UJeremiya 1

1La ngamazwi kaJeremiya indodana kaHilikhiya, omunye wabaphristi base-Anathothi elizweni lakoBhenjamini. 2Ilizwi likaThixo lafika kuye ngomnyaka wetshumi lantathu ekubuseni kukaJosiya indodana ka-Amoni inkosi yakoJuda, 3njalo ekubuseni kukaJehoyakhimi indodana kaJosiya inkosi yakoJuda, kwaze kwaba yinyanga yesihlanu emnyakeni wetshumi lanye kaZedekhiya indodana kaJosiya inkosi yakoJuda, ngesikhathi sokuthunjwa kwabantu baseJerusalema.

Ubizo LukaJeremiya

4Ilizwi likaThixo lafika kimi lisithi,

5“Ngingakakubumbi esiswini ngakwazi,

ungakazalwa ngakukhetha

ngakubeka ukuba ngumphrofethi ezizweni.”

6Mina ngathi, “Awu Thixo Somandla; ukukhuluma angikwazi, ngoba ngingumntwana nje.”

7Kodwa uThixo wathi kimi, “Ungaze wathi, ‘Ngingumntwana nje.’ Kumele uye kubo bonke engikuthuma kubo njalo utsho loba kuyini engikulaya khona. 8Ungabesabi, ngoba mina ngilawe njalo ngizakuhlenga,” kutsho uThixo.

9UThixo waseselula isandla sakhe wathinta umlomo wami wathi kimi, “Khathesi, sengifake amazwi ami emlonyeni wakho. 10Khangela, lamhla ngikubeka phezu kwezizwe lemibuso ukuba usiphune udilize, ubhubhise njalo uchithe; ukuba wakhe njalo uhlanyele.”

11Ilizwi likaThixo lafika kimi lathi, “Kuyini okubonayo, Jeremiya?”

Ngaphendula ngathi, “Ngibona ugatsha lwesihlahla se-alimondi.”

12UThixo wasesithi kimi, “Ubone kuhle, ngoba ngilindele ukubona ukuthi ilizwi lami ligcwalisekile.”

13Ilizwi likaThixo lafika kimi futhi: “Kuyini okubonayo?”

Mina ngaphendula ngathi, “Ngibona imbiza ebilayo, ithambeke ifulathele inyakatho.”

14UThixo wasesithi kimi, “Incithakalo evela enyakatho izakwehliselwa phezu kwabo bonke abahlala elizweni. 15Sekuseduze ukuba ngibize bonke abantu bemibuso yasenyakatho,” kutsho uThixo.

“Amakhosi abo azakuza amise izihlalo zawo zobukhosi

emasangweni aseJerusalema;

bazakumelana lemiduli yalo yonke eligombolozeleyo

kanye lamadolobho wonke akoJuda.

16Ngizamemezela ukwahlulela kwami ebantwini bami

ngenxa yobubi babo bokungidela,

betshisela abanye onkulunkulu impepha,

langokukhonza lokho okwenziwa ngezandla zabo.

17Wena zilungiselele! Sukuma ubatshele lokho engizakulaya khona. Ungathuthumeliswa yibo hlezi ngikwenze uthuthumele phambi kwabo. 18Lamhla sengikwenze waba lidolobho elivikelweyo, insika yensimbi lomduli wethusi ukuba umelane lelizwe lonke, umelane lamakhosi akoJuda, izikhulu zakhona, abaphristi bakhona kanye labantu bakhona. 19Bazakulwa lawe, kodwa kabayikukwehlula, ngoba ngilawe njalo ngizakuhlenga,” kutsho uThixo.