kurhi rhwacitakirira Zorobabeli? Kw’ali nka kashè omu kuboko ku­lyo3; 12naye owâbo Yozwè, mwene Yosedeki, bombi, omu mango gâbo. bayûbaka aka-Nyamuzinda, bayabulira Nyamuzinda olubaga lutagatîfu, lubaga lubîkîrwe irenge ly’ensiku n’amango.

Nehemiya

13Nehemiya naye ali mukulu w’okukengêrwa, ye warhuzûkizagya enkûta zàli zamâhongoka, ajira enyumvi anazisimbanya, ayînamula eka.

Okushubûlula

14Ntâye en’igulu walemirwe mpu ayumânane na Enoki; ye bàbalalanaga kurhenga igulu. 15Ntâye kandi wabusirwe oli nka Yozefu, arhona emwa bakulu bâge, abà nyamwegemerwa w’olubaga lwâge, amavuha gâge gajirekwo omugisho. 16Semu na Seti nabo bajire irenge omu bantu, ci kwône Adamu yenaciri enyanya lya ngasi ciremwa cizîne.