AMARUBA EMWA TIMOTEYO 3

Lungere erhi Nnâbadahwa

1Olu luderho luli lw’okuli: erhi omuntu ankacîfinja okubà lungere, erhi mukolo mwinjà acîfinjire. 2Lungere akwânîne abè muntu mwêru-kwêru, owajire omu buhya liguma lyône; arhabaga mudâdà, ci abè murhondêza na mukengwa; abè muntu oyîsh’ihandîsa ebigolo n’owankahash’ibiyigîriza; 3arhabaga mulalwè, nîsi erhi mulwî, ci abè mutûdu; arhabaga wa nnongwè, arhanabaga wa magene g’eby’en’igulu. 4Amany’irhegeka bwinjà enyumpa yâge, analere abâna bâge omu bukenge n’omu bwôrhere nkana. 5Bulya, omuntu orhish’irhegeka eyâge nyumpa, kurhi ankahash’ishîbirira Ekleziya ya Nnâmahanga? 6Arhabaga mukristu muhyâhya, ly’arharhunda n’obucîbone, obone amahirima mwo cirya câha Shetani ahirimagamwo. 7Kukwânîne aderherwe obuhamîrizi bwinjà n’abantu b’embuga, lyarhagayaguzibwa arhanag’igwa omu mirhego ya Shetani.

Abashamasi

8Abashamasi nabo kwo na kwo, babè bantu bakengwa, barhabaga ba kuderha kubiri, babè ba lugero omu kunywa amamvu, barhabaga bantu ba kulonza obunguke bubî. 9Balange ihwe ly’obuyêmêre omu murhima gucîre. 10Nabo ku­kwânîne barhang’ibarhangula, n’akabà ntâco bababwînekwo, bayêmêrwe omu mukolo gw’obushamasi. 11Abakazi nabo1 kwo na kuguma, babè bakengwa, barhabâga ba kalimi, barhabaga badambye, bakwânane okucîkubagirwa muli byoshi. 12Abashamasi babè bantu bàjîre omu buhya liguma lyône, bamany’ilera kwinjà abâna bâbo n’okurhegeka enyumpa zâbo. 13Bulya abajira kwinjà omukolo gwâbo gw’obushamasi, bayish’ikwânana ecikono c’okukengwa n’okubà ntwâli omu buyêmêre buli muli Yezu Kristu.

Ihwe rhugashâniza omu Ekleziya

14Nkuyandikire okwo erhi nanangâlîre nti nayisha emwâwe duba. 15Ci nkayish’ilegama okuyisha, nnonzize omanye kurhi okwânîne okukâyôrha omu nyumpa ya Nyamuzinda, yo Ekleziya ya Nnâmahanga ozîne, gwo mutungo co na ciriba c’okuli. 16Nêci, ntâye wankakulahira, liri likulu ihwe2 rhugashâniza: Lyabonekîne omu mubiri3, lyayêra muli Mûka Mutagatîfu, lyabonwa na bamalahika, lyamanyîsibwa omu mashanja, lyayêmêrwa omu igulu, lyahêkwa omu irenge.