BurhSira 48

Eliya

1Lêro omulêbi Eliya anacizûka nka muliro, ebinwa byâge bwakâyôca nka ngoke. 2Ye wabahamagaliraga ecizombo, n’omu bushiru bwâge, abahungumula. 3Oku luderho lwa Nyamuzinda, àhangamya enkuba, kasharhu koshi àmanula omuliro emalunga. 4Eliya nêci wali ojire irenge omu birhangâzo byâwe! ndi muntu wa­nkaba n’obucîbone bw’okucîgerera kuli we? 5We wakûlaga omuntu omu nfune z’olufù, wamurhenza ekuzimu, oku luderho lw’Ow’Enyanya. 6We washabiraga abâmi, abakulu wabarhenza oku ntebe. 7We wayumvagya obukali oku Sînayi, n’irhegeko ly’olwihôlo oku Horebu, 8washîga abâmi b’okucîhôla amavurha, washîga n’abakûla bâwe amavurha g’obulêbi, 9wahêkwa muli kalemêra w’omuliro1, oku ngâlè, y’ebihêsi by’omuliro, 10we wacishogeragwa obukali bwayisha, mpu obè murhûliriza w’obukù­nizi embere buyishe, mpu oshubize omurhima gw’îshe w’omwâna oku mwâna2, onayinamule emilala ya Yakôbo. 11Iragi lyabayishikubona, n’abafânîne obuzigire, bulya nîrhu rhwayish’ibà n’obuzîne.

Elishaʿ

12Ntyo kwo Eliya ali, ye muntu wahekagwa muli kalemêra. Omûka gwâge gwayunjuza Elishaʿ; omu nsiku z’akalamo kâge, ntà murhegesi wakamuyâshire, ntâye wakamugombize. 13Ntâco camuyabiraga, ciru abîre ali n’ekuzimu omubiri gwâge gwagalilêba!3 14Amango àli azîne ajira ebirhangâzo, anabire amâfa ajira n’ebisômerîne.

Obugoma n’obuhane

15Byâbà ntyo, ci omurhima gw’olubaga gurhagalukaga, basera oku byâha byâbo, balinda balulizibwa kuli n’ecihugo câbo, bàbasha­ndabanya omu igulu lyoshi. 16Hasigala amâhûngà g’olwali lubaga, n’omurhambo w’oku mulala gwa Daudi. Muli bo, baguma baguma basîmîsa Nyamuzinda, ci abandi bashubikaluza ebyâha.

Hezekiyahu

17Hezekiyahu azibuhya ecishagala, ahisa amîshi omu lugo lwâge, arhula ibuye n’ecûma, ayûbaka iriba ly’amîshi. 18Mw’ago mango, Senakeribu amera omu muherho, arhuma Rabushakè, naye Rabushakè omu bucîbone bwâge, arhêra Siyoni. 19Lêro bajuguma amaboko n’omurhima, balumwa nka mukazi wajà aha lubako4, 20bayâkûza Nyamuzinda w’obwonjo, bamurhega amaboko, Omwimâna abayumva kurhenga empingu, abaciza n’okuboko kwa Yesha’yahu. 21alasa ebihando by’ab’e Sîriya, malahika wâge abahungumula.

Yeshayahu

22Byabà ntyo bulya Hezekiyahu amâsîmîsa Nyamuzinda, acîyêrekana muzibu omu kukulikira enjira y’îshe Daudi, nk’oku omulêbi Yesha’yahu ali amurhegesire, Yesha’yahu mukulu na mutabêsha omu bulêbi bwâge. 23Omu nsiku zâge, iziûba lyàgenda cinyumanyumà, n’akalamo ka mwâmi5 kayûshûka. 24Abonera omu buhashe bwa Mûka oku ensiku zahwire, arhûliriza abagogomîrwe b’e Siyoni, 25amanyîsa ebyâyisha binaciri kuli omu mwizimya gw’ensiku n’amango, n’ebifulike abimanyîsa embere bibonekane.