Macce 20

Heɗ nguuki na pangkoh ci

1Nguuriŋ-Ɗafki mand na inii : A nikee heɗ kahan, a kurukka na ɓaaɓ-teel ne a kooɗ ɓi ɓo' ɓi na hee ɗe pangkiɗe ŋ nguukiŋ reseñiŋ ɗe. 2A woosa na ɓa po ɓa kerhiɗohha ne ɓa na hee ɗe hooɓkiɗe panguk, a wirind ɓa yaa nu nga ɗah hanjar haalis yino. Ƴutta, a tuuƴca ɓa nguuka.

3A pulissa ŋ yoor-yoor, a hotta ɓi pangkoh wiiriis ɓoofiɗ ŋ ɗiska na toonohse ŋ kur ka, haɓɗaaɗi in. 4A woosa ɓa ne : “ Kaɗaat ɗu nama panguk ŋ nguukaŋ ngo, ŋ hey ɗu wirnde ini ɗu joy wirndu. ” 5Ɓeem kaɗta. A pulissa ŋ ɓak njooloor na ɓak tisbaar, a tumissa ɗaa.

6A pulissa ŋ ɓak takusaan, a raakissa ɓi ɓo' ŋ cohohaana, a woosa ɓa ne : “ Wa ye tah ɗu hooɓukka ɓoof ndii haɓɗaaɗi in ? ” 7Ɓa woosa ɗe ne : “ Ali ɓo' kooɗɗi ɓoo ne ɓoo panguk. ” A woosa ɓa ne : “ Kon namaat kaɗ, ɗu pangka ŋ nguukaŋ ngo. ”

8Wa niina ree, heɗ nguuka woosa ƴaara taambkohee in caŋ ɗe ne : “ Ɓeeɗka pangkoh ci, fu wirind ɓa ; camboha ŋ ɓi mirndoh hay po ŋ ɓi koc. ” 9Ɓa kooɗsee ŋ takusaana, kaɗta yaa nu nga ɗah, eɗuusa hanjar haalis yino. 10Wa kaɗeeɗa po wa reesa ŋ ɓa kocee kooɗu, ɓa liiɓpa ne ɓeɗ uupɗan wirind, waaye yaa nu nga ɗah, nammba rahas hanjar yino.

11Wa ɓa eɗsee ca, ɓa ñaɗtukeeɗa ŋ heɗ nguuka 12an : “ Ƴaaɓii ɓeɗ mirndoh hay, ɓa panguk wahtu yino dong, fu eɗee ɓa in hend na ini fu eɗ ɓoo te ɓoo hooɓuk yaaɓ na pangki na dohɗiŋ nohi ! ”

13Heɗ nguuka loffa yino nga ɓa ne : “ Ƴaariŋ ngo, ŋ tooñɗi ɗa. Ɓoo kerhiɗohee ne mi na hee ɗa wirnde hanjar yino haa e ? 14Mbaa ɓaya ini fu raak te fu coot ; ŋ waaɗa waaɗ, ŋ eɗta ƴaari mirndoh hay in hend na ini ŋ eɗ ɗa. 15Andi ŋ minɗi minɗi tum ini ŋ waaɗ na raak-raakiŋ ngo ? Wala wa siis amb ɗa ŋ baahi ŋ baah ? ” » 16Yeesu degga nga ne : « Ɓi mirndoh adgohan ɗaa, ɓi adug mirndoh. »

Yeesu woyissiɗ ŋ kakaan kiŋ ɗe

17Wa raakka mbeh, Yeesu kaɗeeɗa Yerusalem, a ɓeeɗukka taalubeeci ndaŋkiyaah na kanak ci (12) kiik ɓa, a woosa ɓa ŋ waasa ne : 18« Ɗu hot nga, ɓoo ɓii kaɗ Yerusalem, Kuɓkiŋ ɓoyi hey faɗse ŋ yaah ciŋ kilifaaciŋ seeƴkiɗoh ciŋ waasiŋ Musaa na jangɗohoh ciŋ wa ; ɓa hey ɗe atte'e ne a apu. 19Ɓa eɗ ɗe ɓooɓi nikɗi Yawuut ne ɓa njembit ɗe, ɓa laɓ ɗe leraw, ɓa daaƴ ɗe ŋ kurwaa, ŋ neeha kaahayɗoh, a hultiɗu. »

Kuɓuuciŋ Sebede

20Weɗi yaayiŋ kuɓuuciŋ Sebede reɓoh ŋ Yeesu. A hunee na ɓa, a ƴekka ŋ fiki Yeesu ne a kiim ɗe in. 21Yeesu woosa ɗe ne : « Fu waaɗ ye ? » A woosa ɗe ne : « Woya ne fu kaɗ po fu nik buur ɗah, a kuɓuuciŋ ngo kanak cii daran ɗa, yino lah ɗa yaah-ñaahum, yi tas lah ɗa yaah-sing. » 22Yeesu loffa ne : « Ɗu inahɗi ini ɗu na kiime. Ɗu miniɗ an ŋ kaasiŋ miskiɗi maa hee ane e ? » Ɓa woosa ɗe ne : « Ee ɓoo miniɗa. »

23A woosa ɓa ne : « Wa keeh ne ɗu hey ane ŋ kaasiŋ ngo, waaye ini kaɗ ŋ yi lahan ndo yaah-ñaahum na sing, e ñam woyan ɓa haa, e ɓooɓi Baabiŋ ngo kooɗkiɗa ɓeɗ eɗsana. »

24Wa taalubeeca ndaŋkiyaah ca ɓinooɓa kerah ineem, ɓa ayrukka ɓa kanak ca. 25Waaye Yeesu ɓeeɗukka ɓa jen, woosa ɓa ne : « Ɗu inhiɗ ne ɓooɓi adgoh kur ci na degee deg ɓooɓiŋ ɓa yaah, ɓooɓi uupiɗ hatil uupohee doole. 26Wa joyɗi nikoh ɗaa nga ɗu ; ɓo' nu waaɗ nik ɓo' yakak nga ɗu ɗah, a teyɗukaat nik surgaaniŋ ɗu. 27Te ɓo' nu waaɗ adug nga ɗu ɗah, a teyɗukaat nik ñaamiŋ ɓi tas nga ɗu. 28Findi Kuɓkiŋ ɓoyi, a hayɗi ne a raak surga, a hay ne a nik surga te a eɗoh kipes kiŋ ɗe ne a tos ɓo' laayiɗ. »

Yeesu wirɗiɗ fuuliɗ ca kanak ca

29Wa ɓa aas Yeriko po ɓa puleeɗa, mboolo yakak ñaakiɗta ɓa. 30Wa raakeen fuuliɗ kanak ɓoofiɗ ŋ mbeeddaana, ɓa kerahha ne a Yeesu na taambe, ɓa leehkeeɗa an : « Kilifaani, setiŋ Dawuuda, ɓoo miskaat ɗa ! » 31Mboolnda ngaskeeɗa ɓa ne ɓa ɗek. Waaye ɓa uupeeɗa leehuk ŋ ɗafka an : « Kilifaani, setiŋ Dawuuda, ɓoo miskaat ɗa ! »

32Yeesu tufukka, ɓeeɗukka ɓa woosa ɓa ne : « Ɗu waaɗ ne ŋ haɓɗiɗ ɗu ye ? » 33Ɓa woosa ɗe ne : « Kilifaani, has ciŋ ɓoo rangsukaat ! » 34Ɓa misikka Yeesu lool, a laalla has ciŋ ɓa, ŋ ɗiska ɗiska ɓa hoteeɗa. Ƴutta ɓa ñaakiɗta ɗe.