Marqqoosa 16

Yesuusa yhayiqopp dendeeza

(Mat. 28:1-8; Luq. 24:1-12; Wan. 20:1-10)

1Maala gallasay aadheezaypp guye Magdeelawe Mayramo, Yayqqooba indat Mayramannee Saloome yhanigii, Yesuusa aha tizhodayis shitto wonggeeza. 2Wogga gallas guura zherkkizherkko xalqqe kezodar, duufo yhanigeeza. 3U fa gancce pettatii pettatira, «Duufay doonapp nuus shuchch oonoo gol7isii haasoday?» yeegii wolla odintteeza.

4U be7adar ye damm atteez shuchchay goli7alii hali7eezana be7eeza. 5Yesuusa moogintteez duufay gancce gelodar pettii yelaga athay booth afila ma77ii, ushachch baggar betteezana bi7ii dagammeeza.

6Zin E unttiko, «Dagammippate; mazqalel afa sotintteez, Naazirete Yesuusa yi koyizana ta eriza. E yhaydd baaya, yhayqqopp dendeeza. U eza moogeez aqa yhaya bo7oytta. 7Yhatti yhanigii Yesuusa tamaaritayisnnee Phixiroosas, ‹Yesuusa yinttapp tiinatii Galila aadhiza. E yinttis odeezay garkk yi eza ezayid be7ada› yeegii odoytta» yeegeeza.1

8Maachchitay yashshar kukkurttar duufaypp kezii laasii qiteeza. Ma u yashitteez gishos yeya ooskka abikka odekkaya.2

Yesuusa Magdeela Mayramis bentteeza

(Mat. 28:9-10; Wan. 20:11-18)

9Yesuusa yhayqqopp dendeezaypp guye wogga gallas guura, laappun tuna ayyanita izpp e kesseez Magdeela Mayramis tiinatii bentteeza. 10Iza yhanigii tiina ezar yezitayis, u azanttarannee yeekkittar yezin odeeza. 11Zin Yesuusa pathi yezanannee izis bentteezana u si7eez wode iza giza ammanekkaya.

Yesuusa fa nam7i tamaaritayis bentteeza

(Luq. 24:13-35)

12Yeypp guye, unttapp nam7itay katamapp kezii yhammadar, ogella Yesuusa tiinaasaypp dummatii unttis bentteeza. 13U guye maaqqii, hara asayis odeeza, Zin hara asaykka u oda tuma geekkaya.

Yesuusa fa taphpho pettii tamaaritayis bentteeza

(Mat. 28:16-20; Luq. 24:36-49; Wan. 20:19-23; Haw. O. 1:6-8)

14Guyepp taphpho pettii e tamaaritay katha maadar, Yesuusa unttis bentteeza. Unttis ammano baazay gishonnee yhayiqopp e dendeezana be7eez asay odin u ammanaam ixxeezayis e unttan boreeza.

15E unttiko, «Biitta ubbayil yhanigii as ubbayis Wongile odoytta.3 16Ammaneezaynnee xammaqintteezay attoda, zin ammanekkazay pirddinttoda. 17Ammanizitayis yha malatitay inginttoda. U ta sunthayir tuna ayyanita kessoda, oroth doona nashshoda. 18U shoosh aykkiko woy wodhiza baz uzhikokka unttan qohaamii. Ma u fa kushe hargintteezitayil afa gaddii unttan pathoda» yeegeeza.

Yesuusa pude dendii salo kezeeza

(Luq. 24:50-53; Haw. O. 1:9-11)

19Goda Yesuusa tamaaritayira nashsheezaypp guye pude dendii salo kezeeza; Xoossapp ushachch baggar betteeza.4 20E tamaaritay yhanigeez aqo ubbayid qaala odeeza. Godaykka unttar wolla oothiza. U odiza qaalay tuma maaqqeeza Xoossay unttisi ingiza mallayir fa qaala miintheeza.