Razan-tSaontsy 21

1Hoe kadahan-drano am-pità’ Iehovà

ty arofo’ i mpanjakay; tehafe’e an-tsatri’e.

2Mahity am-pihaino’ ondaty o sata’eo;

fe Mpandanja arofo t’Iehovà.

3No’ Iehovà ambone’ ty soroñe

ty havañonañe naho ty hatò.

4Fihaino mievoñevoñe

naho arofo miebotse:

ro failo’ o lo-tserekeo—hakeo izay.

5Minday havokarañe ty fisafiri’

o mavitrikeo;

fe mitarike mb’am-pilàñe

ty fanaentàeñañe.

6Ty ahazoam-bara am-pamelem-pandañitse

le evoñe mihelañe mb’am-pikoromahañe.

7Ho kozozoteñe añe o lo-tserekeo

ty amo fijoia’eo,

fa ifoneña’ iareo ty tsy hanao ty hiti’e.

8Mikelokeloke ty lala’ ondaty mengoke;

fe mahity ty fitoloña’ ty malio añ’arofo.

9Hàmake te mitoboke

an-kotson-tapenak’ ao,

ta te miharo akiba aman-drakemba

tea-trabike.

10Mipay haratiañe ty tro’ i tsivokatsey,

fa tsy mahaonin-tretrè

am-pihaino’e ty rañe’e.

11Ie lafañe ty mpañìnje,

mihamahihitse t’ie trentrañe,

ie anareñe ty mahihitse,

mitombo ty hilala’e.

12Misamba ty akiba’ i lo-tserekey

ty vantañe;

avari’e mb’am-piantoañe i tsivokatsey.

13I manjenjen-dravembia

ami’ty fitoreo’ o rarakeo,

ty mbe hikaike fe tsy ho toiñeñe.

14Fañanintsin-kaviñerañe

ty ravoravo añ’etake,

naho filoa-tiñake ty vokàñe añ’araña ao.

15Ie anoeñe ty hatò, ehake o vañoñeo,

fe mangebahebake o mpikitroke haratiañeo.

16Hitofa am-pivorian-dolo ao t’indaty mandrike amy lalan-kilalay.

17H’ondaty poi’e ty mpitea haravoañe;

tsy ho mpañaleale ty mpikoko divay

naho menake.

18Vilin’ai’ ty vantañe ty tsivokatse,

le tsoa’ ty vañoñe ty mpamañahy.

19Hàmake t’ie mimoneñe

an-dratraratra añe,

ta t’ie miharo aman-drakemba

mandietse naho mora boseke.

20Mihaja añ’anjomba’ o mahihitseo

ty vara sarotse naho ty menake;

fe abotse’ ty dagola o azeo.

21Manjo haveloñe naho havañonañe

vaho hasiñe

ty mitoha havantañañe naho fiferenaiñañe.

22Mitroatse an-drovam-panalolahy

ty mahihitse, vaho arotsa’e

ty hafatrarañe niatoa’e.

23Mitan-ty fiai’e tsy ho am-poheke

ty mahambeñe falie naho fameleke.

24Manivetive ty añara’e avao ty mpirohake naho mpievoñevoñe ;

ie mitoloñe am-pitrotroaboha’e.

25Mañe-doza amy tembo ty fañiria’e,

amy te tsy mete mitoloñe o taña’eo.

26Hadrao lomoñandro ty lahiaga,

fe matarike ty vantañe, tsy mangazoñe.

27Tiva ty fisoroña’ o tsivokatseo;

àntsake te engae’e miharo kinia.

28Hikenkañe ty mpitalily vìlañe,

fe mitolom-pitaroñe ty mañaoñe.

29Manao tarehe mahavany ty rati-tsereke,

fe itsakorea’ ty vantañe ty hombà’e.

30Tsy eo ty hihitse,

ndra ty faharendrehañe,

ndra ty safiry mahafiatreatre am’Iehovà.

31Hentseñeñe ho ami’ty androm-pihotakotahañe ty soavala,

fe a Iehovà ty fandrebahañe.