UMikha 2

Amacebo Abantu LakaNkulunkulu

1Maye kulabo abaceba ububi,

kulabo abaceba ukwenza okubi emibhedeni yabo!

Ekudabukeni kokusa bayakwenza

ngoba kusemandleni abo ukukwenza.

2Bahawukela amasimu bawathumbe,

kanye lezindlu, bazithathe.

Badlelezela umuntu ngomuzi wakhe,

lomuntu wakibo ngelifa lakhe.

3Ngakho uThixo uthi:

“Ngiceba ukwenza umonakalo kulababantu,

elingeke liziphephise kuwo.

Kalisayikuhamba ngokuziqhenya,

ngoba kuzakuba yisikhathi sencithakalo.

4Ngalolosuku abantu bazalihleka;

bazaliklolodela ngale ingoma yokulila bathi:

‘Thina sichithwe okupheleleyo;

ilifa labantu bami labiwe.

Uyangithathela!

Amasimu ethu uwanika abathengisi.’ ”

5Ngakho-ke kawuzukuba laye ebandleni likaThixo

ozalabela ilizwe ngenkatho.

Abaphrofethi Bamanga

6Abaphrofethi babo bathi, “Lingaphrofethi.

Lingaphrofethi ngalezizinto;

ihlazo kaliyikusehlela.”

7Wena ndlu kaJakhobe, kufanele yini ukuba kuthiwe,

“UMoya kaThixo uzondile na?

Uyazenza izinto ezinje na?”

“Amazwi ami kawenzi okulungileyo

kuye ozindlela zakhe ziqondile na?

8Okwamanje abantu bami sebehlamuke

njengesitha.

Lihlubula ingubo eligugu

kulabo abedlulayo linganakile,

njengabantu abavela empini.

9Abesifazane babantu bami liyabaxotsha

emizini yabo emihle.

Lisusa isibusiso sami

kokuphela ebantwaneni babo.

10Sukani lihambe!

Ngoba le akusindawo yenu yokuphumula,

ngoba ingcolile,

ichithekile, okungeke kulungiswe.

11Nxa umqambi wamanga lomkhohlisi efika athi,

‘Ngizaliphrofethela iwayini elinengi lotshwala,’

uyabe engumphrofethi walababantu nje kuphela!”

Isithembiso Sokukhululwa

12“Impela ngizalibutha lonke, wena Jakhobe;

impela ngizabaqoqela ndawonye abako-Israyeli abasalayo.

Ngizabaqoqela ndawonye njengezimvu esibayeni,

njengomhlambi wezimvu emadlelweni awo;

indawo ibe lokuphithizela kwabantu.

13Lowo ozavula indlela uzahamba phambi kwabo;

bazafohla isango baphume.

Inkosi yabo izadlulela phambi kwabo,

uThixo abe phambi kwabo.”