UJobe 11

Impendulo KaZofari

1UZofari umNahama wasephendula wathi:

2“Uthi amazwi wonke la angayekelwa ukuphendulwa na?

Uwawane lolu luyekelwe nje lubheda?

3Umbhedo wakho lo ungenza abantu bathule na?

Uthi ungangakhuzwa muntu wena ukhulumela eceleni?

4Uthi kuNkulunkulu, ‘Inkolo yami kayilansolo

njalo ngimsulwa phambi kwakho.’

5Oh, ngize ngifise ukuthi ngabe uNkulunkulu uyakhuluma,

avule izindebe zakhe ekusola

6akuvulele imfihlo zokuhlakanipha,

ngoba inhlakanipho yeqiniso ikabili.

Yazi lokhu:

UNkulunkulu uvele usezikhohliwe ezinye izono zakho.

7Kambe ungayifinyelela yini imfihlakalo kaNkulunkulu?

Ungaziphenya iziphetho zikaSomandla na?

8Ziqongile ngaphezu kwamazulu, ungenzani kambe?

Zizikile kulokujula kolwandle, kuyini ongakwazi pho?

9Ukulinganiswa kwazo kude kulomhlaba

njalo kubanzi kulolwandle.

10Nxa engeza lapha akuphosele entolongweni

abize inkundla, ngubani ongamphikisa na?

11Liqiniso ukuthi uyababona abantu abakhohlisayo;

njalo nxa ebona okubi, kananzeleli na?

12Kodwa umuntu oyisithutha ngeke ahlakaniphe

njengoba ubabhemi weganga engeke azalwa ngumuntu.

13Kodwa nxa ugxilisa inhliziyo yakho kuye

uphakamisele izandla zakho kuye,

14nxa ulahla isono esisesandleni sakho

ungavumeli bubi buhlale ethenteni lakho,

15lapho-ke uzabuveza ubuso bakho ungelanhloni;

uzakuma uqine ungesabi.

16Uzalukhohlwa ngempela uhlupho lwakho,

lufike nje engqondweni njengezikhukhula ezadlulayo.

17Impilo izakhanya kulemini enkulu,

lobumnyama buzakuba njengasekuseni.

18Uzavikeleka, ngoba ithemba likhona;

uzakhangela ofuna khona uzuze ukuphumula uvikelekile.

19Uzazilalela, kungekho okwethusayo,

njalo abanengi bazabe sebezisondeza kuwe.

20Kodwa amehlo ababi azafiphala,

behluleke lokubaleka;

ithemba labo libe yikuhotsha umoya wokufa.”