സങ്കീ. 47

യഹോവ മഹാരാജാവാകുന്നു

സംഗീതപ്രമാണിക്ക്; കോരഹ് പുത്രന്മാരുടെ ഒരു സങ്കീർത്തനം.

1സകലജനതകളുമേ, കൈ കൊട്ടുവിൻ;

ജയഘോഷത്തോടെ ദൈവസന്നിധിയിൽ ആർക്കുവിൻ.

2അത്യുന്നതനായ യഹോവ മഹത്വമുള്ളവൻ;

അവിടുന്ന് സർവ്വഭൂമിയുടെയും മഹാരാജാവാകുന്നു.

3കർത്താവ് ജനതകളെ നമ്മുടെ കീഴിലും

വംശങ്ങളെ നമ്മുടെ കാൽകീഴിലും ആക്കുന്നു.

4അവിടുന്ന് നമ്മുടെ ഓഹരി തിരഞ്ഞെടുത്ത് തന്നു;

താൻ സ്നേഹിച്ച യാക്കോബിന്‍റെ പ്രശംസയായ ഭൂമി തന്നെ. സേലാ.

5ദൈവം ജയഘോഷത്തോടും യഹോവ

കാഹളനാദത്തോടുംകൂടി ആരോഹണം ചെയ്യുന്നു.

6ദൈവത്തിന് സ്തുതിപാടുവിൻ, സ്തുതിപാടുവിൻ;

നമ്മുടെ രാജാവിന് സ്തുതിപാടുവിൻ, സ്തുതിപാടുവിൻ.

7ദൈവം സർവ്വഭൂമിക്കും രാജാവാകുന്നു;

ഒരു സങ്കീർത്തനത്തോടെ സ്തുതിപാടുവിൻ.

8ദൈവം ജനതകളെ ഭരിക്കുന്നു;

ദൈവം തന്‍റെ വിശുദ്ധസിംഹാസനത്തിൽ ഇരിക്കുന്നു.

9വംശങ്ങളുടെ പ്രഭുക്കന്മാർ അബ്രാഹാമിന്‍റെ ദൈവത്തിന്‍റെ ജനമായി ഒന്നിച്ചുകൂടുന്നു;

ഭൂമിയിലെ പരിചകൾ ദൈവത്തിന്‍റെതല്ലോ;

അവിടുന്ന് ഏറ്റവും ഉന്നതനായിരിക്കുന്നു.