Рындоря 2

Свэнто Духо сжал пэ апостолоря

1Кала авиля свэнко Пандэшако дес1, онэ сас андэ екх тхан. 2Сыго авиля шумо пав болыбэн, сар фартэ зораля балвалятар, и пхэрдярдя всаворо чер, кай онэ сас. 3Авиле лэнди шыба, сар яга, савэ всаворэ екх пала екх сжыле по кажно мануш. 4Всаворэ пхэрдиле Свэнтонэ Духоса и линэ тэ дэн дума пэ авэр шыба, сар о Духо дэлас лэнди тэ пхэнэн. 5Андо Иерусалимо сас дэвлэкунэ иудеёря андай всаворэ пхувья талай болыбэн. 6И сар тердяпэ кадва шумо, стидэпэ бут мануша и на полэнас, со терэлпэ, колэсти со всаворэ ашунэнас, сар апостолоря дэнас дума пэ лэндирэ шыба. 7Всаворэ фартэ дивонаспэ и дэнас дума машкар пэстэ:

— Кала, савэ дэн дума, най всаворэ галилеяноря? 8Сар амэ ашунас пэстири шыб, сави амэ жанас амарэ бэяндимастар? 9Машкар амэндэ исин парфяноря и мидяноря, еламиторя и ко жувэл андэ Месопотамия, Иудея и Кападокия, Понто и Цэкни Азия, 10Фригия и Памфилия, Египто и пхув андэ Ливия, сави пашай Киринея, и кола, ко жувэл андо Римо, 11иудеёря и прозелиторя, критяноря и араборя. Ашунэнас, сар онэ дэн дума амаря шыбаса палай барэ рындоря Дэвлэстирэ?

12Всаворэ дивосавэнас и на дополэнас, пхэнэнас екх екхэсти:

— Со када терэлпэ?

13Ай авэр асанас лэндар тай пхэнэнас:

— Онэ матиле гуглэ молэстар.

Дума лэ Пэтростири

14Пэтро вщиля лэ дэшуекхэнца и зоралэ гласоса пхэндя лэнди:

— Мурша иудеёря и всаворэ, ко жувэл андо Иерусалимо! Ашунэнтэ мэрнэ алава, кай тэ жанэн. 15Онэ на матэ, сар тумэ гындон. Икхатар качи иня чясо дэнзорэско! 16Нэ пала када пхэндя майанглал пророко Иоилё:

17«Андэ палатунэ деса, — пхэнэл о Дэл,

— шава Духо Мэрно пэ всаворэн манушэн,

шавэ и щея тумарэ авэна тэ пхэнэн лав Дэвлэстар

и шаворэ тумарэ авэна тэ дикхэн дикхимос,

и пхурэ мурша тумарэ дикхэна сунэ Лэстар.

18И пэ бутярнэ и бутярня Мэрнэ андэ кола деса шава Мэрно Духо,

и онэ авэна тэ пхэнэн лав Дэвлэстар.

19Мэ сикавава диворя по болыбэн упрэ и шпэры пэ пхув тэлэ,

рат и яг, и баро тхув.

20Кхам калёла, и шон ашэла сар рат,

жы кала авэла дес Раеско, баро и лашардо.

21И тунчи кажно, ко приакхарэла алав Раеско, авэла фэрисардо.

22Мурша Израилёстирэ! Выашунэн, со мэ пхэнава. Зораса тай дивоса и шпэраса, савэ о Дэл тердя черэз Лэстэ машкар тумэндэ, сар тумэ и жанэн, Дэвэл допхэндя тумэнди, со Мурш Исусо андав Назарето авиля Лэстар. 23Сар Дэл загындосарэлас и жанэлас майанглэ, тумэ умардэ Лэс. Прэдинэ андэ прахарэндирэ васта, савэ примардэ Лэс кав трушул. 24Нэ о Дэл жундярдя Лэс, росшындя грыжы миримастирэ, колэсти со миримасти на сас зор тэ уритярэл Лэс.

