Luk 18

Ɓo' joy gen ŋ kiim Kooh

1Yeesu naandsukissa taalubeeciŋ ɗe andiinii ne a teeɓ ɓa ne ɓa joy joy gen ngaŋ kiim Kooh, ɓa sang faɗsuk. 2An : « Wa raakeen atte'oh ŋ kur, a nupeeɗi Kooh delem te a kerhiɗeeɗi ali ɓo'. 3Wa nameen raak ɓitiɓ nga, ƴaar ce kaanee kaan, a raakka ɓoya a leer na ɗe ; tahha po a meeɗta kaɗ ngaŋ atte'oha ne yeem eɗ ɗe keeh ki a raak ŋ ɓoya a leer na ɗe. 4Atte'ohi waaɗɗi wa tum, a faɗta po wa maannja, a hannda woo ŋ ɗooƴ ce ne : “ Wa keeh ne ŋ nupɗi Kooh te ŋ kerhiɗɗi ali ɓo'. 5Waaye yaaɓɗi ɓitɓii na yaaɓɗee so, tahiɗ po ŋ hey ɗe eɗe keeh kiŋ ɗe ne a hayissuu nga so, a apee so na woo. ” » 6Heɗ ɓoo Yeesu ɓaatta nga ne : « Kerhaat baahiɗ ini atte'ohi yurhaaɗiini woo weem. 7Ɗu liiɓiɗ ne Kooh namanɗi eɗ ɓooɓiŋ ɗe a kooɗ keeh kiŋ ɓa e, ɓeɗ ɓi na leehke nga ɗe noh na wek ? A hey ɓa sekɗohe e ? 8Ñam na woyee ɗu wa, wa maañanɗi, Kooh eɗ ɓa keeh kiŋ ɓa. Waaye andi Kuɓkiŋ ɓoyi hayis ɗah, a hey raake oolkiɗ Kooh ŋ kehƴi ? »

Farisena na juuti'oha

9Raakka ɓi liiɓee ne ɓa yurhiɗ, ɓa heefeeɗa ɓinooɓi. Yeesu naandsukka ɓa andiinii : 10« Ɓa nikee ƴaar kanak, ɓa kaɗta Kahan Kooh ne ɓa kiimaa ɗe nga. Yinoori nikee Farisen, yinni nikka juuti'oh. 11Fariseni tufukka, kiimeeɗa Kooh kiik ce an : “ Eey Kooh ! Mi yii corkiɗ ɗa ŋ ini ŋ mandɗi na ɓinooɓi, ɓa rok, ɓa yurahɗi te ɓa na njaalo'ee njaaloo. Mi yii corkiɗ ɗa ŋ ini ŋ namɗi mand na juuti'ohii. 12Mi na ore waas kanak ŋ ɗooƴ mbeh dokkiɗ. Te in nu ŋ raak ndaŋkiyaah nga ɗah, ŋ eɗoh yinoori. ” 13Juuti'oha nak, a cangtiɗuk cangtiɗuk, a kaañɗi sah jaɗtuk, a laɓɗeeɗa daɗi, a miskiɗkeeɗa, a woyeeɗa ne : “ Kooh ŋ miskaat ɗa, laam ŋ bakaaɗoh. ” » 14Yeesu ɓaatta nga ne : « Ñam na woyee ɗu ne, bala juuti'ohi haadan, a yi Kooh ɗaas, a ammba ɗe findi yurhiɗ, waaye Farisena haa. Laam ɓo' nu meeɓ haf ce ɗah, a hey ruhsiɗasse, te ɓo' nu ruhsiɗ haf ce ɗah, a hey meeɓse. »

Nguuriŋ-Kooh wa wuu ɓooɓi mand na komaaki

15Ɓa ɓayeeɗa sah ɓi gooy ŋ Yeesu ne a laal ɓa, waaye taalubeeciŋ ɗe hotta ŋ ineem, ɓa ngaskeeɗa ɓa. 16Yeesu nakohha ɓa reɓɗu, a woosa ne : « Faɗaat komaakci ɓa hay nga so, kinaat ɓa hondoh hay, ɓooɓi mand na ɓa ɓeɗ raak Nguuriŋ-Kooh. 17Ñam na woyee ɗu wa te wa keeh, ɓo' nu teyɗukɗi Nguuriŋ-Kooh findi komaaki ƴin na teyɗukohe ɗah, fu moosanɗi aas nga. »

