BurhSira 30

Okulera

1Omubusi ozigira omwâna wâge arhamurhogoza, irhondo erhi olya mwâna yekola cimala-mungo. 2Olera bwinjà omwâna wâge âsîma, bâmukûnga ekarhî k’abîra bâge. 3Oyigîriza bwinjà omwâna wâge, buyâgalwa azukiza omushombanyi wâge, ci busîme ekarhî k’abîra bâge. 4Ciru îshe w’omwâna mulere akafà, kurhali kufà afîre, bulya asizire oli nka ye. 5Acizîne, abwîne obusîme muli ye, buno akol’afà, ntà burhè. 6Asizire entwâli y’okucîhôla oku bashombanyi, asigîre abîra bâge owa­bavuga omunkwa oku minjà bamujirîre. 7Orhogoza omwâna wâge, acîrheganye n’okukârhuba ebibande, ngasi kuyâma, omurhima gumukangalale. 8Enfarasi nshwêke kubî enagâmbane, karhagobaga naye kubî akula. 9Nêci, orhogoze omwâna, kwône acikukanga, omushâse kwône, wâcicîlakira. 10Orhashekaga mwe naye âkaba orhalonza okulaka mwe naye, wâcizinzibala obusù. 11Orhamulekêreraga amango acikula, orhazibaga mpu orhagibona obubî bwâge. 12Omuyumvîse bwinjà oku acikula, ciru n’okumushûrha amango aciri mwâna, bulya cikaba cigamba arhakâkuyumva, n’oburhè bukugwârhe. 13Lera onahêrhe bwinjà omwâna, ly’oleka okuyishirhindibuka n’obugamba bwâge.

Amagala minjà

14Omukenyi muzibu w’amagala minjà, ye mukulu aha mugale w’amagala magalugalu. 15Amagala minjà n’emisî bilushire obuhirhi bwoshi bw’igulu, amagala mazibu galushire obugale. 16Ntà buhirhi bulushire amagala, na ntà bugale bulushire obusîme bw’omurhima. 17Olufù lwo lukulu aha kalamo k’omutula, obuluhûke bw’ensiku n’amango bwo bwinjà aha ndwâla erhafuma. 18Okuhira entûlo aha nshinda, kwo kuguma n’okuhira ebiryo oku kanwa kabumbe, 19Ebi barhûla ensalamu êrhalya erhanahinya, bibà bya cici? Ntyo kw’ali omuntu Nyamuzinda ashimbire. 20Analabaganye, ayîse mutya. Kw’ali nka kulya bashahula omuntu babulimuhà omukazi, abande enani.

Obusîme

21Orhabâga we nnaburhè, orhacîrhegega entanya zilêrha omutula. 22Busîme bw’omurhima ko kalamo k’omuntu, bushagaluke kwo kuyûshûla ensiku zâge. 23Orhebe entanya zâwe, orhûlirize omurhima, ohive oburhè: bulya omugungunu gwâyîsire banji, ntà bunguke gwankalêrha. 24Amagene n’obukunizi binanyihye akalamo, entanya zinabiduhye obushosi. 25Nka omurhima gushagalusire, ebiryo binazigire omuntu, ehi omuntu àlyaga himugwe bwinjà.