MARUBA GA KABIRI GA YOWANE 1

Omusingo

1Nie ono, kamîra, nyandikîre Omugoli mwîshogwa n’abâna bâge nzigira omu kuli - arhanali nienene, ci na ngasi boshi bamanyire okuli, - 2okwo kuli kubà muli rhwe kwanayôrha kubà nîrhu ensiku n’amango kurhumire. 3Omugisho, n’obwonjo, n’obuholo bigabwa na Larha Nyamuzinda na Yezu Kristu, Mugala wa Nyamuzinda Îshe, byâbà nîrhu omu kuli n’omu buzigire.

Irhegeko ly’obuzigire

4Nasîmire bwenêne erhi mbugâna omu bâna bâwe muli abashimba enjira y’okuli nka kulya Larha anarhurhegekaga. 5Lêro bunôla, ewe Mugoli, - ciru akabà lirhali irhegeko lihyâhya eryo nkuyandikîre, ci lirya rhwayôrhaga rhujira kurhenga aha murhondêro, - nkuhûnyire nti rhuzigirane. 6Obuzigire bubà omu kushimba amarhegeko gâge. N’irhegeko lirhanzi, nka kulya mwabwîra­gwa kurhenga aha murhondêro, kuli kuyôrha muzigirana.

Abashombanyi ba Kristu

7Bulya igulu lyazûsiremwo bakanywesi mwandu, barhayêmêra oku Yezu Kristu acîjizire muntu. Y’oyo ye Kanywesi, ye na Antikristu! 8Mucîlange, mulek’irhuma ebi rhwakolîre byafabusha, ci muyish’ihâbwa oluhembo luna­kwânîne. 9Ngasi yêshi orhananîra oku nyigîrizo za Kristu, akazirhalusa, oyo erhi arhali na Nyamuzinda. Osêra kuli ezo nyigîrizo, oyôla yeri na Nyamuzinda Îshe n’Omugala. 10Erhi hankajira owammuyishira arhanadwîrhi ezi nyigîrizo, murhamuyankiriraga aha mwinyu, munamanye mwankamulamusa. 11Bulya owamulamusa erhi amashangîra ebijiro byâge bibî.

Ishwinjiro ly’ebinwa

12Binji ncigwêrhe nankammubwîzire, ci naderha nti ntakolêsa akaradasi n’obwîno. Nangâlîre nti nâyisha emwinyu, rhushambâle n’akanwa ly’obushagaluke buyûshûka. 13Abâna ba Mwâli winyu Mwîshogwa bamulamusize.