Nguuriŋ-Kooh na raakiɗ ci

18Ƴaar ɓaah ŋ ɓa adgohee Yawuut ca meekissa Yeesu ne : « Jangɗohohi baahiɗi, ŋ joy ye haɓiɗ po ŋ raak kipes ki heyɗi reehe ? » 19A loffa ɗe ne : « Wa ye tah fu ɓeeɗkohee so baahiɗ ? Ali ɓo' baahɗi, hanaa Kooh dong. 20Fu inhiɗ nakoh ci ; an kina njaaloo, kina ap ɓo', kina rok, kina woyiɗ ɓo' ini a tumɗi, eɗa yaay ɗu na baab ɗu cir. » 21Ƴaara woosa ɗe ne : « In ceem jen mi yii taambiɗ ca ŋ kikomaakiikaŋ ngo poyi. » 22Wa Yeesu kerah ina a woo, a loffa ɗe ne : « Wa in yino weɗ fu tas haɓiɗ. Toona in ci fu raak jen, fu paysoh ca ñakiɗ ci, fu hey raake alal ŋ Eel ci. Ƴut ɗah, fu hay, fu ñaakiɗ to. » 23Ƴaara nikee ɓo' raakiɗ lool, tahha po wa a kerah woo keem a goyya. 24Yeesu hotta ne a goyiɗ, a woosa ne : « Heɗ raak-raak aas ŋ Nguuriŋ-Kooh wa in ye miskan. 25Ngeelemb aas ŋ ngul kufic weɗ uup yooɓ heɗ raak-raak aas ŋ Nguuriŋ-Kooh. »

26Wa ɓooɓa kerah woo keem, ɓa woyeeɗa ne : « Kon a ya ɓa min mucɗu ? » 27Yeesu loffa ɓa ne : « Ini wooñ ɓooɓi wooñɗi Kooh. » 28Piyeer woosa ɗe ne : « Moo ɓoo nak, ɓoo faɗiɗ in ciŋ ɓoo, ɓoo ñaakɗiɗ ɗa. » 29A loffa ɓa ne : « Ñam na woyee ɗu wa te wa keeh, ɓo' nu faɗ kahan mbaa ɓitiɓ, taambɗoh, yaay, baab wala kuɓu sagu Nguuriŋ-Kooh ɗah, 30fu hey raake nga laayoh na laayoh woti te kim fu hey raake kipes ki heyɗi reehe. »

Yeesu woyissiɗ ŋ kakaan kiŋ ɗe

31Wa Yeesu ƴut woo na ɓa, a ɓeeɗukka Apootar ci ndaŋkiyaah na kanak ci (12) kiik ɓa, a woosa ɓa ne : « Sikɗukaat to, ɓoo na kee Yerusalem te in ci woosuuɗ ci fiis ŋ ini kaɗ ŋ Kuɓkiŋ ɓoyi jen, ca hey nike. 32A hey faɗse ŋ yaah ciŋ ɓooɓi nikɗi Yawuut, ɓa hey ɗe njembte, ɓa ɓas ɗe, ɓa tuhus ɗe. 33Ɓa laɓ ɗe leraw po ƴut ɗah, ɓa hey ɗe ape te ŋ neeha kaahayɗoh, a hey hulte. » 34Waaye Apootar ci inheeɗi ini woo ceem tokis, ca ñiineeɗi nga ɓa, ɓa inheeɗi ini Yeesu waaɗ woo.

Yeesu wirɗiɗ fuuliɗ

35Ŋ kaɗaŋ Yeesu, wa a hay po a heeɗa ree Yeriko, fuuliɗ ɓoofeen ŋ mbeeddaana yalwaaneeɗa. 36Wa a kerah ɗuuɗaŋ mboolnda taambee, a meeksohha ini raak. 37Ɓa woosa ɗe ne : « A Yeesu yi gen Nasareet, a yi na taambe. » 38A leehukka an : « Yeesu setiŋ Dawuuda, ŋ miskaat ɗa ! » 39Ɓooɓa nikee ŋ fikiira ngaskeeɗa ɗe ne a ɗek, waaye a uupeeɗa nga leehuk an : « Setiŋ Dawuuda, ŋ miskaat ɗa ! » 40Yeesu tufukka, a woosa ɓooɓa ne ɓa reɓɗaat fuulɗa nga ɗe. Wa fuulɗa hay, Yeesu meekissa ɗe ne : 41« Fu waaɗ ne ŋ haɓɗiɗ ɗa ye ? » Yeem loffa ɗe ne : « Kilifaani, ŋ waaɗ ne fu tum po has ciŋ ngo min hot. » 42Yeesu woosa ɗe ne : « Hota ! Kosi fu kos wirɗiɗ ɗa. » 43Jaarra fuulɗa hoteeɗa, a taambɗeeɗa Yeesu, a yakɗeeɗa Kooh. Ɓooɓa jen hotta ŋ ineem, ɓa yakɗeeɗa Kooh.