25Давидо пхэнэл пала Лэстэ:

«Дикхлем мэ англав пэстэ лэ Раес всавори вряма,

Вов пай право риг паша мандэ,

кай састэс тэ тэрдював.

26Важ кода радосайля води мэрно

и лошарэл шыб мэрни;

и всаворэ мэрнэ маса авэна тэ жувэн надияса.

27Колэсти со Ту на ашавэса води мэрно андо адо

и на дэса свэнтонэсти Тирэсти тэ ашэл прахоса.

28Ту дян манди тэ ужанав дром жувимаско,

Ту пхэрдярэса ман лошаса англав Тутэ».

29Пхралалэ! Домукэн ман тэ пхэнав тумэнди ворта. Прапапо Давидо муля и гарадо, и склэпо лэско амэндэ жыкай адесутно дес. 30Вов сас пророко и жанэлас, со о Дэл солахадя лэсти, со по троно авэла тэ бэшэл мануш пай лэско родо. 31Вов майанглал пхэндя, со Христосо жундёла андай мулэ, со на авэла ашадо о води Лэско андо адо, и тило Лэско на ашэла прахоса. 32Калэс Исусос о Дэл жундярдя андай мулэ, амэ всаворэ дикхасас када. 33Вов сас вазгло Дэвлэстирэ правонэ вастэса и приля лэ Дадэстар Свэнто Духо, пала Саво дя лав о Дэл, и со тумэ икхатар дикхэн и ашунэн. 34Давидо на вазгляпэ по болыбэн, нэ вов пхэнэлас кадя:

«Пхэндя Рай Дэл мэрнэ Раести:

— Бэш пай право риг Мандар,

35кола вряматэ, кала шава тирэ вражымарен кай и пэрнэ Тирэ».

36Кадя састэс жанэн, всаворо чер лэ Израилёско, со Калэс Исусос, Савэс тумэ примардэ кав трушул, о Дэл стердя Раеса и Христоса.

37Кала онэ ашундэ када, заровдэ воденца и пхэндэ Пэтрости и аврэнди апостолонэнди:

— Пхралалэ! Со амэнди тэ терас?

38Пэтро пхэндя лэнди:

— Каисавэн и тэ болэлпэ кажно тумэндар важ алав Исусоско Христоско, кай Дэл тэ эртисарэл тумэнди бэзэха. И тунчи тумэ прилэна даро Свэнтонэ Духос. 39Кадва лав дино тумэнди и тумарэ бэяцэнди, колэнди, ко дур, и всаворэнди, кас акхарэла амаро Рай Дэл.

40И бут аврэ лавэнца вов умангэлас лэн:

— Фэрисавэнпэ калэ хохавнэ родостар!

41Кола, ко приля лэско лав, болдэпэ, и приашыле лэндэ андэ кодва дес варикай трин мия манушэн. 42Онэ ритярэнаспэ апостолонэндирэ сытяримастэ, всавори вряма екхэтанэ дэнас дума, пхагэнас марно и мангэнаспэ Дэвлэс.

Жувимос патявимастирэн манушэн

43Всаворэ мануша сас андэ дар англав Дэл, и апостолоря сикавэнас бут шпэры и терэнас диворя. 44Всаворэ патикунэ сас екхэтанэ, и вся лэндэ сас гуртоско. 45Онэ битинэнас пэско хулаимос тай барвалимос, и роздэнас всаворэнди, касти, со сас трэбуй. 46Кажно дес онэ екхэтанэ сас андо храмо, ай пай чера пхагэнас марно, ханас хамос лошаса и отпхэрнадэ воденца, 47лашарэнас Дэвлэс. Онэ жувэнас андо мищимос всаворэнца манушэнца, и Рай кажно дес анэлас лэндэ фэрисардэн.